Yesu pa kupwa’tu kubatyijibwa, wālwile na walwana wādi usumininwe kumuponeja akomenwe mwingilo wandi. Bine Dyabola wātompele Yesu misunsa mivule. Mafuku pa kupita’po Yesu wānena pangala pa mubi amba: “Mulopwe wa ino ntanda wiyanga, kadi kadipo pa kunkwatyila.”—Yoano 14:30.

Mutumibwa Yoano wāmwene kala byobya bitengele ‘mpumina mukatampe’wa, nyoka wa kala na kala, yewa witwa bu Dyabola ne bu Satana.’ Uno walwana na bantu wa mu meso fututu, wadi ufwaninwe kutalulwa mūlu, pano “udi na bulobo bukatampe, pa kuyuka’mba udi na kakitatyi katyetye.” (Kusokwelwa 12:9, 12) Bene Kidishitu badi na bubinga bwa kukulupidila amba badi mu kano “kakitatyi katyetye” ne amba panopano ponka “mpumina, nyoka wa kala na kala,” usa kwelwa mu lupongo mwakasapo kwingila mu bula bwa myaka 1 000, papo Yesu uludika mu Bulopwe bwa Leza.—Kusokwelwa 20:1, 2.

Le mu kyakyo kitatyi, ntanda, kīkalo kyetu ikekala namani? I bāni bakekala’mo, ne bakekala’mo na būmi bwa muswelo’ka? Yesu mwine wālondolwele kala. Mu kyelekejo kyandi kya mikōko ne bambuji, wālombwele bintu bya kumeso bitengēle bantu boloke badi pamo bwa mikōko bengidila pamo ne kukwasha banababo na Yesu. Kadi wālombwele patōka bintu bitengēle boba kebakwashapo banababo, ke boba badi pamo bwa bambuji kadi. Yesu wānenene amba: “Bano [bambuji] bakenda mu kutyibwa’ko kwa nyeke, ino boloke [mikōko] mu būmi bwa nyeke.”—Mateo 25:46.

Kino kibetukwasha twivwanije binenwa bya Yesu byaānenene kabwalāla kādi ku mutyi pabwipi nandi. Yesu kālailepo uno muntu amba ukapalwa mpalo yaālaile batumibwa bandi ba kikōkeji, ya kwikala mu Bulopwe bwa mūlu. Ino Yesu, wālaile uno nonga-bibi wēsāshile amba:  “I bine nakusapwila dyalelo dino’di amba, ukekalanga nami mu Paladisa.” (Luka 23:43) Nanshi uno muntu wātambwile kyepelo kya kwikala mu Paladisa—budimi bulumbuluke. Mungya buluji, boba badi pamo bwa mikōko dyalelo, bakenda “mu būmi bwa nyeke” bakekala nandi mu Paladisa.

Kino i kikwatañane na nshintulwilo yāletele mutumibwa Yoano ya mukekadila pano pa ntanda. Wānenene amba: “Pema wa Leza udi na bantu, ne Leza nandi ukekalanga nabo, abo nabo bakelanga bantu bandi. Kadi Leza mwine ukekalanga nabo. Kadi ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”—Kusokwelwa 21:3, 4.

Pa kusaka amba kabwalāla’wa akamone būmi mu Paladisa, ufwaninwe bidi kusangulwa mu bafwe. Kadi ke ayepo bunka ukasangulwa. Yesu wātōkeje uno mwanda paānenene amba: “Nsá īyanga, boba bonso badi mu bibundu bakevwana diwi dyandi ne kutamba bakatamba’mo, boba badi balonga biyampe ku lusangukilo lwa būmi, boba badi balongalonga bibi nabo ku lusangukilo lwa butyibi.”—Yoano 5:28, 29.

Ino le bikekala namani ku batumibwa ba kikōkeji ne bantu bakwabo batyetye bakekala na Yesu mūlu? Bible unena’mba: “Bakekala babitobo ba Leza ne ba Kidishitu, kadi bakabikalanga bulopwe pamo nandi myaka 1 000.” (Kusokwelwa 20:6) Bano bakaludika na Kidishitu i bana-balume ne bana-bakaji bādi bashikata pano pa ntanda. Nanshi pobakaludika mūlu, bakekala na lusa kadi ne kwivwana bantu badi pano pa ntanda.—Kusokwelwa 5:10.

Yesu ukengidija kitapwa kyandi kya kinkūlwa ku bantu ba pano pa ntanda ne kwibatalula mafingo a bubi bobapyene. Aye ne boba bakaludika nabo bakafikija bantu ba kikōkeji ku bubwaninine. Bine, bantu bakekala na būmi bwine bwādi bwibasakila Leza tamba ku ngalwilo paāsapwidile ba Adama ne Eva kwivudija ne kuyuja ino ntanda. Nansha ke lufu lwine lutambile ku bubi bwa Adama kelukekalanga’kopo monka!

Nanshi, Yesu ukafikidija byonso byāmunenene Yehova kulonga. Ku mfulo kwa Umbikalo wa Myaka Kanunu, Yesu ukajokejeja Shandi Bulopwe ne kisaka kyonso kya bantu babwaninine. Polo wāsonekele pangala pa kino kilongwa kya Yesu kya kutendelwa ne kya kwityepeja amba: “Ino pakatūlwa bintu byonso munshi mwandi, penepo Mwana nandi uketūla munshi mwa Yewa watūdile bintu byonso munshi mwandi, amba Leza ekale bintu byonso ku muntu ense.”—1 Kodinda 15:28.

Na bubine, Yesu wingilanga mwingilo wa kamweno mu kufikidija mpango ya kutendelwa ya Leza. Kadi ino mpango byoyendelela nyeke ne nyeke, nanshi aye ukekala nyeke monka mwaētelele aye mwine amba: “Ami ne dishinda ne bubine ne būmi.”—Yoano 14:6.