Katupa kakese panyima pa dibatijibua dia Yezu, wakatuilangana ne muluishi uvua mudisuike bua kumupangisha bua kukumbaja mudimu wende kumpala mene kua yeye kuwutuadija. Eyowa, Diabolo wakateta Yezu njila ne njila. Pashishe Yezu wakamba bua Diabolo eu ne: “mukokeshi wa buloba ebu udi ulua, yeye kena ne bukokeshi ku mutu kuanyi.”​—Yone 14:30.

Mupostolo Yone wakadianjila kumona mu tshikena kumona tshivua tshindile ‘dragon munene, nyoka wa ku tshibangidilu, udibu babikila ne: Diabolo ne Satana.’ Bavua ne bua kuimansha muluishi wa tshikisu wa bukua bantu eu kumbukila mu diulu, “muikale ne tshiji tshikole, mumanye ne: udi ne tshikondo tshîpi.” (Buakabuluibua 12:9, 12) Bena Kristo badi ne malu mimpe adi abasaka bua kuitaba ne: badi mu “tshikondo tshîpi” atshi, ne mu katupa kîpi emu nebele “dragon, nyoka wa ku tshibangidilu” mu dijimba dile menemene muikalaye kayi ne bukole bua kuenza bualu munkatshi mua bidimu 1 000 pikala Yezu eku ukokesha mu Bukalenge bua Nzambi.​—Buakabuluibua 20:1, 2.

Mu tshikondo atshi, ntshinyi tshienzeka pa buloba buetu butudi basombele ebu? Mbanganyi bikala ne muoyo pa buloba? Nebikale ne nsombelu wa mushindu kayi? Yezu nkayende wakafila mandamuna. Mu tshilejilu tshiende tshia mikoko ne mbuji, wakaleja tshidi tshindile bantu bakane badi bu mikoko, badi beleshangana diboko ne bana babu ne Yezu ne babenzela malu mimpe. Wakaleja kabidi patoke tshidi tshindile bantu badi kabayi bakane, badi bu mbuji. Yezu wakamba ne: “Bantu aba [mbuji] nebaye mu kabutu ka tshiendelele, kadi bantu bakane [mikoko] nebaye mu muoyo wa tshiendelele.”​—Matayi 25:46.

Bualu ebu budi butuambuluisha bua kumvua mêyi avua Yezu muambile muena tshibawu uvua ku mutshi ku luseke luende. Yezu kavua muambe ne: muntu eu neikale ne difutu dia muomumue ne divuaye mulaye bapostolo bende ba  lulamatu to, mmumue ne: dia kuikala mu Bukalenge bua mu diulu. Kadi Yezu uvua mulaye muena tshibawu uvua munyingalale bua mpekatu yende eu ne: “Bulelela, ndi nkuambila lelu ne: newikale nanyi mu Mparadizu.” (Luka 23:43) Nunku muntu au wakapeta ditekemena dia kulua kusomba mu Mparadizu, udi muikale budimi buimpe bulengele. Bidi biumvuika bimpe ne: lelu bantu badi baleja mudibu mikoko babuela “mu muoyo wa tshiendelele” nebikale pabu mu Mparadizu au.

Bualu ebu budi bumvuangana ne tshivua mupostolo Yone mumvuije bua muikala nsombelu pa buloba. Wakamba ne: “Ntenta wa Nzambi udi ne bantu, ne yeye neasombe nabu, ne bobu nebikale bantu bende. Nzambi muine neikale nabu. Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—Buakabuluibua 21:3, 4.

Bua muena tshibawu eu kuikala ne muoyo mu Mparadizu, nebamubishe ku lufu. Kabakumubisha anu yeye nkayende to. Yezu wakatokesha bualu ebu pakambaye ne: “Dîba didi dilua diumvua bantu bonso badi mu nkita ya tshivulukilu dîyi diende ne nebapatuke, bavua benze malu mimpe bua dibishibua ku lufu dia muoyo, bavua benze malu mabi bua dibishibua ku lufu dia dilumbuluisha.”​—Yone 5:28, 29.

Kadi netuambe tshinyi bua bapostolo ba lulamatu ne bantu bungi bukosa bikala ne Yezu mu diulu? Bible udi wamba ne: “Nebikale bakuidi ba Nzambi ne ba Kristo, ne nebakokeshe nende bu bakalenge bidimu tshinunu.” (Buakabuluibua 20:6) Bantu badi bakokesha ne Kristo nebikale balume ne bakaji bavua ne muoyo pa buloba. Nunku nebikale bushuwa ne luse ne nebikale mua kumvuila bantu bakokeshabu pa buloba.​—Buakabuluibua 5:10.

Yezu neakuate mudimu ne mulambu wende udi upikula bua bantu badi pa buloba ne neabumbushe ku mulawu wa mpekatu uvuabu bapiane. Yeye ne bena diende nebafikishe bantu ba lulamatu ku bupuangane. Eyowa, bantu nebasanke ne nsombelu uvua Nzambi mubalongoluele katshia ku tshibangidilu pakambilaye Adama ne Eva bua kuvulangana pa buloba ne kubuwuja. Nansha lufu luvuabu bapiane kudi Adama kaluakuikalaku kabidi to!

Nunku Yezu neakumbaje malu onso ikala Yehowa mumulombe bua kuenza. Ku ndekelu kua bidimu tshinunu bia bukokeshi bua Yezu, neapeshe Tatuende Bukalenge ne bantu bapuangane. Bua tshienzedi tshimpe tshia budipuekeshi tshia Yezu etshi, mupostolo Paulo wakafunda ne: “Patekibua bintu bionso ku bukokeshi buende, dîba adi Muana muine neaditeke pende ku bukokeshi bua Yeye uvua muteke bintu bionso ku bukokeshi buende, bua Nzambi ikale bintu bionso kudi muntu yonso.”​—1 Kolinto 15:28.

Bulelela, Yezu uvua mukumbaje mudimu wa mushinga mukole mu malu a butumbi avua Nzambi mulongolole. Bu muikala malu aa mua kutungunuka bua kashidi, neakumbaje menemene tshivuaye muambe bua bualu buende ne: “Meme ndi njila ne bulelela ne muoyo.”​—Yone 14:6.