E leʻi umi talu ona māeʻa le papatisoga o Iesu, ae ia fesagaʻia se fili na taumafai ma le maumauaʻi ina ia lē tumau o ia i le faamaoni, a o leʻi amataina lana faiva. O le mea moni, na faia pea taumafaiga a le Tiapolo e faaosoosoina Iesu. Mulimuli ane, na fetalai Iesu e faatatau i le Tiapolo o lē e leaga: “O loo sau le pule o le lalolagi, ae e leai sana pule iā te aʻu.”—Ioane 14:30.

Na muaʻi iloa e le aposetolo o Ioane i se vaaiga le mea o le a tupu i “le tarako tele, o le uluaʻi gata lea, ua igoa foʻi i le Tiapolo ma Satani.” O le a lafo ese lenā fili sauā o le fanau a tagata mai i le lagi, ma ua “lotoa tele, auā ua na iloa ua puupuu lona taimi.” (Faaaliga 12:9, 12) Ua alagatatau ona talitonu Kerisiano o loo latou ola i lenā ʻtaimi puupuu.’ E lē o toe umi foʻi ona lafo lea o “le tarako, o le uluaʻi gata lea” i le tō e lē gata, ma o le a lē mafai ai ona ia toe faia se gaoioiga mo le 1,000 tausaga, a o pule Iesu i le Malo o le Atua.—Faaaliga 20:1, 2.

O le ā o le a tupu i le lalolagi lea o loo tatou nonofo ai a o faagasolo le 1,000 tausaga? O ai o le a ola ai i le lalolagi, ma o le a faapeʻī tulaga o mea i lenā taimi? Ua faailoa mai e Iesu tali i na fesili. Na ia faamatala mai i lana talafaatusa i mamoe ma ʻoti, le mea o le a oo i tagata amiotonu e pei o ni mamoe, o ē o loo galulue soosootauʻau ma uso o Iesu ma faia galuega lelei mo i latou. Na ia faailoa manino mai foʻi le iʻuga o tagata amiolētonu, o ē e pei o ni ʻoti: “Ona ō atu ai lea o i latou nei [ʻoti] i le faaumatiaga e faavavau, a o ē e amiotonu [mamoe] e ō atu i le ola e faavavau.”—Mataio 25:46.

Ua fesoasoani lea iā i tatou e malamalama ai i le uiga o upu, sa fetalai atu ai Iesu i le tagata solitulafono na faatautau i ona autafa. E leʻi ofoina atu e Iesu i lenā tagata le taui lea sa ia folafolaina atu i ona aposetolo faamaoni, o le avea o i latou o se vaega o le Malo i le lagi. Nai lo o lea, na ia folafola atu i lenei tagata solitulafono ua salamō:  “E moni ou te fai atu iā te oe i le asō, o le a ta faatasi ma oe i le Parataiso.” (Luka 23:43) O lea, ua maua e lenā tagata le faamoemoe o le ola i le Parataiso, o se faatoʻaga matagofie. E manino mai la, o ē ua pei o ni mamoe ma ulu atu “i le ola e faavavau,” o le a iai foʻi i lenā Parataiso.

E ōgatusa lenā manatu ma le faamatalaga a le aposetolo o Ioane, e faatatau i le tulaga o le a iai le lalolagi pe a avea ma Parataiso. Ua faapea mai o ia: “Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:3, 4.

Ina ia mafai e lenā tagata solitulafono ona maua le ola i le Parataiso, e tatau ona toe faatūina o ia mai i le oti. E iai foʻi isi o le a toe faatutūina mai i le oti. Na faamanino mai e Iesu lenā manatu ina ua ia fetalai: “E oo mai le itula e faalogo ai i latou uma o loo i tuugamau i lona leo, ma latou ō mai ai, o ē na faia mea lelei e toetutū i le ola, a o ē na faia mea leaga e toetutū i le faamasinoga.”—Ioane 5:28, 29.

Ae faapefea aposetolo faamaoni ma se vaega toʻaitiiti o i latou o le a iai faatasi ma Iesu i le lagi? Ua faapea mai le Faaaliga 20:6: “E fai i latou ma ositaulaga a le Atua ma le Keriso, e pule i latou o ni tupu faatasi ma ia mo le afe tausaga.” O i latou nei o tane ma fafine e filifilia mai i le lalolagi. O lea, e mautinoa o le a faaalia e nei pule mai i le lagi le alofa mutimutivale, ma malamalama i tulaga o i latou i le lalolagi.—Faaaliga 5:10.

O le a faaaogā e Iesu le tāua o lana taulaga togiola i tagata i le lalolagi, ma aveesea āuga leaga o le agasala tuufaasolo. O le a fesoasoani o ia ma ē latou te tupu faatasi i le fanau a tagata, ina ia faasolosolo ona toe faafoʻisia i le tulaga lelei atoatoa. Ona mafai ai lea ona maua e tagata le olaga lea sa fuafuaina e le Atua mo le fanau a tagata i le amataga, ina ua ia fetalai iā Atamu ma Eva ina ia fanafanau ma ia tumu ai le lalolagi. O le a lē toe iai foʻi le oti lea na tuufaasolo mai ona o le agasala a Atamu.

O lea, o le a faataunuuina e Iesu mea uma sa fetalai atu Ieova e na te faia. I le iʻuga o lana Pulega o le Afe Tausaga, o le a ia tuuina atu le Malo ma le aiga faaletagata ua lelei atoatoa i lona Tamā. E tusa ai o lenei gaoioiga mataʻina o le lotomaulalo o Iesu, na tusi le aposetolo o Paulo: “Pe a tuuina i lalo o mea uma iā te ia, ona tuuina i lalo foʻi lea e le Alo o ia lava i Lē na tuuina i lalo o mea uma iā te ia, ina ia pule aoao le Atua i le aoao o mea.”—1 Korinito 15:28.

Ua manino mai, e tāua le matafaioi a Iesu i le faataunuuina o fuafuaga mamalu a le Atua. A o faasolosolo ona faailoa ma faamanino mai na fuafuaga seʻia oo i le faavavau, o le a gaoioi pea Iesu e ōgatusa ma le faamatalaga na ia faia e faatatau iā te ia lava: “O aʻu o le ala, o le upu moni ma le ola.”—Ioane 14:6.