Éyoñ Yésus a dubaneya, a nga ji’a tôbane nsiñ ô mbe ô jeñe’ a ngul ése na ô kpwé nye valé a ngenane teke taté taté ésaé jé. Diable a nga jeñe fo’o abui biyoñe na, a ve’ele Yésus. Mvuse ya valé, Yésus a nga jô a lat a nsiñ ate na: “Njô bôte ya si nyô a zu: a se ajô be ma.”​—Jean 14:30.

Nlômane Jean ô nga yene ñyenan ô liti’i nye jam da yange ‘beta dragon, nnôme nyo, nyô a lobane na, Diable a Satan.’ Ba ye titane beta nsiñ bôt ate yôp, a ye zu si “a bili beta ayaa, a yeme na, a bili ve ôyôme nté.” (Nlitan 12:9, 12) Bekristen be bili mbamba beamu ya buni na, ba nyiñ “ôyôme nté” ôte a na, ana’ana ba ye kak a wua ‘beta dragon, nnôme nyo’ édo’ ébé été tañe mimbu 1 000, vôm a ye ke kui na a beta bo jôm éziñ, nté Yésus a ye jôé Éjôé Zambe.​—Nlitan 20:1, 2.

Nté ôte ôse, jé ja ye bobane si? Za a ye nyiñ été? A si ja ye bo aya? Yésus émien a nga ve éyalane ya été. Nkana a nga kan ô fombô’ô mintômba a bikela, a nga liti jam da yange bôt be ne zôsôô ane mintômba melu ma zu, mbe bete ba saé fufulu a bobenyañe be Yésus a bo be mvaé. A nga liti fe jé ja yange bôte be nji bo mam avale da, ba be ne ane bikela. Yésus a nga jô na: “Bôte ba [bikela] be aye kôlô a ke yene nlebane ya melu mese: ve bôt be ne zôsô [mintômba] be aye ke yen ényiñe ya melu mese.”​—Matthieu 25:46.

Nalé a volô bia na bi kôme wô’ô bifia bi Yésus, bifia a nga jô ñwôé bôt a nga to nye fefel élé yôp. Yésus a nji ka’ale môt ate ma’an a nga ka’ale minlômane mié, ma’ane ya ke nyiñ a jôé Éjôé ya yôp. Yésus a nga viane jô mbo mam abé te, nyi a nga jôbane na: ‘Ma bele  ane ma jô wo dene na, bia wo bia ye tabe Paradis.’ (Luc 23:43, Mfefé Nkôñelan) Nde, môt ate a nga bi ndi nleme ya nyiñe Paradis, abeñ afup. Bôte be ne ane mintômba, a ba ye bi “ényiñe ya melu mese” be’ fe ba ye nyiñe Paradis.

Jam ete da tôban a mame nlômane Jean ô nga jô a lat avale si ja ye bo. A nga jô na: “Tabernacle ya Zambe a ne be bôt, a a ye tabe be be, a be aye bo bôte bé, a Zambe émien a ye tabe be be, a bo Zambe wop. A a ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.”​—Nlitan 21:3, 4.

Asu ya na ñwôé bôt ate a bu’uban a ényiñ e Paradis, da sili na a wômô miñwuan. A fe na, sa ke nye étam a ye wômô. Yésus a nga kôme liti de éyoñ a nga jô na: “Awolo de aye bo, éyoñ bôte bese be ne mesoñ be aye wô’ô tyiñe jé, be aye so; ba be nga bo mvaé, be aye wômô a nyiñ; ba be nga bo abé, be aye wômô a nyoñe mekua.”​—Jean 5:28, 29.

Ve, jé ja yange minlômane mi nga wulu ba’aba’a a Yésus a tañe bôte ja ye tabe a nye e yôb été? Bible a jô na: “Be aye bo beprêtre ya Zambe a ba ya Krist, a be aye jôô, ba be nye toyini mimbu wua.” (Nlitan 20:6) Mbôle bôte ba ye jôé a Yésus be nga to befam a binga e si va, ba ye kôme wô’ô bone be bôte ba ye nyiñe si, a liti be fulu nkoon éngôngol.​—Nlitan 5:10.

Yésus a ye bo na ntañ ô kôté a volô bone be bôte si va, wo ye vaa be éto belo y’abé. Yésus a bôte ba be nye ba ye jôé, ba ye bo na bezôsôô be bôt be ke kui été ya na be bo teke fe nsem. Ôwé, môta binam a ye bu’ubane nya ényiñi, nyi Zambe a nga sôñ atata’a éyoñ a nga jô Adam ba Ève na be fôé, a jalé si. Ja’a awu e nga so bia be Adam de a ye beta bo!

Yésus a ye mane jalé mam mese Yéhôva a nga kate nye na a bo. Éyoñ Éjôé jé ya Toyini Mimbu ja ye man, Yésus a ye bulan Ésa wé Éjôé jé a bone be bôte ba ye bo teke nsem. Nlômane Paul ô nga kobô ajô fulu éjôte nyule Yésus ô jô’ô na: “Éyoñe biôme bise bi maneya tabe éjôé jé si, éyoñe te mon émien a ye ke éjôé si ya be Nyô a nga telé biôme bise éjôé jé si; ndembene Zambe a ye bo jôm ése e be bese.”​—1 Becorinthien 15:28, Mfefé Nkôñelan.

Da yené fo’o ne ngeññ na, mbe’e Yésus a bili ô ne nya mfii asu ya na nsôñane Zambe ô jaléban. A nté nta’ane mam ôte wo ye ke ôsu a jaléban nnôm éto, Yésus a ye liti na, da yiane fo’o na be loene nye, ane émien a nga jô na: “Ma me ne zen, me ne fe benya mejôô, a ényiñ.”​—Jean 14:6.