Diez kʼiinoʼob xiʼik Jesús teʼ kaʼanoʼ, maas chíikpaj tiʼ yaniʼ, tumen tu tsʼáaj le kiliʼich muukʼ yóokʼol le disipuloʼob tu kʼiinil le Pentecostesoʼ. Tsʼoʼoleʼ yanchaj uláakʼ baʼax eʼes tiʼ yaniʼ. Táanil tiʼ u kíimil le disipulo Esteban le ka muruxtuntaʼaboʼ tu yaʼalaj: «¡Ileʼex! Táan in wilik jeʼekʼab le kaʼanoʼ, yéetel táan in wilik u Paal máak, waʼalakbal tu x-noʼoj kʼab Dios» (Baʼaxoʼob 7:56).

Le tiaʼan Jesús yiknal u Taataoʼ, yaan u páaʼtik u yaʼalaʼaltiʼ le baʼax ku yaʼalik le Kiliʼich Tsʼíiboʼoboʼ. Davideʼ tu tsʼíibtaj yáanal u nuʼuktaj Dios le ka tu yaʼalaj Jéeobaeʼ yaan u yaʼalik tiʼ Jesús: «Kulen tin x-noʼoj kʼabil tak le ken in tsʼáa a enemigoʼobeʼ u kúuchilil a jetsʼkúuntik a wookoʼob». Le ken kʼuchuk le kʼiin jeʼeloʼ yaan u yaʼaliktiʼ: «Tsʼáanchaʼat túun a enemigoʼob» (Salmo 110:1, 2, Los Salmos en Maya). Baʼaleʼ ¿baʼax ken u beet Jesús le táan u páaʼtik u kʼuchul u kʼiinil u tsʼáanchaʼatik u enemigoʼoboʼ?

Teʼ Pentecostés tiʼ u jaʼabil 33, anchaj le múuchʼulil tiʼ le yáax cristianoʼoboʼ. Desde teʼ kaʼanoʼ káaj u gobernar Jesús yóokʼol u disipuloʼob yéeyaʼanoʼob tumen le kiliʼich muukʼ utiaʼal u binoʼob kaʼanoʼ (Colosasiloʼob 1:13). Letiʼeʼ tu nuʼuktoʼob utiaʼal u kʼaʼaytajoʼob bey xan utiaʼal u beetkoʼob uláakʼ junpʼéel meyaj. ¿Baʼax meyajil? Le kun chúukpajal u yóoloʼob tak ken kíimkoʼobeʼ yaan u kaʼa kuxkíintaʼaloʼob utiaʼal u múul gobernaroʼob yéetel Jesús teʼ Reinooʼ.

Juntúul tiʼ le máaxoʼob kun kʼuchul u beetuba reyil teʼ kaʼanoʼ Saulo, letiʼeʼ maas kʼaj óoltaʼan yéetel le kʼaabaʼ romail yaantiʼoʼ: Pablo. Letiʼeʼ juntúul judío jach u tsʼaamaj u yóol u beet baʼax ku yaʼalik u Ley Dios, baʼaleʼ maʼ maʼalob bix kaʼansaʼanil tumen u nuuktakil le judíoʼoboʼ, le oʼolal maʼalob úuchik u yilik u muruxtuntaʼal Esteban. Bey túunoʼ letiʼeʼ «láayliʼ taak u beetik loob yéetel u kíimsik u disipuloʼob Yuumtsileʼ». Ka jóokʼ utiaʼal u bin Damasco. Letiʼeʼ túuxtaʼab tumen Caifás, u nojchil le sacerdoteʼob, utiaʼal u machik u disipuloʼob Jesús ka u bisoʼob Jerusalén (Baʼaxoʼob 7:58; 9:1). Baʼaleʼ le táan u bin Saulooʼ, juʼul tumen junpʼéel sáasileʼ ka lúubi.

Letiʼeʼ tu yuʼubaj u yaʼalaʼaltiʼ: «Saulo, Saulo, ¿baʼaxten táan a chʼaʼpachtiken?». Sauloeʼ tu yaʼalaj: «¿Máaxech, Yuumtsil?». Ka núukaʼabtiʼ:  «Teen Jesús, le máax ka chʼaʼpachtikoʼ» (Baʼaxoʼob 9:4, 5).

Jesuseʼ tu yaʼalaj tiʼ Saulo ka xiʼik Damasco, teʼeloʼ tiʼ ken u yaʼaltiʼ baʼax ken u beetiʼ, ka maʼach tu kʼabeʼ ka bisaʼabiʼ, tumen le sáasil juloʼ tu beetaj u chʼóoptal. Ichil junpʼéel náayeʼ chíikpaj Jesús tiʼ Ananías, juntúul disipulo kajaʼan Damasco. Jesuseʼ tu yaʼalajtiʼ tuʼux yaan Saulo utiaʼal u bin u yile. Ananíaseʼ sajakchaj bin u yile, baʼaleʼ Jesuseʼ tu yaʼalajtiʼ: «Letiʼeʼ bey junpʼéel nuʼukul in yéeymaj utiaʼal ka u bis in kʼaabaʼ teʼ táanxel luʼumiloʼoboʼ, tu táan reyoʼob bey xan tu táan u paalaloʼob Israel». Sauloeʼ suunaj u sáasil, desde tu kaajil túun Damascoeʼ «joʼopʼ u kʼaʼaytik baʼaloʼob yaan yil yéetel Jesús, táan u yaʼalikeʼ le Máakaʼ u Paal Dios» (Baʼaxoʼob 9:15, 20).

Yéetel u yáantaj Jesuseʼ, Pablo yéetel uláakʼ máakoʼobeʼ tu kʼaʼaytoʼob le maʼalob péektsil káaj u kʼaʼaytaʼal tumen Jesusoʼ. Dioseʼ jach tu bendecirtaj le meyaj tu beetoʼ. Kex 25 jaʼaboʼob u chíikbesuba Jesús tiʼ tu bejil Damascoeʼ, Pabloeʼ tu yaʼaleʼ le maʼalob péektsiloʼ «tsʼoʼok u kʼaʼaytaʼal tiʼ tuláakal le máakoʼob yanoʼob yáanal kaʼanoʼ» (Colosasiloʼob 1:23).

Ka máan uláakʼ jaʼaboʼobeʼ, Jesuseʼ tu tsʼáaj u yil apóstol Juan, le máax jach u yaabiltmaj, uláakʼ baʼaloʼob kʼaʼanaʼantak ku chíikpajal ichil le Biblia tu libroil Apocalipsisoʼ. Yoʼolal le baʼaxoʼob tsʼaʼab u yil Juanoʼ, jeʼel u páajtal u yaʼalaʼal kuxlaj utiaʼal u yilik u suut Jesús yéetel u poder le Reinooʼ (Juan 21:22). Bey túunoʼ «tu yoʼolal kiliʼich muukʼeʼ, [Juaneʼ kʼuch] antal tu kʼiinil Yuumtsil» (Apocalipsis 1:10). ¿Baʼax kʼiin ka úuch lelaʼ?

Ken u xakʼalxokt máak le baʼax ku yaʼalik le profecíaʼoboʼ ku yeʼesikeʼ «u kʼiinil Yuumtsil[eʼ]» káaj tu jaʼabil 1914. Teʼ jaʼab jeʼeloʼ ku yaʼalaʼaleʼ bey xíik le yóokʼol kaabaʼ. Le jaʼaboʼob seguernaj ka tsʼoʼokoʼ jach yaʼab baʼateltáambaloʼob tsʼoʼok u yantal, kʼaakʼas kʼojaʼaniloʼob, wiʼijiloʼob, u tíitkuba le luʼumaʼ yéetel uláakʼ baʼaloʼob kʼaastak eʼesik le baʼax tu yaʼalaj Jesús tiʼ u apostoloʼob utiaʼal u yilkoʼob ‹way yaneʼ› yéetel «táan u taal u tsʼoʼokol tiʼ le yóokʼol kaabaʼ» (Mateo 24:3, 7, 8, 14). Bejlaʼeʼ táan u kʼaʼaytaʼal u maʼalob péektsilil le Reino tuláakal tuʼuxoʼ, maʼ chéen teʼ kaajoʼob yaan yáanal u páajtalil Romaoʼ.

Juaneʼ nuʼuktaʼab tumen Dios utiaʼal ka u tsʼíibt baʼax u kʼáat u yaʼal lelaʼ: «¡Tsʼoʼok u kʼuchul u salvación, u páajtalil, u Reino k-Dios bey xan le páajtalil u tsʼaamaj tiʼ u Cristooʼ[!]» (Apocalipsis 12:10). Jach beyoʼ, le u Reino Dios jach kʼaʼaytaʼab tumen Jesusoʼ, tsʼoʼok u káajal u gobernar.

Lelaʼ jach ku taasik kiʼimak óolal tiʼ tuláakal u disipuloʼob Jesús. Letiʼobeʼ ku yuʼubikoʼob jach tiʼ letiʼob ku yaʼalaʼal le baʼax tu tsʼíibtaj Juan úuchjeakilaʼ: «Tu yoʼolal lelaʼ, ¡kiʼimakchajak a wóoleʼex, kaʼaneʼex, bey xan teʼex, u kajnáalileʼex kaʼan! ¡Óotsil tiʼ le Luʼumoʼ bey xan tiʼ le kʼáaʼnáaboʼ!, tumen le Kʼaasilbaʼaloʼ tsʼoʼok u yéemel ta wiknaleʼex yéetel jach pʼujaʼan tumen u yojel chéen junpʼíit kʼiin pʼaataltiʼ» (Apocalipsis 12:12).

Bejlaʼeʼ Jesuseʼ maʼ chéen tiʼ kulukbal tu tséel u Taata páaʼtajeʼ. Baʼaxeʼ letiʼeʼ táan u gobernar bey juntúul Reyeʼ, le oʼolal maʼ kun xáantal ken u xuʼuls tiʼ tuláakal u enemigoʼob (Hebreoʼob 10:12, 13). ¿Baʼaxoʼob jatsʼutstak kun úuchul ken tsʼoʼokok u beetik lelaʼ?