139-تاراۋ
يسا جۇماق ورناتادى جانە تاپسىرىلعان ٸستى تۇگەل اياقتايدى
قورىنتتىقتارعا 1-حات 15:24—28
-
قويلار مەن سەركەلەرگە شىعارىلعان ۇكىم
-
كوپ ادام جەر بەتىندەگى جۇماقتا ٶمىر سۇرەدى
-
يسا جول، شىندىق، ٶمىر ەكەنىن دالەلدەيدى
شومىلدىرۋ راسىمىنەن وتكەننەن كەيىن كوپ ۇزاماي-اق يسا جاۋىنىڭ قارسىلىعىنا كەزىككەن بولاتىن. شايتان ونىڭ قىزمەتىن باستالماي جاتىپ توقتاتپاق بولىپ، بىرنەشە رەت سىناعان. كەيىنىرەك يسا جاۋىنا قاتىستى: «دۇنيەنىڭ بيلەۋشىسى كەلە جاتىر. الايدا ماعان ونىڭ بيلىگى جۇرمەيدى»،— دەگەن سوزدەر ايتقان (جوحان 14:30).
ەلشى جوحان اياندا «الىپ ايداھارعا، ٸبىلىس ارى شايتان دەپ اتالعان ەجەلگى جىلانمەن» نە بولاتىنىن كوردى. ادامزاتتىڭ قاس جاۋى كوكتەن قۋىلىپ، «ٶز ۋاقىتىنىڭ از قالعانىن بىلگەندىكتەن قاتتى اشۋلى» بولادى (ايان 12:9، 12). بۇگىندە ماسىحشىلەر سول «از ۋاقىت قالعان» كەزدە ٶمىر ٴسۇرىپ جاتقاندارىنا كامىل سەنەدى. سونداي-اق «الىپ ايداھار ارى ەجەلگى جىلاننىڭ» جاقىندا تۇڭعيىققا تاستالىپ، قۇداي پاتشالىعىنىڭ 1000 جىلدىق بيلىگى كەزىندە ونىڭ ارەكەتسىز كۇيدە بولاتىنىنا سەنىمدى (ايان 20:1، 2).
مىڭجىلدىڭ ىشىندە جەر بەتىندە قانداي جايتتار ورىن الادى؟ سول كەزدە كىمدەر ٶمىر سۇرەدى؟ بۇعان يسانىڭ ٶزى قويلار مەن سەركەلەر تۋرالى استارلى اڭگىمەسىندە جاۋاپ بەرىپ: «ولار [سەركەلەر] ماڭگىلىككە جويىلادى، ال ادىلدەر ماڭگىلىك ٶمىردى يەمدەنەدى»،— دەدى. دەمەك، قويلارعا تەڭەلگەن ٵدىل ادامدار يسانىڭ باۋىرلارىنا كومەكتەسىپ، ولارمەن قىزمەتتەسكەنى ٷشىن ومىرگە يە بولادى، ال قارسىلىق كورسەتكەنى ٷشىن سەركەلەرگە تەڭەلگەندەر جويىلادى (ماتاي 25:46).
بۇل بىزگە يسانىڭ باعاناعا ىلىنگەن قىلمىسكەرگە ايتقان ٴسوزىن تۇسىنۋگە كومەكتەسەدى. ايتا كەتەتىن ٴبىر جايت، يسا وعان ادال ەلشىلەرىنىڭ الاتىن سىيىن، ياعني كوكتەگى پاتشالىققا كىرۋدى ۋادە ەتكەن جوق. قىلمىسىنا وكىنگەن كىسىگە: «بۇگىن ساعان شىندىعىن ايتامىن، مەنىمەن بىرگە جۇماقتا بولاسىڭ»،— دەپ ۋادە ەتتى (لۇقا 23:43). دەمەك، ول ادام جۇماقتا، ياعني كەرەمەت باققا اينالعان جەر بەتىندە ٶمىر سۇرەدى. ولاي بولسا، قويعا تەڭەلگەن ادامدار مەن «ماڭگى ومىرگە» يە بولاتىندار دا جەر بەتىندەگى جۇماقتا ٶمىر سۇرەدى دەۋ قيسىندى.
مۇنداي تۇسىنىك ەلشى جوحان كورگەن كورىنىسپەن دە ۇيلەسەدى. ول جەر بەتىندە ورىن الاتىن جاعدايدى سۋرەتتەپ، بىلاي دەپ جازعان: «مىنە، قۇدايدىڭ تۇراعى ادامدار اراسىندا! ول سولارمەن بىرگە تۇرىپ، ولار ونىڭ حالقى بولماق. وسىلاي قۇدايدىڭ ٶزى سولارمەن بىرگە بولادى. سوندا قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى. بۇرىنعى جايتتار قۇرىپ جوق بولدى» (ايان 21:3، 4).
يسانىڭ قاسىنداعى باعاناعا ىلىنگەن قاراقشى جەر بەتىندەگى جۇماقتا ٶمىر ٴسۇرۋ ٷشىن قايتا تىرىلەدى. ومىرگە ورالاتىن جالعىز ول ەمەس. ويتكەنى يسا بىلاي دەپ اشىق ايتقان: «قابىردەگىلەردىڭ ٴبارى ونىڭ داۋسىن ەستيتىن ۋاقىت كەلە جاتىر، سوندا ولار قابىردەن شىعادى. جاقسىلىق جاساعاندار ٶمىر ٴسۇرۋ ٷشىن، ال زۇلىمدىق جاساعاندار سوتتالۋ ٷشىن تىرىلەدى» (جوحان 5:28، 29).
ادال ەلشىلەر مەن كوكتە يسانىڭ قاسىندا بولاتىن شاعىن توپ جايلى نە دەۋگە بولادى؟ ولار جايلى كيەلى كىتاپتا: «قۇداي مەن ٴماسىحتىڭ ٴدىني قىزمەتكەرلەرى بولىپ، ماسىحپەن بىرگە 1000 جىل بويى پاتشالىق ەتەدى»،— دەلىنگەن (ايان 20:6). ٴماسىحتىڭ قاسىنداعى پاتشالار جەردە ٶمىر سۇرگەن ەر جانە ايەل ادامداردان قۇرالادى. سوندىقتان ولار جەر بەتىندە ٶمىر سۇرەتىن ادامدارعا جاناشىرلىقپەن جانە تۇسىنۋشىلىكپەن بيلىك ەتەدى (ايان 5:10).
يسا قۇربان ەتكەن ٶمىرىنىڭ قۇنىن قولدانىپ، ادامزاتتى كۇنانىڭ قارعىسىنان قۇتقارادى. يسا مەن ونىڭ قاسىنداعى بيلەۋشىلەر ادال ادامداردى كەمەلدى دە ٴمىنسىز كۇيگە جەتكىزەدى. سوندا ادامزات قۇدايدىڭ و باستا، ياعني ادام اتا مەن حاۋا انانى جاراتقاندا، نيەت ەتكەن ٶمىردىڭ راقاتىن كورەدى. ادام اتانىڭ كۇناسىنىڭ سالدارىنان بولعان ٶلىم دە ٴبىرجولاتا جويىلادى!
وسىلايشا يسا ەحوبا قۇدايدىڭ وزىنە تاپسىرعان بارلىق ٸسىن جۇزەگە اسىرادى. مىڭ جىلدىق بيلىگىنىڭ سوڭىندا ول پاتشالىقتى دا، كەمەلدىلىككە جەتكىزىلگەن ادامزاتتى دا اكەسىنىڭ قولىنا تاپسىرادى. يسانىڭ كىشىپەيىلدىلىكپەن اتقارعان كەرەمەت ٸسى جايلى ەلشى پاۋىل بىلاي دەپ جازدى: «قۇداي ٶز ۇلىنا ٴبارىن باعىندىرعان سوڭ، ۇلى دا وزىنە ٴبارىن باعىندىرعان قۇدايعا باعىناتىن بولادى. وسىلايشا قۇداي بىردەن-ٴبىر بيلەۋشى بولماق» (قورىنتتىقتارعا 1-حات 15:28).
قۇدايدىڭ ۇلى نيەتىن جۇزەگە اسىرۋدا يسانىڭ ماڭىزدى قىزمەت اتقاراتىنى انىق. ۋادە ەتكەندەرىنىڭ ٴبارى ورىندالىپ، ماڭگىلىككە جالعاسىپ جاتقاندا، يسانىڭ «جول، شىندىق جانە ٶمىر — مەنمىن» دەگەن سوزدەرىنىڭ راستىعى دالەلدەنەدى (جوحان 14:6).
