Kuraj Supayqa Jesús bautizasqa kasqantawan ashkha kutispi pantachiyta munarqa. Chaytataj payqa ruwarqa Jesús niraj willayta qallarishajtin. Chaymanta aswan qhepamantaj, Kuraj Supaymanta Jesús nerqa: “Kay mundota kamachejqa jamushanña. Paytaj contraypi ni imata ruwayta atinchu”, nispa (Juan 14:30).

Aswan qhepamantaj, apóstol Juanqa mosqoypi jina uj ‘jatun sierpeta’ rikorqa, “pichus sutichasqa Kuraj Supay, Satanastaj, chayta”. Juan rikusqanman jina, Kuraj Supayqa cielomanta wijchʼuchikamunan karqa, manchay phiñasqataj kanan karqa “paypaj pisi tiempollaña kasqanta yachaspa” (Apocalipsis 12:9, 12). Arí, Kuraj Supaypajqa “pisi tiempollaña” kashan, tumpamantawantaj chinkay ukhuman wijchʼuykusqa kanqa. Chaypitaj payqa “1.000 wataspaj” wataykusqa kanqa. Ajina wisqʼasqa kanankamaqa, Jesús Diospa Gobiernonpi gobernamonqa (Apocalipsis 20:1, 2).

Jesusqa chay 1.000 wataspi pikunachus kay jallpʼapi kausakunankumanta parlarqa. Chaymanta parlaspa ovejasmantawan cabrasmantawan kikinchayta runasman willarerqa. Chay kikinchaypitaj, ovejasmanta parlaspa hermanosninta yanapajkunamanta parlasharqa. Cabrasmanta parlaspataj, mana kasukoj runasmanta parlasharqa. Chantapis Jesusqa chay kikinchayninpi imachus paykunawan kananta willallarqataj. Payqa cabraswan ninakoj runasmanta nerqa: “Wiñaypaj wañonqanku”, nispa. Ovejaswan ninakojkunamantataj nerqa: “Wiñay kausayta japʼenqanku”, nispa (Mateo 25:46).

Kayta yachayqa Jesús uj suwa runaman, “noqawan paraisopi kanki” nisqanta entiendenapaj yanapawanchej (Lucas 23:43).  Jesusqa chayta nerqa, chay suwa runa paywan khuska kʼaspipi wañuchisqa kashajtin. Chayta nispataj, mana nisharqachu chay runa apostolesnin jina cieloman rinanta. Astawanpis payqa nisharqa, chay runa kay jallpʼa paraisoman tukojtin, chaypi kausakuyta atisqanta. Ovejaswan ninakoj runaspis chayllapitaj kausakonqanku.

Apóstol Juanpis, kay jallpʼa paraisoman tukunanmanta parlaspa nerqa: “Diospa toldonqa runas chaupipi kashan, paytaj paykunawan khuska tiyakonqa, paykunataj paypa llajtan kanqanku. Diostaj paykunawan khuska kanqa. Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña”, nispa (Apocalipsis 21:3, 4).

Jesuswan khuska wañuchisqa karqa chay suwa runaqa, paraisopi tiyakunanpaj kausarimunan kanqa. Jinapis mana payllachu kausarimonqa. Jesús nerqa: “Hora chayamonqa, chaypachataj sepulturaspi tukuy kajkunaqa wajyasqayta uyarenqanku, kausarimonqankutaj. Allin imasta ruwajkunaqa wiñay kausayta japʼinankupaj, sajra imasta ruwajkunataj juzgasqa kanankupaj”, nispa (Juan 5:28, 29).

Chanta, ¿imataj kanqa Jesuspa apostolesninwan, cieloman ripoj ajllasqa yachachisqasninwan ima? Biblia niwanchej: “Paykunaqa Diospata, Cristojtawan sacerdotesninku kanqanku, paywantaj reyes jina kamachenqanku chay 1.000 watasta”, nispa (Apocalipsis 20:6). Jesuswan khuska gobernamojkunaqa, noqanchej jina kausakorqanku. Chayrayku paykunaqa jaqay tiempopi khuyakuwasun, entiendewasuntaj (Apocalipsis 5:10).

Jesusqa kausayninta qosqanrayku runasta yanapanqa, juchaj atiyninmantataj libranqa. Chantapis paywan yanapajkunasninwan ima, tukuy runasta mana juchayoj runasman tukuchiwasun. Ajinamantataj runasqa Diospa munayninman jina kausakusunchej, manañataj Adanpa juchanrayku wañusunchu. Diosqa manapuni munarqachu wañunanchejta. Chayrayku qallariypi Adanmanwan Evamanwan nerqa wawasniyoj kanankuta, kay jallpʼamantaj juntʼanankuta.

Ajinamanta Jesusqa Jehová Diospa nisqanta juntʼanqa. Chantá 1.000 watasta kamachiytawan, Jesusqa runasta juchamanta kacharichisqataña, jinallataj Gobiernontapis Tatanman jaywaponqa. Chaymanta parlaspa apóstol Pablo nerqa: “Chaywanpis maypachachus Dios, tukuy imata Wawanpa chakisnin uraman churanqa chaypacha, kikin Wawanpis paypa makinman churakonqa. Diosmin tukuy imata Wawanpa chakisnin uraman churan, ajinamanta Dioslla tukuyta kamachinanpaj”, nispa (1 Corintios 15:28).

Jinapis Jesusqa Diospa munayninta juntʼaytawan mana jinallachu kanqa. Astawanpis Diospa munaynin juntʼakusqanman jina Jesusqa “ñan”, “cheqa kajtaj, kausaytaj” kanqa (Juan 14:6).