Satana wakhumbisiskanga kuti Yesu watondeki kuchita vo wanguziya pacharu chapasi. Iyu wangwamba kuyesa Yesu wati wabatizika waka ndipu nyengu yeniyi, Yesu wenga wechendayambi uteŵeti waki. Dyaboli wanguyesa Yesu mwakuwerezawereza. Pati pajumpha nyengu, Yesu wangukamba vakukwaskana ndi Dyaboli mwenuyu kuti: “Wakuwusa wa charu watuza, kweni we ndi nthazi cha paku ini.”—Yohane 14:30.

Wakutumika Yohane wanguwona chiwona cho chingulongo vinthu vo vazamuchitikiya ‘chinjoka chikulu, njoka yakali ukongwa yo yidanika kuti Dyaboli kweniso Satana.’ Yohane wanguwona murwani wankhaza mwenuyu yo wasuzga ŵanthu, wachiponyeka pacharu chapasi, “we ndi ukali ukulu, pakuziŵa kuti waja ndi kanyengu kamanavi.” (Chivumbuzi 12:9, 12) Akhristu ŵe ndi vifukwa vo vitiŵachitiska kugomezga kuti aja mu “kanyengu kamanavi” kenaka kweniso kuti pambula kuswera, “chinjoka, njoka yakali ukongwa” chazamuponyeka muchizenji ndipu chazamutimbanyizga ŵanthu cha kwa vyaka 1,000. Pa nyengu yeniyi, Yesu wazamulamuliya mu Ufumu waku Chiuta.—Chivumbuzi 20:1, 2.

Kumbi vinthu vazamukuŵa wuli pacharu chapasi pa nyengu yeniyi? Kumbi mbayani wo azamuja pacharu chapasi, nanga azamuja ndi umoyu wuli? Yesu wangumuka mafumbu ngenanga mu ntharika yaki ya mbereri ndi mbuzi. Mu ntharika yeniyi, iyu wangulongo vinthu vo vazamuchitikiya ŵanthu arunji wo ŵe nge mbereri. Yiwu akoliyana ndi abali aku Yesu kweniso atiŵachitiya vinthu vamampha. Iyu wangulongo so vinthu vo vazamuchitikiya ŵanthu wo ŵe nge mbuzi, wo aleka kukoliyana ndi abali aku Yesu. Yesu wanguti: “Yaŵa [ŵanthu wo ŵe nge mbuzi] abayikengi kwamuyaya kweni arunji [ŵanthu wo ŵe nge mbereri] azamuluta ku umoyu wamuyaya.”—Mateyu 25:46.

Mazu ngenanga ngatitiwovya kuvwisa vo Yesu wangukambiya chigaŵenga cho chingupayikika pafupi ndi iyu. Yesu wengavi kulayizga munthu mwenuyu mphotu yo wangulayizga akutumika ŵaki akugomezgeka yakuchilamuliya nayu limoza mu Ufumu wakuchanya. M’malu mwaki, Yesu wangulayizga  munthu mwenuyu yo wangulapa kuti: “Nditikukambiya msanawale, wazamuja ndi ini mu Paradayisu.” (Luka 23:43) Munthu mwenuyu wenga ndi chilindizga chakuzija mu Paradayisu, ngo ndi malu ngakutowa ukongwa. Yapa, vilongore limu kuti ŵanthu wo achita vinthu nge mbereri mazuŵa nganu, wo aluta “ku umoyu wamuyaya” nawu azamuja mu Paradayisu mwenuyu.

Ivi vikoliyana ndi vo wakutumika Yohane wangukamba pakukonkhoska mo umoyu wazamuŵiya pacharu chapasi. Iyu wanguti: “Chihema chaku Chiuta che pakati pa ŵanthu. Iyu wajengi nawu ndipu yiwu aŵengi ŵanthu ŵaki. Ndipu Chiuta iyu mweneku waŵengi nawu. Ndipu waleskengi masozi ngosi mumasu mwawu, nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha. Vinthu vakali vajumphapu.”—Chivumbuzi 21:3, 4.

Munthu yo wenga chigaŵenga wazamukhumbika kuyuskika kuti wazikondwi ndi umoyu mu Paradayisu. Pa nyengu yeniyi, ŵanthu anandi azamuyuskika. Tikamba viyo chifukwa Yesu wangukamba kuti: “Nyengu yituza yeniyo ŵanthu wosi wo ŵe mumiwunda yachikumbusu, azamukuvwa mazu ngaki ndipu azamutuwamu. Wo anguchita vinthu vamampha azamuyuka kuti alonde umoyu, kweni wo anguchita vinthu viheni azamuyuka kuti ayeruzgiki.”—Yohane 5:28, 29.

Nanga akutumika akugomezgeka kweniso ŵanthu anyaki amanavi wo amuja kuchanya limoza ndi Yesu amuchitanji? Bayibolu likamba kuti: “Azamuja asembi aku Chiuta ndipuso aku Khristu, ndipu azamuwusa nge mafumu limoza ndi iyu kwa vyaka 1,000.” (Chivumbuzi 20:6) Ŵanthu ŵenaŵa wo amulamuliya limoza ndi Khristu angujapu ŵanthu [anthulumi ndi anthukazi] pacharu chapasi. Mwaviyo, yiwu azamuja mafumu ngakuvwisa vinthu kweniso ngalisungu.—Chivumbuzi 5:10.

Yesu wazamugwiriskiya ntchitu sembi yakuwombo kuti wazituzgepu ubudi wo ŵanthu angutole kwaku Adamu ndi Heva. Iyu limoza ndi ŵanthu wo wazamulamuliya nawu, azamuwovya ŵanthu akugomezgeka kuti azije akufikapu. Pavuli paki, ŵanthu azamukondwa ndi umoyu nge po Chiuta wakhumbiyanga pakwamba pa nyengu yo wangukambiya Adamu ndi Heva kuti abalani ndi kuzaza charu chapasi. Ndipu nyifwa yo yingwamba chifukwa cha kubuda kwaku Adamu yazamuŵaku so cha!

Yapa, Yesu wazamuja kuti wamaliza kugwira ntchitu yo Yehova wangumupaska. Asani wazimaliza kulamuliya kwa vyaka 1,000, Yesu wazamupereka Ufumu kweniso banja la ŵanthu akufikapu m’manja mwa Awisi. Yesu wazamulongo kuti ngwakujiyuyuwa ukongwa. Pakukamba za jalidu la kujiyuyuwa lo Yesu wazamulongo, wakutumika Paulo wangulemba kuti: “Asani vinthu vosi vazithereskeke kwaku iyu, Mwana nayu wazakujithereske yija kwaku Mweniyo wakuthereske vinthu vosi kwaku iyu, kuti Chiuta waje vinthu vosi kwaku weyosi.”—1 Akorinto 15:28.

Kukamba uneneska, Yesu we ndi udindu ukulu pakufiska vo Chiuta wakhumba. Pa nyengu yo vinthu vo Chiuta wakhumba vazamulutirizga kufiskika mpaka muyaya, Yesu wazamulutirizga kuja “nthowa, uneneska ndi umoyu.”—Yohane 14:6.