Mbwaakabbapatizyilwa buyo Jesu, wakalwanwa asinkondonyina ooyo iwakakanzide kumupa kwaalilwa katanautalika akuutalika mulimo wakwe. Inzya, Diabolosi wakasoleka cakwiinduluka-induluka kumusunka Jesu. Kumbele, Jesu wakaamba boobu kujatikizya mubi ooyu: “Mweendelezi wanyika ulaboola, lino tajisi nguzu zyakundizunda.”—Johane 14:30.

Mwaapostolo Johane wakabona cilengaano cijatikizya iciyakumucitikila kumbele “simwaaba ooyo mupati, imuzoka ooyo wakaindi, uutegwa Diabolosi a Saatani.” Ooyu sinkondonyina bantu imukali wakali kuyootandwa kujulu akuwaalwa ansi kajisi “bukali bupati, mbwaanga ulizyi kuti ujisi buyo kaindi kaniini.” (Ciyubunuzyo 12:9, 12) Banakristo balijisi kaambo kamvwika kakusyoma kuti lino tupona ‘mukaindi kaniini’ aaka akuti lino-lino ‘simwaaba, imuzoka ooyo wakaindi’ uyoowaalwa mumulindi uutagoli alimwi akubula nguzu kwamyaka iili 1,000 eelyo Jesu aanikweendelezya mu Bwami bwa Leza.—Ciyubunuzyo 20:1, 2.

Kuciindi eeco, ino ncinzi ciyakucitika aano anyika mpotukkala? Mbaani bayakukkala aano, alimwi ino banooli mubukkale buli buti? Jesu lwakwe wakapa bwiinguzi kumibuzyo eeyi. Mucikozyanyo cakwe cambelele ampongo, wakatondezya iciyakubacitikila bantu baluleme aabo ibali mbuli mbelele, ibabelekelaamwi abanabokwabo Jesu akubacitila zintu zibotu. Alimwi wakacisalazya kwaamba iciyakubacitikila aabo bataciti zintu eezyi, aabo ibali mbuli mpongo. Jesu wakaamba kuti: “Aaba [nkokuti, mpongo] bayoonyonyoonwa kukabe kutamani, pele baluleme [nkokuti, mbelele] bayootambula buumi butamani.”—Matayo 25:46.

Eeci citugwasya kumvwisya majwi Jesu ngaakaambila cigwebenga icakalaanguwe aacisamu. Jesu tanaakasyomezya mwaalumi ooyu bulumbu mbwaakasyomezya baapostolo bakwe basyomeka, bwakuba mu Bwami bwakujulu. Muciindi  caboobo, Jesu wakasyomezya simucita zibi ooyu iwakeempwa kuti: “Ncobeni sunu ndikwaambila kuti, uyooba andime mu Paradaiso.” (Luka 23:43) Aboobo mwaalumi ooyu wakapegwa bulangizi bwakupona mu Paradaiso—imuunda naa busena bubotu kapati. Nkokuti, mazuba aano aabo ibatondezya kuti ncobeni bali mbuli mbelele alimwi ibayootambula “buumi butamani” bayooba mu Paradaiso abalo.

Eeci cileendelana abupanduluzi mbwaakapa mwaapostolo Johane kujatikizya mbobunoobede bukkale aciindi eeco aano aanyika. Wakaamba kuti: “Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—Ciyubunuzyo 21:3, 4.

Lino kutegwa mwaalumi uulya cigwebenga akapone mu Paradaiso, uyooyandika kubusyigwa kuzwa kubafwu. Alimwi tali alikke uuyakubusyigwa pe. Jesu wakacisalazya eeci naakaamba kuti: “Ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo, aabo ibakacita zintu zibotu kububuke bwabuumi, aabo ibakacita zintu zibyaabi kububuke bwalubeta.”—Johane 5:28, 29.

Pele ino mbuti kujatikizya baapostolo basyomeka alimwi amweelwe musyoonto wabamwi ibanooli a Jesu kujulu? Bbaibbele lyaamba kuti: “Bayooba bapaizi ba Leza aba Kristo, alimwi bayoolela kabali bami antoomwe anguwe kwamyaka iili 1,000.” (Ciyubunuzyo 20:6) Aaba ibayakuba basikulelanyina a Kristo banooli bakapona anyika kabali baalumi alimwi abamakaintu. Aboobo, banooli bami bakujulu basilubomba alimwi ibamvwisya bantu ibanooli anyika.—Ciyubunuzyo 5:10.

Jesu uyoobelesya cipaizyo cakwe cacinunuzyo kubantu banooli anyika akumana kusinganizyigwa kwacibi ncobakakona. Walo abasikulelanyina bayoopa kuti bantu basyomeka balondoke. Masimpe, aciindi eeco bantu bayookkomana kupona buumi mbwaakali kuyanda Leza kumatalikilo kuti kabapona ciindi naakaambila Adamu a Eva kuti bazyalane akuzuzya nyika. Noluba lufwu ilwakaboola akaambo kacibi ca Adamu talukabi limbi pe!

Aboobo, Jesu unooli wacita zyoonse eezyo Jehova nzyaakamwaambila kucita. Kumamanino aa Bulelo bwakwe Bwamyaka Iili Cuulu, Jesu uyoopilusya Bwami alimwi abantu balondokede mumaanza aa Bausyi. Ikujatikizya cintu eeci ncayakucita Jesu icitondezya kulicesya kwakwe, mwaapostolo Paulo wakalemba kuti: “Leza aakumana kubombya zintu zyoonse kumwanaakwe, mpoonya Mwana ooyo awalo uyoolibombya kuli Leza ooyo wakabombya zintu zyoonse kulinguwe, ikutegwa Leza abe mweendelezi wazintu zyoonse.”—1 Bakorinto 15:28.

Cilisalede kuti Jesu ujisi mulimo mupati mukuzuzikizyigwa kwamakanze aa Leza aataliboteli. Alimwi makanze aayo mbwaayaabuzuzikizyigwa lyoonse mane kukabe kutamani, uyoocita zintu zyoonse cakumaninina kweelana ambwaakalipandulula kuti: “Ndime nzila, kasimpe alimwi abuumi.”—Johane 14:6.