Ndék ngéda i mbus sôble yé, nwaa le Yésu a mbôdôl nson wé, Satan, a bi boñ biliya bi ngui le Yésu a kwo. Ñ, Nsohop a bi noode Yésu ngandak ngélé. I mbus ngéda, Yésu a bi kal inyu Nsohop nu le: “Ñane nkoñ isi a yé i lo, ndi a ñénél bé me.”​—Yôhanes 14:30.

Ikété yiinda, ñôma Yôhanes a bi bôk a tehe jam li mbem ‘soso kômnyoo, nlômbi nyoo yaga, u u nsébla le Nsohop ni Satan.’ Nyoo ngii, ba bé lama buñga béba ñoo bôt ba binam nu ‘a gwé hiun hikeñi, a yik le a gwé ndik ndék ngéda.’ (Masoola 12:9, 12) Bikristen bi gwé manjom malam i hoñol le ba niñil ini “ndék ngéda” ni le mbus isii ngéda “soso nkômnyoo, nlômbi nyoo,” u ga léña i soñkum, hala wee ngim libak i i nti bé nye pôla i gwel nson wo ki wo, inyu 1000 nwii. Ha ngéda i, Yésu a mba a énél i Ane Djob.​—Masoola 20:1, 2.

Mu ngéda i, mam ma ga ba lelaa hana isi? Njee a ga niñ mu, niñ y’a ba lelaa? Yésu nyemede a ntimbhe mambadga ma. I hihéga hié hi mintômba ni minya mi kembee, Yésu a ñunda yom i mbem bôt ba téé sép ba ba yé kiki mintômba, ba ba nsal nlôñ yada ni bilôk binyañ bi Yésu, ba ba mboñ ki bo loñge. A ñunda ki yom i bem i bet ba mboñ bé hala, ba ba yé kiki minya mi kembee. Yésu a nkal le: “Bana [minya mi kembee] ba ga ke i tjiba i boga, ndi ba ba téé sép b’a ke i niñ boga.”​—Matéô 25:46.

Hala a nhôla bés i nok jam Yésu a bi kal ntonba ba bi péñ i kék ipañ yé. A bi bôn bé nye minlélém mi bibom kiki baôma bé ba maliga, hala wee i ba nsoñgi u bôt ba ga kôdôl Ane i ngii. Iloo hala, Yésu a bi bôn  mboñbéba nu a bi hielñem le: “I len ini me nkal we maliga le: W’a ba ni me i Paradis.” (Lukas 23:43) Jon, i mut nunu a bi kôhna pôla i niñ ikété Paradis: Loñge wom. Nlélém i len ini, bet ba ñunda le ba yé kiki mintômba mi mi ga kôhna “niñ boga,” ba ga ba i Paradis.

Hala a nkiha ni mam ñôma Yôhanes a nkal inyu niñ i i ga ba hana isi. A nkal le: “Lap Nyambe i yé ni bôt ba binam, a ga yén ki ni bo, b’a ba bôt bé. Nyambe nyemede a’ ba lôñni bo. A’ sas gwiiha gwobisôna i mis map, nyemb y’a ba ha bé, to maéa, to londok, to njôghe bi ga ba ha bé. Minlômbi mi mam mi mal tagbe.”​—Masoola 21:3, 4.

Inyu boñ le ntonba unu u niñ i Paradis, y’a béda nye le a tuge. Ndi nyetama bé nyen a ga tuge. Yésu a bi tibil yis hala ngéda a kal le: “Ngeñ y’a lo le i bôt bobasôna ba yé ikété soñ mbigda b’a nok kiñ yé, ba pam; i bôt ba bi boñ mam malam inyu bitugne bi niñ, ndi i bôt ba bi bana lem i boñ mam mabe inyu bitugne bi bikééhene.”​—Yôhanes 5:28, 29.

Ndi kii i ga bôña inyu baôma ba ba ntéñbe ni nye ni inyu ndék bôt i i ga ba ni Yésu i ngii? Bibel i nkal le: “B’a ba biprisi bisu bi Nyambe ni bi Kristô, b’a ane ki lôñ yada ni nye inyu hikôô hi nwi.” (Masoola 20:6) I bet ba ga énél ni Kristô ba yé bôlôm ni bôda ba ba bi niñ hana isi. Ibabé pééna, ba ga bana ñem ngôô, ba undga ki le ba nok i bet ba ga énél hana isi.​—Masoola 5:10.

Yésu a ga gwélél binoñ inyu sayap bôt ba binam ni i tohol bo mu béba ba bi kôdôl. Nye ni ba ba ga énél ni nye, ba ga boñ le bôt ba binam ba yila peles. Ñ, bôt ba binam ba ga niñ inoñnaga ni kiki Djob a bi téé i bibôdle ngéda a kal Adam bo Éva le ba bôl, ba yônôs isi. Yak nyemb i béba Adam i bi lona i ga ba ha bé!

Hala ni nyen, Yésu a ga yônôs nson Yéhôva a bi ti nye. Mu mamélél ma Ane ma Hikôô hi nwii, Yésu a ga timbis Ane, a timbis ki lihaa li bôt ba binam li li ga ba peles i moo ma Isañ. Inyu pôdôl ndémbél i suhulnyuu i mbuma ñañ i Yésu, ñôma Paul a bi tila le: “Ngéda Nyambe a’ suhul mam momasôna isi makôô mé, ha nyen yak Man nyemede a suhus nyemede isi Nu a bi suhul mam momasôna isi yé, le ndi Nyambe a ba mam momasôna inyu bôt bobasôna.”​—1 Korintô 15:28.

Ntiik, Yésu a gwé nson u tôbôtôbô mu biyônôl bi bitééne bi Djob. Kiki bitééne bi bi ga yon ndik, Yésu a ga boñ mam inoñnaga ni bibuk a bi gwélél inyu pôdôl nyemede le: “Men me yé njel, me yé maliga, me yé ki niñ.”​—Yôhanes 14:6.