Patɩɩmɩyɩsɩ Yesu lɩm nɛ pɩtɛ nɛ ɛtɩpaɣzɩtɩ ɛ-tʋmɩyɛ lɛ, koyindu nɔɔyʋ wolo nɛ ɛtakɩ-ɩ siŋŋ. Koyindu ɛnʋ lɛ Eleeu. Ɛtakɩ Yesu tam sakɩyɛ. Pʋwayɩ Yesu yɔɔdɩ kɩdɛkɛdʋ ɛnʋ ɛ-tɔm se: “Ɛjaɖɛ yɔɔ cɩnɛ ñʋʋdʋ ɖiɣni kɔm, pɩtɛ lɛ, ɛfɛyɩnɩ nɔɔ nakɛyɛ mɔ-yɔɔ.”—Yohanɛɛsɩ 14:30.

Apostoloo Yohanɛɛsɩ kaana natʋ natʋyʋ taa mbʋ pɩɖaŋ ‘ɖʋmanʋʋ sɔsɔʋ, ɖooo lɔŋ taa ɖʋm, Eleeu nɛ Sataŋ’ yɔ. Ɛyaa kpeekpe koyindu sɔsɔ ɛnɛ, pakaɣ-ɩ ɖɔɔnʋʋ ɛsɔdaa nɛ etii tɛtʋ yɔɔ, nɛ ɛ-pana kpawa, mbʋ pʋyɔɔ yɔ, “ɛsɩm mbʋ se pakalɩ ɛ-kɩyakɩŋ.” (Natʋ 12:9, 12) Krɩstʋ ñɩma ɛɛpɩtɩɣ kaaʋ se ɛwɛ alɩwaatʋ pazɩ, ndʋ tɩkazɩ-ɩ yɔ tɩ-taa, nɛ pɩkazɩ pazɩ lɛ, pakaɣ “ɖʋmanʋʋ, ɖooo lɔŋ taa ɖʋm” ɛnʋ lɔʋ pɔʋ sɔsɔʋ taa nɛ ɛɛtasɩɣ ɖoŋ nɩɩyɩ wɛnʋʋ pɩnzɩ 1000. Pɩnzɩ nzɩ sɩ-taa lɛ, Yesu kaɣ wobu e-kewiyitu tɔɔʋ yɔɔ Ɛsɔ Kewiyaɣ taa.—Natʋ 20:1, 2.

Alɩwaatʋ ndʋ tɩ-taa lɛ, ɛbɛ kaɣ labʋ tɛtʋ ndʋ tɩkɛ ɛyaa ɖɩɣa yɔ, tɩ-yɔɔ? Mba kaɣ caɣʋ tɛtʋ yɔɔ nɛ wɛtʋ ndʋ tɩ-taa pakaɣ wɛʋ? Yesu cosi tɔm ndʋ tɩ-yɔɔ. Heŋ nɛ pʋŋ eduuye taa lɛ, Yesu wɩlɩ kpayɩ kpayɩ mbʋ pɩkaɣ tɛmnʋʋ ɛyaa siɣsiɣ ñɩma mba pɛwɛ ɛzɩ heŋ yɔ, nɛ paɖʋʋ nesi nɛ palakɩ kɩbandʋ Yesu koobiya yɔ. Ɛyɔɔdɩ ɖɔɖɔ mbʋ pɩɖaŋ mba pɛwɛ ɛzɩ pʋŋ, nɛ paalakɩ kɩbandʋ Yesu koobiya yɔ. “Panɛ yɔ [pʋŋ], powoki tam tam siziŋ nɩʋ taa, piyele kɩbama yɔ [heŋ], powoki tam tam koboyaɣ taa.”—Maatiyee 25:46.

Eduuye ɖɩnɛ, ɖɩsɩnɩ-ɖʋ nɛ ɖɩnɩɩ tɔm ndʋ Yesu kaaheyi mɩlʋ weyi paakamɩ-ɩ ɛ-cɔlɔ yɔ, tɩ-taa. Yesu tiheyi abalʋ ɛnʋ se ɛ nɛ ɩ pakaɣ kewiyitu tɔɔʋ ɛsɔdaa, ɛzɩ eeheyuu ɛ-apostoloowaa siɣsiɣ ñɩma yɔ. Ɛlɛ ɛzɩma kɩwɛɛkɩm laɖʋ ɛnɛ ekpiɖi ɛ-kɩwɛɛkɩm yɔɔ yɔ,  pʋyɔɔ Yesu heyi-i se: “Toovenim taa, sɔnɔ meheyiɣ-ŋ se: ‘Ma nɛ-ŋ ɖɩkaɣ wɛʋ Paradisuu taa.’” (Luka 23:43, NW) Pɩwɩlɩɣ se Yesu ha abalʋ ɛnɛ lidaʋ se ɛkaɣ caɣʋ Paradisuu ŋgʋ kɩkɛ kaɖaɣ kɩbaŋa yɔ, kɩ-taa tɛtʋ yɔɔ. Ye mbʋ, sɔnɔ ɖɔɖɔ, mba pɛwɛ ɛzɩ heŋ yɔ, Paradisuu ŋgʋ kɩ-taa pakaɣ hiɣu “tam tam koboyaɣ.”

Lidaʋ kʋnɛ, kɩlabɩ nɔɔ kʋɖʋmaɣ nɛ wɛtʋ ndʋ apostoloo Yohanɛɛsɩ yɔɔdaa se tɩkaɣ wɛʋ tɛtʋ yɔɔ cee wayɩ yɔ. Ɛyɔɔdaa se: “Ɛsɔ ɖɩjaɣyɛ yɔ ɛyaa hɛkʋ taa; ɛ nɛ wɛ pakaɣnɩ wɛʋ nɛ pɛkɛ ε-samaɣ nɛ ɛnʋ ‘Ɛsɔ nɛ wɛ’ ɛkaɣ kɛʋ pɛ-Ɛsɔ. Ɛkaɣ hɩzʋʋ pɛ-ɛzɩdaa ɛzɩtɛɣlɩm kpeekpe, nɛ sɩm ɛɛtasɩɣ wɛʋ; nɛ paatasɩɣ wiu, paatasɩɣ kubusi mabʋ, kʋñɔŋ ɛɛtasɩɣ wɛʋ, mbʋ yɔ ɛjaɖɛ kɩbɩnɖɛ ɖɛwa.”—Natʋ 21:3, 4.

Pʋcɔ nɛ mɩlʋ ɛnʋ, ɛpɩzɩ nɛ ɛcaɣ wezuu Paradisuu taa lɛ, pɩpɔzʋʋ se pefezi-i. Ɛlɛ pɩtɩkɛ e-ɖeke pakaɣ fezuu. Yesu yɔɔdɩ kpayɩ se: “Ñɩɣyʋʋ talɩɣ nɛ mba pɛwɛ pɩlaŋ taa yɔ, Ɛyʋ Pɩyalʋ kaɣ pe-kpeekpe yaʋ, nɛ mba palabɩ kɩbandʋ yɔ, pefeŋ se pehiɣ wezuu, mba palabɩ kɩdɛkɛdɩm yɔ, pefeŋ se pɔ-tɔm ɛsɩ.”—Yohanɛɛsɩ 5:28, 29.

Ɛlɛ ɛbɛ pɩtɛŋnɩ apostoloowaa nɛ mba pa nɛ Yesu pakaɣ wɛʋ ɛsɔdaa yɔ? Bibl yɔɔdʋʋ se: “Pakaɣ kɛʋ Ɛsɔ nɛ Krɩstʋ pa-layaa, weyi pa nɛ ɩ pakaɣ tɔɔʋ kewiyaɣ pɩnzɩ ɛgbɔʋ (1000) yɔ.” (Natʋ 20:6) Halaa nɛ abalaa mba paacaɣ wezuu tɛtʋ yɔɔ yɔ, pa-taa nabɛyɛ kaɣnɩ kpaʋ ɛsɔdaa nɛ pa nɛ Krɩstʋ pɔtɔɔ kewiyitu. Ye mbʋ, pɩtʋʋ fɛyɩ se pakaɣ kɛʋ awiya mba panɩɣ tɔm taa nɛ panaɣ lalaa pʋtɔdɩyɛ yɔ.—Natʋ 5:10.

Yesu kaɣ yebu nɛ ɛ-kɩlaʋ wɛɛnɩ ɖoŋ ɛyaa kpeekpe yɔɔ tɛtʋ yɔɔ nɛ kɩdɛkɛdɩm yomiye nɖɩ ɖɩ-taa paawɛɛ yɔ, ɖɩsɩɩ tɩnaɣ. Ɛ nɛ mba pakaɣ kewiyitu ndʋ tɔɔʋ yɔ, pakaɣ yebu nɛ ɛyaa kpeekpe ɖaɣnɩ talʋʋ pilim. Alɩwaatʋ ndʋ tɩ-taa lɛ, ɛyaa kaɣ nɩʋ wezuu leleŋ ɛzɩ Ɛsɔ kaaɖʋʋ ɖooo kiɖe tɛɛ, alɩwaatʋ ndʋ eheyi Aɖam nɛ Ɛva se palʋlɩ nɛ pisu tɛtʋ kpeekpe yɔɔ yɔ. Halɩ sɩm mbʋ pɩlɩnɩ Aɖam kɩwɛɛkɩm cɔlɔ yɔ, pɩɩtasɩɣ wɛʋ.

Pʋbʋ lɛ, Yesu tɛzɩ labʋ tʋmɩyɛ nɖɩ Ɛsɔ kaaɖʋ-ɩ yɔ. Pɩnzɩ kudoku ɖɩtɛnɖɛ taa lɛ, Yesu pɩsɩɣnɩ Kewiyaɣ nɛ ɛyaa samaɣ ŋga katalɩ pilim yɔ, nɛ ɛɖʋzɩ ɛ-Caa nesi tɛɛ. Yesu tɩ luzuu kɩɖaʋ kɩbaŋʋ kʋnɛ, kɩ-tɔm apostoloo Pɔɔlɩ yɔɔdaɣ alɩwaatʋ ndʋ ɛmawa se: “Mbʋ lɛ, pɩtɩŋa payɩ pɩñaŋɩ-ɩ lɛ, Pɩyalʋ ɛnʋ ɛ-maɣmaɣ ɛñaŋ weyi ɛɖʋzɩ pɩtɩŋa payɩ e-nesi tɛɛ yɔ, se Ɛsɔ ɛkɛ pɩtɩŋa ɛyaa kpeekpe taa.”—1 Kɔrɛntɩ 15:28.

Tobi lɛ, Yesu yɔɔ Ɛsɔ kaɣ tɩŋnʋʋ nɛ mbʋ ɛɛɖʋ ɖooo kiɖe tɛɛ yɔ, pɩkɔɔ pɩ-taa. Wazasɩ sakɩyɛ nzɩ sɩkaɣ kɔm yɔ, sɩkaɣ wɩlʋʋ kpayɩ kpayɩ se ‘Yesu kɛnɩ nʋmɔʋ, toovenim nɛ wezuu.’—Yohanɛɛsɩ 14:6.