Bautizakurusqan qipallatam diabloqa Jesusta pantarachiyta munarqa, chaytaqa ruwarqa manaraq Diosmanta willakuchkaptinmi. Chaymi Jesusqa achka kutipi pantarachiyta munaptin diablomanta rimaspa nirqa: ‘Kay pachata kamachiqqa manam ñuqataqa munaychakuwanchu’, nispa (Juan 14:30).

Apostol Juanmi musquyninpi hina rikurqa ‘ñawpaqmantaraq kaq culebrata’ utaq diablota ima pasananmanta. Rikurqam chay manchakuypaq culebraqa utaq diabloqa hanaq pachamanta qarqumusqa kasqanta hinaspa ‘pisi tiempollaña’ kawsananta yachasqanrayku ‘llumpa-llumpay piñasqa’ kasqantapas (Apocalipsis 12:9, 12). Jesuspa qatiqninkunaqa yachanchikmi diabloqa ‘pisi tiempoyuqllaña’ kasqanmanta, yachanchiktaqmi diabloqa utaq ‘manchakuypaq culebraqa’ chinkaykuq uchkupi 1.000 wata wichqasqa kaspan manaña ima ruwaytapas atinanmanta. Chay 1.000 watapim Jesusqa Diospa munaychakuyninpi kamachinqa (Apocalipsis 20:1, 2).

¿Imataq chay 1.000 watakunapiqa kay pachapi kanqa? ¿Imayna runakunataq hinaspa imaynataq kay pachapi kawsanqaku? Jesusmi ovejakunamantawan cabrakunamanta rikchanachisqanpi willakurqa ovejakunaman rikchakuqkunaqa utaq Jesuspa wawqinkunata yanapaqkunaqa bendecisqa kanankumanta, hinaspa cabrakunaman rikchakuqkunañataq imapi tukunankumanta. Nirqam: ‘[Cabrakunaqa] wiña-wiñaypaqmi wañunqaku, allin ruwaqkunam [utaq ovejakunam] ichaqa wiña-wiñaypaq kawsanqaku’, nispa (Mateo 25:46).

Chayna nisqanwanmi astawan entiendenchik waqtanpi warkusqa suwa runaman Jesuspa kayna nisqanmanta: “Chiqaptapunim kunan niki: Sumaq huertapim ñuqawan kanki”, nispa  (Lucas 23:43). Chayna nisqanwanmi chay suwa runaman nichkarqa kay pacha huertayachisqa kaptin chaypi kawsananmanta, apostolninkunamanmi ichaqa nirqa hanaq pachaman rispanku kamachiq kanankumanta. Chaymi ninchik Jesus juzgaptin ovejaman rikchakuq runakunaqa kay pachapi wiñaypaq kawsanankumanta.

Apostol Juanpas kay pachapi kawsakuy hamuq tiempopi imayna kananmantam nirqa: “Diospa carpanqa runakunawanñam kachkan. Paymi runakunawan yachanqa, paykunañataqmi llaqtan kanqa, Diosqa paykunawanmi kanqa. Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam”, nispa (Apocalipsis 21:3, 4).

Kay pacha sumaq huerta kaptinqa chay suwa runaqa kawsarimunqam. Ichaqa manamá payllachu kawsarimunqaqa, Jesusmi nirqa: “Tiempom chayamuchkanña sepulturapi llapallan kaqkuna paypa qayasqanta uyarinankupaq hinaspam kawsarimunqaku, allin ruwaqkunam kawsarimunqaku wiñay kawsaypaq, mana allin ruwaqkunañataqmi juiciopaq”, nispa (Juan 5:28, 29).

Ichaqa, ¿imatataq ruwanqaku apostolkunaqa chaynataq hanaq pachapi kanankupaq akllasqakunaqa? Bibliam nin: “Diospa chaynataq Cristopa sacerdotenkunam kanqaku, paykunaqa Cristowanmi waranqa wata kamachimunqaku”, nispa (Apocalipsis 20:6). Jesuswan kuska hanaq pachamanta kamachimuqkunaqa kay pachapi kaq runakunamanta akllasqakunam kanku. Chaymi paykuna kamachimuspankuqa kay pachapi kaq runakunata kuyapayanqaku hinaspa llakipayanqaku (Apocalipsis 5:10).

Jesusqa rantinchikpi wañukusqanraykum kay pachapi kaq runakunata huchanchikmanta librawasun. Chaymantapas, Jesuswan kamachiqkunam runakunata yanapanqaku mana huchayuqña kanankupaq. Chayraqmi runakunaqa suma-sumaq kawsakuypi kanqaku. Chayna kanantam Diosqa munarqa Adantawan Evata unanchaspanpas, chaymi paykunataqa nirqa churi-wawayuq kaspa kay pachata huntachinankupaq. Chay tiempopiqa manañam Adanpa huchanraykuqa pipas wañunqañachu.

Chaynatam Jesusqa ruwayninta utaq taytanpa kamachisqanta tukunqa. 1.000 wata kamachisqan tukuytam Jesusqa taytanpa makinpi churanqa kamachikuyninta hinaspa manaña huchayuq runakunatapas. Mana hatun tukuspan chaynata ruwananmantam apostol Pablo nirqa: “Churinpa makinpi Dios tukuy imata churaruptinmi, churipas tukuy imata makinpi churaq Diosman churakuykunqa, chaynapim Diosña lliwta kamachinqa”, nispa (1 Corintios 15:28).

Diospa munaynin ruwakunanpaqmi Jesusqa tukuyta ruwachkan. Chaymi hinalla ruwakusqanman hina payqa “ñan, chiqap kaq chaynataq kawsay quqpas” hinalla kanqa (Juan 14:6).