Nakaqeda ukubhajadiswa, uJesu waqalana nesitha ebesizimisele ukumqeda amandla angakathomi umsebenzakhe. UDeveli walinga uJesu ngokubuyelelweko. Kamuva, nakakhuluma ngomenzi wobumbi loyo, uJesu wathi: “Umbusi wephasi uyeza, begodu akanamandla kimi.”—Jwanisi 14:30.

Umpostoli uJwanisi wakuboniswa embonweni lokho okuzokwenzeka, wabona “idragoni ekulu, inyoka yokuthoma, leyo ebizwa ngokuthi nguDeveli noSathana.” Inaba labantu elikhohlakelekweli belizokuqothwa ezulwini, ‘linelaka elikhulu, lazi ukuthi linesikhathi esifitjhani.’ (IsAmbulo 12:9, 12) Nje-ke, amaKrestu anebanga elihle lokukholelwa ukuthi kwanjesi aphila ‘esikhathineso esifitjhani,’ begodu msinyana “idragoni, inyoka yokuthoma,” izokuvalelwa emgodini onganamkhawulo ingenzi litho bekuphele iminyaka eyi-1000 uJesu nakabusa emBusweni kaZimu.—IsAmbulo 20:1, 2.

Alo-ke, khuyini ezokwenzeka ephasini ngesikhatheso? Bobani abazokuphila ephasini begodu bazokuphila ngaphasi kwabuphi ubujamo? UJesu wanikela iimpendulo. Emfanekiswenakhe wezimvu neembuzi, watjengisa ukuthi abalungileko abafana nezimvu, okungilabo ababambisene nabafowabo bakaJesu begodu abenza okuhle kibo balindelwe lingomuso elinjani. Wakwenza kwakhanya ukuthi labo abenza okuphambeneko bafana neembuzi begodu wahlathulula nokuthi balindelwe yini. Nakaragako, uthi: “Laba [iimbuzi] bazokuya ekutjhatjalalisweni kwaphakade, kodwana abalungileko [izimvu] bazokuya ekuphileni okungapheliko.”—Matewu 25:46.

Lokhu kusenza sizwisise amezwi kaJesu awatjho esilelesini ebesibethelwe eqadi kwakhe. UJesu akhenge athembise indoda le umtlomelo ofana naloyo awuthembisa abapostoli bakhe  abathembekileko, wokuba yingcenye yomBuso wezulwini. Kunalokho, uJesu wathembisa isoni esiphendukileko wathi: “Ngiqinisile ngithi kuwe namhlanjesi, uzokuba nami ePharadesi.” (Lukasi 23:43) Indoda le yabanethemba lokuphila endaweni ehle ePharadesi. Esikhathini esizako, lokha uJesu nakagweba abantu, labo abanjengezimvu bazokufumana ‘ukuphila okungapheliko’ begodu bazokuba sePharadesi.

Lokhu kuvumelana kuhle nehlathululo kampostoli uJwanisi emalungana nobujamo bephasi bangesikhatheso. Nakahlathululako, wathi: “Itende lakaZimu lihlangana nabantu, uzokuhlala nabo, bona bazokuba babantu bakhe. UZimu ngokwakhe uzokuba nabo. Uzokusula zoke iinyembezi emehlwenabo, ukufa angekhe kusaba khona, namkha isizi namkha ukulila namkha ubuhlungu angekhe kusaba khona. Izinto zaphambilini zidlulile.”—IsAmbulo 21:3, 4.

Nasizakuthabela ukuphila ePharadesi, isileleseso kufuze sivuswe ekufeni. Angeze sivuswe sisodwa. UJesu wakwenza kwakhanya lokho nakathi: “Isikhathi siyeza lapho boke abasemathuneni bazokuzwa ilizwi layo baphume, labo abenze okuhle bavuselwe ekuphileni, begodu labo ababenomukghwa wokwenza okumbi bavuselwe ekwahlulelweni.”—Jwanisi 5:28, 29.

Alo-ke, kuthiwani ngabapostoli abathembekileko nalabo ababaliweko abazokuba noJesu ezulwini? IBhayibheli liphendula lithi: “Bazokuba baphristi bakaZimu nebakaKrestu, bazokubusa naye njengamakhosi iminyaka eyi-1 000.” (IsAmbulo 20:6) Labo abazokubusa noKrestu kuzokuba madoda nabafazi abathethwe ephasini. Bazokubusa iphasi ngezwela nangokuzwisisa.—IsAmbulo 5:10.

UJesu uzokusebenzisa umhlatjelo wesihlengo sakhe bona asuse isono esisephasini. UJesu nalabo azokubusa nabo bazokusiza abantu abathembekileko bekube kulapho bangasenasono. Abantu bazokuthabela ukuphila ebebakuhloselwe nguZimu nakatjela u-Adamu no-Eva bona bande bazalise iphasi. Ngitjho nokufa okwabangelwa sisono saka-Adamu kuzokupheliswa.

Ngesikhatheso, uJesu uzabe akufezile koke uJehova ebekamthume khona. Nakuphela imiNyaka eyiKulungwana yokuBusa kwakhe, uJesu uzokubuyisela umBuso nabantu abanganasono kuYise. Nakakhuluma ngobuntu obubabazekako bakaJesu, umpostoli uPowula watlola wathi: “UZimu nasele abeke koke ngaphasi kweNdodanakhe, neNdodana leyo izozibeka ngaphasi kwakaZimu okunguye obeke zoke izinto ngaphasi kwakhe, bona uZimu abe zizinto zoke kiwo woke umuntu.”—1 Korinte 15:28.

Kuyakhanya bona uJesu udlala indima eqakathekileko ekuphumeleliseni iminqopho kaZimu. Njengombana iminqopho leyo iragela phambili nokuzaliseka, uzoyiphilela ngokuzeleko ihlathululo azinikela yona nakathi: “Ngiyindlela neqiniso nokuphila.”—Jwanisi 14:6.