Ngke e tia naba ngkekei Iesu ni bwabetitoaki ao e a kaitaraaki iroun te tia kairiribai are kakorakoraa ni kabwakaa imwain naba moanakin ana mwakuri ni minita. Eng, e okioki te Riaboro ni kataia ni kairaraanga Iesu. Imwina riki ao e taku Iesu ibukin teuane buakaka anne: “E a nakomai te tia tautaekania kaain te aonnaba, ao akea mwaakana i aou.”​—Ioane 14:30.

E a kaman nora te bwai ae e na riki te abotoro Ioane n te miitara ibukin “te rakon are korakora, are te naeta nikawai, are arana te Riaboro ao Tatan.” E na karenakoaki mai karawa te tia kairiribai nakoia aomata ane iowawa anne “ao e a korakora unna ngkai e ataia bwa e a kimototo ana tai.” (Te Kaotioti 12:9, 12) Ngaia are iai bukina ae raoiroi ngkai a kakoauaa Kristian bwa a a maeka n te tai ae “e a kimototo” ao e nang waekoa “te rakon are te naeta nikawai,” ni karenakoaki n te kinono ao e na tiku iai i nanon 1,000 te ririki n te tai are e a kairiri iai Iesu n ana Tautaeka n Uea te Atua.​—Te Kaotioti 20:1, 2.

Tera ae e na riki n te aonnaba ae mwengara n te tai anne? Antai ae e na maeka ikai, ao tera aron te maiu iai? Bon Iesu ae e kaekaa anne. E kaotia n ana kaikonaki ae taekaia tiibu ma kooti bwa tera aroia aomata aika raoiroi ake ai aroia tiibu nakon taai aika a na roko, ake a kaai ni mwakuri ma tarin Iesu ao ni karaoa ae raoiroi nakoia. E kamataataa naba bwa tera ae e na riki nakoia te koraki ake a karaoa ae kaitaraan anne nakon taai aika imwaia, ake te koraki ae ai aroia kooti. E taku Iesu: “A na nako te koraki aei [kooti] nakon te mate ae akea tokina ma naake a raoiroi [tiibu] a na nakon te maiu are aki toki.”​—Mataio 25:46.

E buokira aei bwa ti na ota n ana taeka Iesu nakon te kamwarua are i aon te kai are mena i rarikina. E aki anga Iesu te kaniwanga nakon teuanne are e beritanaki nakoia ana abotoro aika kakaonimaki, ae kaainakin te Tautaeka n Uea ae bwaini karawa. Ma e berita Iesu ni kangai nakon te tia karaoa ae buakaka are e raira nanona: “E koaua ae I tuangko n te bong aei, ko na mena ma ngai n te Bwaretaiti.” (Ruka 23:43) Mangaia are e a reke iroun teuanne kantaningaan te maiu n te Bwaretaiti, ae te tabo ni kamaangang ae tikauarerei, ke te onnaroka ae tamaroa. E teretere bwa a na mena naba n te Bwaretaiti te koraki aika kakoauaaki ni boong aikai bwa ai aroia tiibu ao ake a karekea “te maiu are aki toki.”

E irekereke aei ma ana kabwarabwara te abotoro Ioane are e taekinna ni kaineti ma bwaai ake a na riki n te aonnaba. E taku: “E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”​—Te Kaotioti 21:3, 4.

E riai ni kautaki mai buakoia maate te kamwarua anne bwa e aonga n nora kakukurein te maiu n te Bwaretaiti. Ao tiaki tii ngaia ae e na nora aron te mangauti. E kamataataa anne Iesu ngke e kangai: “E na roko te tai are a na bane iai n ongo bwanaana aomata ake a mena i nanon taian ruanimate ao a na otinako, te koraki ake a karaoi baika raraoi nakon te mangauti are te maiu, ao te koraki ake a kakaraoi baika rangi ni buakaka nakon te mangauti are te kabuakakaaki.”​—Ioane 5:28, 29.

Ma tera aroia abotoro ake a kakaonimaki ao ake tabemwaang riki ake e tianaki mwaitiia ake a na mena ma Iesu i karawa? E taekinaki ae kangai n te Baibara: “A na riki bwa ana ibonga te Atua ao te Kristo, ao a na tautaeka ma ngaia bwa ueea i nanon ririki ake 1,000.” (Te Kaotioti 20:6) Boni mwaane ao aine aika kaain te aonnaba te koraki aikai ake a na raona Kristo n tautaeka. Ngaia are a na bon tautaekania kaain te aonnaba mai karawa ma te nanoanga ao te atataiaomata.​—Te Kaotioti 5:10.

E na kabongana ana karea ni kaboomwi Iesu nakoia aomata i aon te aba ao n uotaanako mairouia te rekenikai are e ituia ae reke man te bure. A na kautaki aomata aika kakaonimaki nakon te kororaoi iroun Iesu ma raona n tautaeka. Eng, a nang nora kakimwareirein te maiu aomata are bon ana moani kantaninga te Atua ibukia, ngke e tuanga Atam ma Ewa bwa a na kabatiaia natiia ao ni kaona te aonnaba. E nang akea naba te mate are reke man ana bure Atam!

Mangaia are e na katiai raoi bwaai ni kabane Iesu ake e tuangaki iroun Iehova. E nang anga Iesu taekan te Tautaeka n Uea ao utu n aomata aika kororaoi nakon Tamana n tokin ana Ririki n Tautaeka are Tenga n Ririki. E korea ae kangai te abotoro Bauro ni kaineti ma ana mwakuri ae tamaroa Iesu are kaota iai te nanorinano: “Ngkana a a tia ni kaakaki i aana bwaai ni kabane, ao e na kairia i bon irouna te Nati bwa e na aantaeka iroun Teuare kaaki bwaai ni kabane i aan te Nati, bwa e aonga n riki te Atua bwa bwaninin bwaai ni kabane nakoia aomata nako.”​—1 I-Korinto 15:28.

E teretere bwa e na teimatoa Iesu ni kakaraoa tabena ae kakawaki ni kaineti ma kakororaoan ana kantaninga te Atua ma neboakina. Ao ngkai a nang teimatoa ni kaotiotaki kantaninga akanne n aki toki, e nangi boni maiuakina raoi kabwarabwaraan taekana are e anga ae kangai: “Boni ngai te kawai ao te koaua ao te maiu.”​—Ioane 14:6.