Kahinda kanini thutha wa Jesu kũbatithio, nĩ aacemanirie na thũ yehotorete gũthũkia wĩkindĩru wake o na atambĩrĩirie ũtungata wake. Thũ ĩyo nĩ Mũcukani na nĩ aageririe Jesu maita maingĩ. Thutha-inĩ Jesu oigire ũũ igũrũ rĩgiĩ ũcio mũru: “Mũnene wa thĩ ĩno nĩ aroka, na ũcio ndarĩ na hinya igũrũ rĩakwa.”​—Johana 14:30.

Mũtũmwo Johana nĩ onirio kĩoneki kĩgiĩ ũrĩa kũngĩgathiĩ harĩ ‘ndamathia ĩyo, nĩyo nyoka ĩrĩa ya tene, o we wĩtagwo Mũcukani na Shaitani.’ Thũ ĩyo nene ya andũ nĩ ĩngĩkaingatwo igũrũ, ‘ĩrĩ na marũrũ manene, ĩkĩmenyaga atĩ ĩrĩ na ihinda inini.’ (Kũguũrĩrio 12:​9, 12) Akristiano marĩ na gĩtũmi kĩega gĩa gwĩtĩkia atĩ maratũũra ‘ihinda rĩu inini’ na atĩ ica ikuhĩ ‘ndamathia ĩyo, nyoka ĩrĩa ya tene,’ nĩ ĩkũhingĩrũo irima rĩtarĩ gĩturi na yagithio hinya mĩaka 1,000 rĩrĩa Jesu agaathana Ũthamaki-inĩ wa Ngai.​—Kũguũrĩrio 20:​1, 2.

Hihi gũgathiĩ atĩa harĩ thĩ ihinda-inĩ rĩu? Nĩa magatũũra thĩinĩ wayo, na gũgaakorũo kũhaana atĩa? Jesu we mwene nĩ aaheanire macokio ma ciũria icio. Thĩinĩ wa ngerekano ya ng’ondu na mbũri, nĩ onanirie ũrĩa gũgathiĩ harĩ andũ athingu arĩa mahaananĩtio na ng’ondu, arĩa manyitanagĩra na ariũ a Ithe na Jesu na makameka wega. Ningĩ nĩ onanirie ũrĩa gũgathiĩ harĩ arĩa matekaga ũguo, arĩa mahaananĩtio na mbũri. Oigire ũũ: “Nao [arĩa matariĩ ta mbũri] nĩ magaatuĩrũo gĩkuũ gĩa tene na tene, no arĩa athingu [matariĩ ta ng’ondu] maheo muoyo wa tene na tene.”​—Mathayo 25:46.

Ũndũ ũcio nĩ ũtũteithagia gũtaũkĩrũo nĩ ciugo iria Jesu eerire mũici ũrĩa maacurĩtio hamwe nake. Jesu ndeerĩire mũndũ ũcio kĩĩranĩro ta kĩrĩa eerĩire atũmwo ake ehokeku, gĩa gũgakorũo Ũthamaki-inĩ wa igũrũ. Handũ ha ũguo, eerire mũici ũcio werirĩte ũũ: “Ũmũthĩ ndakwĩra na ma  atĩrĩ, nĩ ũgaakorũo hamwe na niĩ thĩinĩ wa Paradiso.” (Luka 23:43) Kwoguo mũndũ ũcio aagĩire kĩĩrĩgĩrĩro gĩa gũgatũũra thĩinĩ wa Paradiso ĩrĩa ĩgaakorũo ĩhaana mũgũnda mũthaka. Arĩa ũmũthĩ monanagia atĩ matariĩ ta ng’ondu, arĩa makaheo “muoyo wa tene na tene” nĩ magaakorũo thĩinĩ wa Paradiso ĩyo.

Ũndũ ũcio nĩ ũratwarana na ũrĩa mũtũmwo Johana ataarĩirie wĩgiĩ ũrĩa thĩ ĩkaahana hĩndĩ ĩyo. Oigire ũũ: “Hema ya Ngai ĩrĩ hamwe na andũ, nake nĩ egũikarania nao, nao matuĩke andũ ake. Nake Ngai we mwene arĩkoragwo hamwe nao. Na nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.”​—Kũguũrĩrio 21:​3, 4.

No mũhaka mũici ũcio wacuurĩtio hamwe na Jesu akaariũkio nĩgetha agaakenera ũtũũro thĩinĩ wa Paradiso. Na towe wiki ũkaariũkio. Jesu nĩ onanirie ũguo rĩrĩa oigire: “Ihinda nĩ rĩroka, rĩrĩa arĩa othe marĩ thĩinĩ wa mbĩrĩra makaigua mũgambo wake na moime kuo, arĩa meekaga maũndũ mega mariũkio maheo muoyo, nao arĩa meekaga maũndũ moru mariũkio macirithio.”​—Johana 5:​28, 29.

Ĩ nao atũmwo arĩa maarĩ ehokeku o hamwe na andũ anini arĩa magaakorũo na Jesu igũrũ? Bibilia yugaga ũũ: “Magaatuĩka athĩnjĩri a Ngai na a Kristo, na magaathana marĩ athamaki hamwe nake ihinda rĩa mĩaka ngiri ĩmwe.” (Kũguũrĩrio 20:6) Acio magaathana hamwe na Kristo, magaakorũo marĩ athuri na atumia manatũũra gũkũ thĩ. Kwoguo nĩ makaarũmbũiya arĩa magaakorũo thĩinĩ wa thĩ marĩ na tha na ũcayanĩri.​—Kũguũrĩrio 5:10.

Jesu nĩ akaahũthĩra igongona rĩake rĩa ũkũũri kwehereria arĩa magatũũra thĩinĩ wa thĩ mehia marĩa maagaire. We na arĩa magaathana hamwe nake nĩ magaacokeria andũ arĩa ehokeku ũkinyanĩru. Hĩndĩ ĩyo andũ nĩ magaakenera ũtũũro ũrĩa Ngai aatanyĩte makorũo naguo rĩrĩa eerire Adamu na Hawa maciarane maiyũrie thĩ. O na gĩkuũ kĩrĩa kĩoimanire na mehia ma Adamu nĩ gĩkeherio!

Na njĩra ĩyo Jesu nĩ agaakorũo ahingĩtie maũndũ marĩa mothe Jehova aamwĩrĩte. Jesu arĩkia Wathani wake wa Mĩaka Ngiri, nĩ akaanengera Ithe Ũthamaki o hamwe na andũ marĩ akinyanĩru. Ũhoro-inĩ wĩgiĩ gĩĩko kĩu kĩa magegania kĩa wĩnyihia wa Jesu, mũtũmwo Paulo aandĩkire ũũ: “Rĩrĩa indo ciothe igaakorũo irĩ rungu rwake, hĩndĩ ĩyo Mũriũ we mwene o nake nĩ akeiga rungu rwa Ũrĩa waigire indo ciothe rungu rwake, nĩguo Ngai atuĩke maũndũ mothe harĩ andũ othe.”​—1 Akorintho 15:28.

Hatarĩ nganja Jesu nĩ akoragwo na itemi rĩa bata harĩ kũhingia mĩoroto ya Ngai. Na o ũrĩa mĩoroto ĩyo ĩgathiĩ ĩkĩhingaga nginya tene na tene, nĩ akonania ũũma wa ciugo ici oigire igũrũ rĩake mwene: “Nĩ niĩ njĩra na nĩ niĩ ũhoro ũrĩa wa ma na nĩ niĩ muoyo.”​—Johana 14:6.