Lu Saa stiʼ Pentecostés, chii gubidxa despué de zeʼ Jesús guibáʼ, gucuaa caadxi discípulo espíritu santu. Ndiʼ bisihuinni maʼ nuu Jesús guibáʼ. Peru nuuruʼ xcaadxi cosa ni rusihuinni maʼ nuube guibáʼ. Ante gatiʼ discípulo Esteban, ora cuchácabe guié laa pur cudii testimonio, guníʼ: «¡Laguuyaʼ! Cayuuyaʼ zuxeleʼ guibáʼ ne zuhuaa Xiiñiʼ Hombre ladu derechu stiʼ Dios» (Hechos 7:56).

Neca maʼ nuu Jesús guibáʼ, naquiiñeʼ cuézabe gaca cumplir ni maca cá lu Stiidxaʼ Dios. Rey David bicaa pur espíritu santu: «Ná Jehová rabi Señor stinneʼ [Jesús]: “Gurí ladu derechu stinneʼ dede ora quixhedxieʼ ca xhenemíguluʼ xañeeluʼ”». Ne guiluxe si tiempu riʼ, zabi Jehová Jesús: «Biʼniʼ dominar ca enemigu stiluʼ» (Salmo 110:1, 2). Peru ¿xi guni Jesús laga guedandá hora riʼ yaʼ?

Lu Pentecostés, iza 33, guyuu primé congregación stiʼ ca xpinni Cristu. Ngue runi dede guibáʼ bizulú cayuni mandar Jesús luguiáʼ ca discípulo ni bibí pur espíritu santu (Colosenses 1:13). Gucanebe laacaʼ para guni predicarcaʼ ne biʼniʼ prepararbe laacaʼ para dxiiñaʼ ni chigúnicaʼ despué. ¿Xi dxiiñaʼ ca yaʼ? Ca ni gaca fiel dede ora gatiʼ, ne guiasa si de lade gueʼtuʼ, zaca rey ne zuni mandarné Jesús guibáʼ.

Nápanu ejemplu stiʼ ti hombre ni zaca rey guibáʼ, laabe nga Saulo, ni runibiaʼnu casi Pablo. Ti judíu ni runi stipa pur chinanda Ley stiʼ Dios. Peru cadi jneza ca idea guluu ca líder stiʼ ca religión stiʼ ca judíu ndaaniʼ íquebe, dede bidiibe lugar guchácabe guié Esteban. Ne yanna cayuni amenazarbe ca discípulo stiʼ Señor ne racaláʼdxibe guutibe laacaʼ. Ne gucuaabe permisu stiʼ sumo sacerdote, Caifás, para guinaazebe ca xpinni Cristu nuu Damasco ne chinebe laacaʼ Jerusalén (Hechos 7:58; 9:1). Peru neza zebe que bizaaniʼ ti biaaniʼ laabe ne biábabe layú.

Ne binadiágabe caníʼ tuuxa: «Saulo, Saulo, ¿xiñee canazananduʼ naa pue?». Óraque gunabadiidxaʼ Saulo: «Señor, ¿tu lii yaʼ?». Para bicabi laabe: «Naa nga Jesús, ni canazananduʼ» (Hechos 9:4, 5).

Gudxi Jesús Saulo cheʼ Damasco ne cueza gábicabe  laa xi guni, peru caquiiñeʼ chinécabe laa purtiʼ cadi cayuuyaʼ Saulo gastiʼ pur biaaniʼ biʼyaʼ que. Lu sti visión, bihuinni Jesús nezalú Ananías, tobi de ca discípulo stiʼ ni nabeza Damasco, ne gunábabe laa cheʼ ndaaniʼ ti yoo ne raqué guʼyaʼ Saulo. Nabé bidxibi Ananías peru gudxi Jesús laabe: «Guyé, purtiʼ maʼ gulieeʼ hombre riʼ para guiníʼ de naa ndaaniʼ guiráʼ guidxi, cásica ra nuu rey ne ra nuu ca xiiñiʼ Israel». Ne óraque, biguetaʼ biiyaʼ Saulo, ne «nagueendaca biuube ndaaniʼ ca sinagoga [stiʼ Damasco] que ne bizulú biʼniʼ predicarbe de Jesús, caniʼbe laa nga Xiiñiʼ Dios» (Hechos 9:15, 20).

Gucané Jesús Pablo ne xcaadxi xpinni Cristu cadi gusaana de guni predicarcaʼ, cásica biʼniʼ Jesús. Ne pur guluu Dios ndaayaʼ laacabe nabé galán ni guleendúcabe. Biaʼ veinticinco iza despué de bihuinni Jesús nezalú Pablo ora zeʼ Damasco, guníʼ Pablo maʼ guca predicar ca noticia galán stiʼ Reinu lu «guidubi guidxilayú» (Colosenses 1:23).

Caadxi iza despué, biluíʼ Jesús caadxi visión apóstol ni nabé nadxiibe que, apóstol Juan, ne zeeda ca visión riʼ lu libru stiʼ Apocalipsis. Lu ca visión ni gucuaa Juan riʼ biiyaʼ dxi gueeda Jesús casi Rey (Juan 21:22). Pur espíritu santu gunda biiyaʼ Juan «dxi stiʼ Señor» (Apocalipsis 1:10). ¿Padxí nga guedandá «dxi stiʼ Señor» yaʼ?

Pur maʼ guca estudiar chaahuiʼ ca profecía zeeda lu Biblia, maʼ nánnanu bizulú «dxi stiʼ Señor» lu iza 1914. Iza que nga bizulú Primera Guerra Mundial. Ne ca iza despué, huayaca jma guerra, huayuu stale guendahuará, hambre, huayaca stale xu ne xcaadxi cosa. Pur guiráʼ ni cazaaca riʼ zanda guininu cayaca cumplir «señal» ni bidii Jesús ca apóstol stiʼ ni zusihuinni «presencia» stiʼ ne dxi gueeda «fin» (Mateo 24:3, 7, 8, 14). Ca dxi nabáninu riʼ, maʼ cadi ca guidxi si ra biʼniʼ mandar Roma cayaca predicar ca noticia galán stiʼ Reinu, sínuque maʼ lu guidubi Guidxilayú.

Gucané Dios Juan para bicaa xi riníʼ guiráʼ cosa riʼ: «¡Maʼ bilá Dios stinu xquidxi, maʼ bihuinni poder stiʼ ne maʼ cayuni mandar Reinu stiʼ, maʼ caquiiñeʼ Cristu stibe autoridad stiʼ!» (Apocalipsis 12:10). Zacá ni, maʼ cayuni mandar Reinu stiʼ Dios ni nuu guibáʼ, ni nabé guníʼ Jesús que.

Nánnanu nabé galán noticia ni guníʼ apóstol Juan riʼ para guiráʼ xpinni Cristu ni qué gusaana Dios, ne laaca qué ziuu dxi gusiaandacabe ca diidxaʼ riʼ: «Nga runi, ¡guiecheʼ guibáʼ ne ca ni nabeza racá! Peru ¡gapagá si guidxilayú ne nisadóʼ laa! Purtiʼ maʼ biete Binidxabaʼ ra nuutu ne guizáʼ cadxiichi, purtiʼ nanna maʼ huaxiéʼ tiempu napa» (Apocalipsis 12:12).

Maʼ cadi zuba Jesús ladu derechu stiʼ Bixhoze cabeza. Yanna maʼ cayuni mandarbe casi Rey ne maʼ cadi candaa zunitilube ca enemigu stibe (Hebreos 10:12, 13). Peru ¿xi ca cosa galán chiguizaaca yaʼ?