Panyuma ya lubatizhilo lwa kwa Yesu, mulwanyi wakebelanga kumulengela kukankalwa kwingila mwingilo wanji saka akyangye ne ku mutendeka ne. Kya kine, uno mulwanyi waesekele Yesu pa bimye byavula bingi. Palutwe kacheche, Yesu waambile pa uno mubi amba: “Mfumu wa pano pa ntanda ubena kwiya, kabiji aye kechi uji na luusa pe amiwa ne.”—Yoano 14:30.

Mutumwa Yoano wamwene mu kimwesho bikamwekela ‘nsuñunyi mukatampe, yenka aye muloolo wa kala, utelwa’mba Diabola kabiji Satana.’ Uno mulwanyi wa bantu wakanama bamupangile mwiulu “saka azhingila bingi, mambo wayuka’mba washalatu na kakimye kacheche.” (Lumwekesho 12:9, 12) Bena Kilishitu bayuka’mba babena kwikala mu kano “kakimye kacheche” kabiji katatakatu “nsuñunyi yenka muloolo wa kala,” bakamutaye mu kalengwa kabula kupela kabiji ukekalatu nobe wafwa pa myaka 1,000 kimye Yesu kyo akalamanga mu Bufumu bwa Lesa.—Lumwekesho 20:1, 2.

Ñanyi bintu bikamweka pano pa ntanda po twikala pa kyo kya kimye? Bañanyi bakekala pano pa ntanda kabiji bintu bikekala byepi? Yesu mwine wapaine mikumbu. Mu kishimpi kyo aambile kya mikooko ne bambuzhi, waambile pa bintu byawama bikamwekela bantu baoloka baji nobe mikooko, bakwatankana na balongo ba kwa Yesu ne kwibobila byawama. Kabiji waambile ne bikamwekela bantu baji nobe bambuzhi babula kulondela ne kumvwina balongo ba kwa Yesu. Waambile’mba: “Bano [bambuzhi] bakafwa lufu lwa myaka, pakuba baoloka [mikooko] bakekala na bumi bwa myaka ne myaka”—Mateo 25:46.

Bino bishinka bitukwasha kumvwisha byambo Yesu byo aambijile yewa kapondo ye bapopele pa kichi kwipi ne aye. Yesu kechi walayile  yewa muntu kumupa mfweto yo alayile batumwa banji ba kishinka ya kwikala mu Bufumu bwa mwiulu ne. Bino, walayile uno ngubabibi walapijile amba: “Kine nakwambila lelo jino namba, ukekala ne amiwa mu Paladisa.” (Luka 23:43) Onkao mambo, uno muntu waikele na luketekelo lwa kwikala mu Paladisa, ntanda yawama bingi. Aba bonse baji nobe mikooko lelo jino nabo bakekala na “bumi bwa myaka ne myaka” mu Paladisa.

Kino kyakwatankana na byalumbulwile mutumwa Yoano bikekala bwikalo pano pa ntanda. Waambile’mba: “Tente wa Lesa uji na bantu, ne aye ukekala nabo, ne abo bakekala ke bantu banji. Ne Lesa mwine ukekala nabo. Kabiji ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—Lumwekesho 21:3, 4.

Pa kuba’mba uno kapondo akeyowe bumi mu Paladisa, wafwainwa kusangulwa. Bino kechi ukasangulwa bunke bwanji ne. Yesu walumbulwile bino kimye kyo aambile. Waambile’mba: “Kimye kibena kwiya aba bonse baji mu bilende kyo bakomvwa jiwi janji ne kufumamo, aba baubilenga byawama bakasangukila ku bumi, ne boba baubilenga byatama bakasangukila ku kije.”—Yoano 5:28, 29.

Pano kikekala byepi ku boba batumwa ba kishinka ne bakwabo bacheche bakekala ne Yesu mwiulu? Baibolo waamba’mba: “Bakekala bañanga ba Lesa ne ba kwa Kilishitu kabiji bakekala bamfumu ne kulama pamo ne aye myaka 1,000.” (Lumwekesho 20:6) Bano banabalume ne banabakazhi bakalamanga pamo ne Kilishitu bafuma pano pa ntanda. Onkao mambo, bakekala na lusa ne kulangulukilako bantu bo bakalamanga pano pa ntanda.—Lumwekesho 5:10.

Yesu ukengijisha kitapisho kyanji kya bukuzhi ku bantu pa kufumyapo bundengamambo. Aye ne bakwabo mo bakalaminanga bakakwasha bantu kwikala balumbuluka. Bantu popo bakeyowa bwikalo Lesa bo akebelenga’mba ba Adama ne Evwa bakekalenga kimye kyo ebambijile’mba semainga ne kuyuzha ntanda. Kabiji lufu lwaishileko na mambo a bundengamambo bwa kwa Adama kechi lukekalako ne.

Onkao mambo, Yesu ukapwisha mingilo yonse yo bamupele kwi Yehoba. Panyuma ya Bukalama bwa Myaka Kiumbi, Yesu ukalubula Bufumu ne bantu balumbuluka kwi ba Shanji. Pa kwamba pa kyubilo kya kwa Yesu kya kwipelula, mutumwa Paulo wanembele’mba: “Bintu byonse byo bakebikookesha munshi ya maulu anji, Mwana naye ukekookesha aye mwine kwi Lesa yenka wamukookesheshe bintu byonse pa kuba’mba, Lesa ekale bintu byonse ku bantu bonse.”—1 Kolinda 15:28.

Yesu wingila mwingilo wanema bingi mu kufikizha kyaswa muchima wa Lesa. Kabiji kino kyaswa muchima wa Lesa kibena kubiwa byo kikobiwanga myaka ne myaka, popo akafikilamo kwikala byo elumbulwile aye mwine amba: “Amiwa yami jishinda ne bukine ne bumi.” —Yoano 14:6.