Benɛ a baptisi Yesu se pɛ ɔ, he nyɛlɔ ko ka kaa e ma ha nɛ Yesu yi mi to ɔ nɛ pee yaka loko e je e sɔmɔmi ní tsumi ɔ sisi po. Ngɛ anɔkuale mi ɔ, Abosiami ka Yesu si abɔ. Pee se ɔ, Yesu de ngɛ nɔ yaya a he ke: “Nɔ nɛ yeɔ je nɛ ɔ nɔ matsɛ ɔ ma. E be he wami ko ngɛ imi ye nɔ.”​—Yohane 14:30.

Bɔfo Yohane na nɔ́ nɛ maa ba “blema sinɔ ngua a nɛ a tsɛɛ lɛ Abosiami, loo Satan” ɔ nɔ ngɛ nina mi. A maa fie adesahi a he nyɛlɔ nɛ e yi mi wa nɛ ɔ kɛ je hiɔwe. Nina a tsɔɔ kaa “e mi mi fu wawɛɛ, ejakaa e le kaa be bɔɔ kɛkɛ nɛ e piɛ ha lɛ.” (Kpojemi 12:9, 12) Kristofohi ngɛ nɔ mi mami kaa a ngɛ jamɛ a ‘be bɔɔ nɛ piɛ’ kɛ ha Satan ɔ mi. A he ye hu kaa e be kɛe kulaa nɛ a maa nu jamɛ a “blema sinɔ ɔ” kɛ wo muɔ voo ko mi, nɛ ngɛ jeha 1,000 nɛ Yesu kɛ maa ye matsɛ ɔ mi ɔ, Abosiami be nyɛe maa pee nɔ́ ko nɔ́ ko.​​—Kpojemi 20:1, 2.

Jamɛ a be ɔ mi ɔ, mɛni maa ya nɔ ngɛ zugba a nɔ? Mɛnɔmɛ nɛ a maa hi zugba a nɔ, nɛ kɛ si himi maa pee kɛɛ? Yesu nitsɛ ha heto. Ngɛ nɔ́ hetomi nɔ́ nɛ kɔɔ apletsihi kɛ jijɔhi a he nɛ e kɛ tsu ní ɔ mi ɔ, Yesu tsɔɔ si himi nɛ dali nɛ a ngɛ kaa jijɔhi, nɛ a fĩ e nyɛmimɛ ɔmɛ a se ɔ ma ná hwɔɔ se. Lɔ ɔ se ɔ, e tsɔɔ nɔ́ nɛ maa ba yayami peeli nɛ a ngɛ kaa apletsihi ɔ hu a nɔ. Yesu de ke: ‘Nimli nɛ ɔmɛ [apletsi ɔmɛ] maa ya neneene hɛ mi kpatami mi; se dali ɔmɛ [jijɔ ɔmɛ] lɛɛ a maa ya neneene wami mi.’​​—Mateo 25:46.

Enɛ ɔ ha nɛ wa nu nɔ́ nɛ Yesu de yayami peelɔ ɔ nɛ a sɛu lɛ ngɛ e kasa nya a sisi. Yesu wui lɛ si kaa e ma ha nɛ e piɛɛ e he ngɛ hiɔwe Matsɛ Yemi ɔ mi kaa bɔ nɛ e wo e kaseli anɔkualetsɛmɛ ɔmɛ si ɔ. Mohu ɔ, Yesu de yayami peelɔ nɛ e pia e he ɔ ke: ‘I ngɛ mo si woe mwɔnɛ ɔ kaa, i kɛ mo maa hi Paradeiso.’ (Luka 23:43) Enɛ ɔ he ɔ, nyumu ɔ ná hɛ nɔ kami kaa e maa hi si ngɛ  Paradeiso, loo abɔɔ nɛ ngɛ fɛu mi. Enɛ ɔ he ɔ, nihi tsuo nɛ a maa pee a ní kaa jijɔhi ngɛ wa be nɛ ɔ mi, nɛ a ma ná “neneene wami” ɔ hu maa hi jamɛ a Paradeiso ɔ mi.

Munyu nɛ ɔ, kɛ nɔ́ nɛ bɔfo Yohane de ngɛ bɔ nɛ si himi maa pee ha ngɛ zugba a nɔ hwɔɔ se he ɔ kɔ. E de ke: “Mawu hi he ji nimli a kpɛti! E kɛ mɛ maa hi si, nɛ a maa pee e ma. Mawu nitsɛ kɛ mɛ maa hi si, nɛ e maa pee a Mawu. Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”​​—Kpojemi 21:3, 4.

Loko yayami peelɔ ɔ nɛ Yesu wo lɛ si ɔ ma nyɛ maa hi Paradeiso ɔ mi ɔ, ja a tle lɛ si kɛ je gbeje. Pi lɛ pɛ nɛ a ma tle lɛ si, ejakaa Yesu de ke: “Be maa su nɛ gbogboehi tsuo maa nu Mawu Bi ɔ gbi, nɛ a maa je kpo kɛ je a yɔkɔ ɔmɛ a mi. A ti ni nɛmɛ nɛ pee kpakpa a, a maa te si, nɛ a maa hi si kɛ maa ya neneene; se ni nɛmɛ nɛ pee yayami ɔ lɛɛ a maa te si, konɛ a kojo mɛ.”​​—Yohane 5:28, 29.

Nɛ Yesu bɔfo ɔmɛ nɛ a ye anɔkuale, kɛ nihi bɔɔ nɛ a ma ya piɛɛ Yesu he ngɛ hiɔwe ɔ hu nɛɛ? Baiblo ɔ de ke: “A maa ye osɔfo, nɛ a ma sɔmɔ Mawu kɛ Kristo; nɛ a kɛ Kristo maa ye matsɛ jeha akpe.” (Kpojemi 20:6) Nihi nɛ a maa piɛɛ Kristo he kɛ ye matsɛ ɔ ji nyumuhi kɛ yihi nɛ a hi zugba a nɔ hyɛ. Lɔ ɔ he ɔ, a maa pee matsɛmɛ nɛ a mi mi maa saa mɛ ngɛ nihi nɛ maa hi zugba a nɔ ɔ a he, nɛ a maa nu mɛ sisi hulɔ.​​—Kpojemi 5:10.

Yesu maa ngɔ kpɔmi nɔ ɔ kɛ tsu adesahi nɛ a maa hi zugba a nɔ ɔ a he, nɛ e ma je mɛ kɛ je gbiɛmi nɛ haa nɛ a peeɔ yayami ɔ sisi. Yesu kɛ nihi nɛ a maa piɛɛ e he kɛ ye matsɛ ɔ ma ha nɛ adesahi maa ye mluku. Adesahi kɛ bua jɔmi maa hi si ngɛ zugba a nɔ kaa bɔ nɛ Mawu to e yi mi kɛ je sisije ɔ. A ma fɔ babauu nɛ a ma hyi zugba a tsuo nɔ kaa bɔ nɛ Mawu de Adam kɛ Hawa a. Gbenɔ nɛ je yayami nɛ Adam pee ɔ mi kɛ ba a po be si hie hu!

Kɛkɛ ɔ, ke Kristo Jeha Akpe Nɔ Yemi ɔ ke baa nyagbe ɔ, e maa gbe ní tsumi nɛ Yehowa kɛ wo e dɛ ɔ tsuo nya, nɛ e maa ngɔ Matsɛ Yemi ɔ, kɛ adesahi a weku nɛ ye mluku ɔ tsuo kɛ ha e Tsɛ ɔ. Bɔfo Paulo ngma Yesu he si bami nɛ ɔ he munyu ke: “Ke a ngɔ níhi tsuo ngɔ wo Kristo nɔ yemi sisi ɔ, lɛɛ Bi ɔ nitsɛ hu maa ngɔ e he ngɔ ha Mawu, nɔ nɛ ngɔ níhi tsuo ngɔ wo e nɔ yemi sisi ɔ. Nɛ Mawu maa ye ní ɔmɛ tsuo a nɔ.”​—1 Korinto Bi 15:28.

E ngɛ heii kaa Yesu nɔ Mawu maa gu kɛ tsu e yi mi tomihi a he ní. Akɛnɛ Mawu yi mi tomihi maa hi mi bae kɛ maa ya neneene he je ɔ, Yesu ma tsu nɔ́ nɛ e de ngɛ lɛ nitsɛ e he ke: “Imi ji blɔ ɔ, kɛ anɔkuale ɔ, kɛ wami ɔ” nya ní.​​—Yohane 14:6.