Nọ Jesu ọ nwane họ-ame no, ọ rẹriẹ ovao dhe ọwegrẹ jọ nọ ọ jẹ gwọlọ rọ edhere kpobi whaha iẹe iruo odibọgba riẹ na. Ẹdhọ ọ ginẹ dawo Jesu unuẹse buobu. Uwhremu na, Jesu ọ ta kpahe ọwegrẹ omuomu yena nọ: “Osu akpọ na ọ be nyaze, yọ ọ sae kpọ omẹ hẹ.”—Jọn 14:30.

Jọn ukọ na ọ jọ eruẹaruẹ ruẹ oware nọ o te via kẹ ‘araomuomu idudu ologbo na, araomuomu anwae na, ọnọ a re se Ẹdhọ gbe Setan na.’ A ti gele ọwegrẹ ahwo-akpọ yena no odhiwu ziọ otọakpọ, ọnọ o wo “ofu ọgaga keme ọ riẹ nọ omoke kakao o wo.” (Eviavia 12:9, 12) Ileleikristi a vuhumu nọ a be rria etoke “omoke kakao” yena gbe nọ kẹle na a te kare “araomuomu idudu ologbo na” fihọ ọgọdọ odidi evaọ ikpe odu ọvo (1,000), yọ ọ te gbẹ sai kpokpo ahwo ho evaọ etoke ikpe yena nọ Jesu o ti su evaọ Uvie Ọghẹnẹ na.—Eviavia 20:1, 2.

Evaọ etoke yena, eme ọ te via evaọ otọakpọ na? Amono a te rria akpọ na, kọ ẹvẹ eware e te jọ kẹ ae? Ẹme nọ Jesu ọ ta o kuyo enọ yena. Evaọ ọtadhesẹ riẹ orọ igodẹ avọ ewe na, ọ fodẹ ẹruore nọ o rrọ kẹ ahwo-akpọ nọ i kiẹrẹe nọ e wọhọ igodẹ, enọ i bi yoẹme je ru ewoma kẹ inievo Jesu. Ọ tẹ jẹ ta kpahe oware nọ o te via kẹ enọ i bi yoẹme he nọ e wọhọ ewe. Jesu ọ ta nọ: “Enana [koyehọ ewe na] a re ti kpohọ ọraha ebẹdẹ bẹdẹ, rekọ ikiẹrẹe na [koyehọ igodẹ na] a re ti wo uzuazọ ebẹdẹ bẹdẹ.”—Matiu 25:46.

Onana u fiobọhọ kẹ omai wo otoriẹ ẹme nọ Jesu ọ ta kẹ ogbulegbu nọ a kare fihọ abotọ riẹ na. Ẹruore nọ Jesu ọ kẹ ọzae nana u wo ohẹriẹ no onọ ọ ya eyaa riẹ kẹ ikọ riẹ, inọ a ti lele iei su evaọ obọ odhiwu. Jesu ọ ya eyaa kẹ orumuomu nana nọ o kurẹriẹ na nọ: “Uzẹme mẹ be ta  kẹ owhẹ nẹnẹ na, who ti lele omẹ jọ Aparadase.” (Luk 23:43) Fikiere, ọzae nana o wo ẹruore nọ ọ te rọ rria Aparadase, oria nọ o te jọ owowoma. Onana u dhesẹ nọ enọ e wọhọ igodẹ evaọ enẹna nọ i ti wo “uzuazọ ebẹdẹ bẹdẹ,” a te jọ Aparadase yena re.

Onana o rọwokugbe ẹme nọ Jọn ukọ na ọ ta ro dhesẹ epanọ akpọ na ọ te jọ evaọ oke yena. Ọ ta nọ: “Uwou Ọghẹnẹ o te jọ udevie ahwo-akpọ, ọ te rria kugbe ae, yọ a te jọ ahwo riẹ. Ọghẹnẹ omariẹ ọ te jọ kugbe ae. Yọ o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no.”—Eviavia 21:3, 4.

Re ogbulegbu yena ọ sai wo uzuazọ evaọ Aparadase, a rẹ kpare iẹe no uwhu ze. Yọ orọnikọ ọye ọvo a te kpare ze he. Jesu o ru oyena vẹ nọ ọ ta nọ: “Oke o be tha nọ enọ e rrọ iki ekareghẹhọ kpobi a ti ro yo urru riẹ a vẹ te nya via, enọ i ru eware iwoma a ve ti wo ẹkparomatha uzuazọ, enọ i ru eware iyoma kọ ẹkparomatha ẹdhoguo obrukpe.”—Jọn 5:28, 29.

Kọ ẹvẹ kpahe ikọ Jesu gbe umutho ahwo nọ a te jọ kugbe Jesu evaọ obọ odhiwu na? Ebaibol na ọ ta nọ: “A te jọ izerẹ kẹ Ọghẹnẹ gbe Kristi, yọ a te jọ ivie nọ i ti lele iei su evaọ odu-ikpe (1,000).” (Eviavia 20:6) Otu nana nọ o ti lele Kristi su na yọ ezae gbe eyae nọ e jọ otọakpọ na vẹre. Fikiere, okenọ a ti su na, a ti dhesẹ ohrọ gbe ọdawẹ kẹ ahwo-akpọ.—Eviavia 5:10.

Jesu ọ te rọ ẹkwoma idhe ẹtanigbo na si ahwo-akpọ no otọ uye-oruẹ nọ uzioraha nọ a reuku riẹ na o wha ze. Ọyomariẹ avọ ibe isu riẹ a ti fiobọhọ kẹ ahwo-akpọ zihe ruọ ahwo ọgbagba. Ahwo-akpọ a vẹ te reawere oghẹrẹ uzuazọ nọ Ọghẹnẹ ọ gwọlọ nọ a rria okenọ ọ vuẹ Adamu avọ Ivi nọ a yẹ emọ vọ akpọ na. Makọ uwhu nọ uzioraha Adamu o wha ze na o gbẹ te jọ họ!

Evaọ oke yena yọ Jesu o ru eware kpobi nọ Jihova ọ vuẹ riẹ nọ o ru no. Nọ Esuo Odu-Ikpe Jesu na o te kuhọ no, Jesu ọ vẹ te rehọ Uvie na avọ ahwo-akpọ nọ a gba no na kẹ Ọsẹ riẹ. Pọl o kere kpahe uruemu omaurokpotọ nana nọ Jesu o ti dhesẹ na nọ: “Nọ a te fi eware kpobi họ otọ riẹ no, Ọmọ na omariẹ o ti fi omariẹ họ otọ Ọnọ o fi eware kpobi họ otọ riẹ na, re Ọghẹnẹ ọ ruẹse jọ eware kpobi kẹ ohwo kpobi.”—1 Ahwo Kọrint 15:28.

O rrọ vevẹ inọ Jesu o wo obọ ulogbo evaọ erugba ẹjiroro Ọghẹnẹ. Nọ ẹjiroro yena o bi rugba no ebẹdẹ rite ebẹdẹ na, Jesu ọ te jọ oghẹrẹ ohwo nọ o dhesẹ omariẹ fihọ na dẹẹ inọ: “Mẹ họ edhere na gbe uzẹme na gbe uzuazọ na.”—Jọn 14:6.