Esisịt ini ke Jesus ama akana baptism, ata idiọk asua emi ekebierede ndinam enye ibak ama aka okodomo enye mbemiso enye ọtọn̄ọde utom ukwọrọikọ. Devil ama odomo enye ediwak ini. Nte ini akade, Jesus ama etịn̄ n̄kpọ aban̄a owo ibak emi ete: “Andikara ererimbot emi ke edi. Enye inyụn̄ inyeneke odudu ke idemmi.”—John 14:30.

Ke n̄kukụt kiet, apostle John ama okụt se ẹdinamde ‘akwa dragon, kpa akani urụkikọt emi ẹkotde Devil ye Satan.’ Ẹyesio owo ibak emi asuade mme owo mi ẹduọk ke isọn̄, ndien “enye asan̄a ye akwa iyatesịt, sia enye ọfiọkde ete ini imọ edi ibio.” (Ediyarade 12:9, 12) Enyene ediwak n̄kpọ emi anamde mme Christian ẹnịm ke mmimọ idu uwem ke ‘ibio ini’ emi Satan enyenede ye nte ke ibịghike ẹyetop ‘akwa dragon, kpa akani urụkikọt’ oro ẹsịn ke editụn̄ọ ukpe. Enye edisịne do ke isua 1,000 emi Jesus edikarade ke Obio Ubọn̄ Abasi.—Ediyarade 20:1, 2.

Nso iditịbe ke isọn̄ emi edide ebietidụn̄ nnyịn ini oro? Mmanie ẹdidụn̄ ke isọn̄, ndien uwem editie didie? Jesus ke idem esie ama ọbọrọ mbụme emi. Ke ini enye ọkọnọde uwụtn̄kpọ erọn̄ ye ebot, enye ama owụt nte n̄kpọ editiede ke ini iso ye mbon oro ẹtiede nte erọn̄, emi ẹsọn̄ọde ẹda ẹnyụn̄ ẹn̄wamde nditọete Jesus. Enye n̄ko ama etịn̄ se iditịbede inọ mbon oro ẹtiede nte ebot, oro edi mbon oro mîn̄wamke nditọete Jesus. Enye ọkọdọhọ ete: “Ẹyesịbe mmọ [mme ebot] emi ẹfep ke nsinsi, edi ẹyenọ ndinen owo [mme erọn̄] nsinsi uwem.”—Matthew 25:46.

Ikọ Jesus emi anam se enye eketịn̄de ye abiatibet emi eketienede enye ọkọn̄ọ ke eto etịm an̄wan̄a nnyịn. Jesus ikọdọhọke ete oro ke enye editiene imọ ikara ke Obio Ubọn̄ heaven, nte enye ọkọdọhọde mme apostle emi ẹkesọn̄ọde ẹda ye enye. Utu ke oro, enye ọkọdọhọ owo n̄wo  emi akakabarede esịt ete: “Ke akpanikọ ke ndọhọ fi mfịn emi, Afo oyodu ye ami ke Paradise.” (Luke 23:43) Emi ama anam ete oro odori enyịn ndidu ke Paradise emi edide ata ediye itie emi ẹtọde ndiye flawa ẹyọhọ, ndiye n̄kpọ en̄wen ẹnyụn̄ ẹdude. Mbon oro ẹbietde erọn̄ n̄ko mfịn, emi ẹdinyụn̄ ẹnọde “nsinsi uwem,” ẹyetiene ẹdu ke Paradise oro.

Se Jesus ọkọn̄wọn̄ọde emi ekem ye se apostle John eketịn̄de aban̄a uwem ke isọn̄ ke ini iso. Enye ọkọdọhọ ete: “Ebietidụn̄ Abasi omodu ye owo, enye oyonyụn̄ odụn̄ ye mmọ, ndien mmọ ẹyedi ikọt esie. Abasi ke idemesie oyonyụn̄ odu ye mmọ. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:3, 4.

Ẹyenam abiatibet oro eset man enye ekeme ndidu ke Paradise oro. Edi idịghe enye ikpọn̄ ke ẹdinam eset. Se Jesus eketịn̄de owụt ke ẹyetiene ẹnam mbon en̄wen ẹset. Enye ọkọdọhọ ete: “Ini ke edi eke kpukpru mme andidu ke udi editi ẹdikopde enye uyo ẹwọn̄ọ ẹdi, mbon oro ẹkenamde se ifọnde ẹyeset ke n̄kpa ẹdụk uwem, mbon oro ẹkenamde se idiọkde ẹyeset ke n̄kpa ẹdụk ikpe.”—John 5:28, 29.

Nso ke mme apostle emi ẹkesọn̄ọde ẹda ye Jesus ye owo ifan̄ eken emi ẹdidude ye Jesus ke heaven ẹdinam? Bible ọdọhọ ke “mmọ ẹyedi mme oku Abasi ye Christ, ẹyenyụn̄ ẹkara nte ndidem ye enye ke isua tọsịn kiet.” (Ediyarade 20:6) Mbon emi ẹditienede Christ ikara mi ẹma ẹdodu ke isọn̄. Ntem mmọ ẹyediọn̄ọ nte ẹdikarade mme owo ke isọn̄ emi, ẹyenyụn̄ ẹtua mmọ mbọm.—Ediyarade 5:10.

Jesus ayanam mme owo mi ke isọn̄ ẹbọ ufọn uwa ufak oro enye akawade onyụn̄ osio mmọ ke ufụn idiọkn̄kpọ oro mmọ ẹkedade-da ẹmana. Enye ye mbon emi ẹditienede enye ikara ẹyenam mme owo ke isọn̄ ẹfọn ẹma. Ini oro ndien ke mme owo ẹdidu utọ uwem emi Abasi okoyomde Adam ye Eve ẹdu ke ini enye okobotde mmọ, onyụn̄ ọdọhọ mmọ ẹwak ẹnyụn̄ ẹyọhọ isọn̄. N̄kpa emi mme owo ẹkpade ke ntak idiọkn̄kpọ Adam ididụhe aba n̄ko!

Ini oro Jesus ayanam kpukpru se Jehovah ọdọn̄de enye. Ke utịt Tọsịn Isua Ukara oro, Jesus ayayak Obio Ubọn̄ ye ubonowo oro ẹnamde ọfọn ama ọnọ Ete esie. Apostle Paul etịn̄ nte n̄kpọ editiede ke Jesus ama okosụhọde idem anam emi ete: “Ke ẹma ẹkeyak kpukpru n̄kpọ ẹsịn enye ke idak, adan̄aoro Eyen n̄ko oyosụk idem ọnọ Enye emi akadade kpukpru n̄kpọ esịn enye ke idak, man Abasi ekpedi kpukpru n̄kpọ ọnọ kpukpru owo.”—1 Corinth 15:28.

Imokụt mi ke Jesus edi ata akpan owo emi Jehovah adade anam kpukpru se enye aduakde. Ndien nte enye osụk akade iso anam uduak Abasi ke nsinsi, enye ayanam se enye eketịn̄de aban̄a idemesie ete: “Ami ndi usụn̄ ye akpanikọ ye uwem.”—John 14:6.