Akxni nina makgas xtamununit Jesús, Akgskgawini putsananilh xlakata xlakaskin pi xmakgatsankgananilh Dios akxni nina xmatsuki xtaskujut. Uma talamakgasitsin makglhuwa putsananilh Jesús, pero xla tlan wa: «Mima xmapakgsina kakilhtamaku, chu xla nila kimatlawi tuku lakaskin» (Juan 14:30).

Apóstol Juan maʼakxilhnika «lanka luwa nema makgapekuanan [...], xapulana luwa nema wanikan Akgskgawini chu Satanás». Uma xtalatlawana latamanin xʼamaka tamakxtukan kʼakgapun chu «lu sitsinit, xlakata katsi pi nialh lhuwa kilhtamaku kgalhi» (Apocalipsis 12:9, 12). Kstalaninanin Cristo kanajlayaw pi lamaw knialh xalhuwa kilhtamaku chu pi nialh makgas «lanka luwa nema makgapekuanan [...], xapulana luwa», namakankan kkapulhman, niku nila tuku katitlawalh 1,000 kata. Ama kilhtamaku, Jesús namapakgsinan kxTamapakgsin Dios (Apocalipsis 20:1, 2).

¿Tuku nala kkimpulatamankan, kKatiyatni, umakgolh 1,000 kata? ¿Tiku nalatama anta chu la nawan latamat? Jesús wa tiku mastalh xatakgalhtin. Kliʼakxilhtit xla borregos chu cabras masiyalh tuku ama kaʼakgspula latamanin tiku nakgalhakgaxmatnankgo nema litaxtukgo la borregos, tiku tlan kalikatsinikgo xnatalan Jesús chu kamakgtayakgo. Na lichuwinalh tuku xʼama kaʼakgspula tiku tlawakgo tuku nitlan chu litaxtukgo la cabras. Jesús wan: «Umakgolh [cabras] nakamalakgsputukan xliputum kilhtamaku, pero tiku xaʼakgstitum likatsikgo [borregos] nakgalhikgo latamat nema ni kgalhi xlisputni» (Mateo 25:46).

Umakgolh tachuwin kinkamakgtayayan naʼakgatekgsaw tuku wanilh Jesús kgalhana tiku xpaxtuwaka akxni kxtokgowakakanit. Jesús ni watiya malaknunilh tuku xkamalaknuninit xʼapóstoles tiku ni makgxtakgkgolh. Xla kamalaknunilh pi xʼamakgo tawilakgo kTamapakgsin, kʼakgapun. Pero  kgalhana wanilh: «Xlikana kwaniyan uku: nakintatawilayapi kParaíso» (Lucas 23:43). Wa xlakata uma chixku maxkika takgalhkgalhin nalatama kParaíso: akgtum lu stlan pulataman nema xtachuna akgtum jardín o parque. Wa xlakata, kkilhtamaku nema aku mima, latamanin tiku nakaliʼakxilhkan la borregos chu namakglhtinankgo latamat nema nikxni sputa, na nalatamakgo kʼuma Paraíso.

Uma tatalakxtumi tuku Juan tsokgli la xʼama wan latamat kKatiyatni kkilhtamaku nema aku mima. Xla tsokgli: «Xtabernáculo Dios natawila kxlakgstipankan latamanin. Chu xla akxtum nakatatawila chu xlakan xkachikin nalitaxtukgo. Chu Dios akxtum katawi nawan. Chu Dios nakaxakani putum xlakgpixtajatkan, chu nialhti katinilh, nialhti katilipuwa, nialhti katitasalh, nialhti katikatsanajwalh. Putum tuku xʼanan xapulana lakgsputkgonit nawan» (Apocalipsis 21:3, 4).

Xlakata uma kgalhana tlan nalatama kParaíso, talakaskin nalakastakwanan. Chu ni kajwatiya xla katilakastakwanalh, xlakata Jesús malaknulh: «Mima kilhtamaku akxni putum tiku wilakgolh kputaknun nakgaxmatkgo xtachuwin chu nataxtukgo, tiku tlawakgolh tuku xatlan nakamalakastakwanikan xlakata nakgalhikgo latamat, chu tiku tlawakgolh tuku nitlan nakamalakastakwanikan xlakata nakalakputsananikan» (Juan 5:28, 29).

Pero ¿tuku natlawakgo apóstoles tiku ni makgxtakgkgolh Dios chu amakgapitsi latamanin tiku akxtum natatawilakgo Jesús kʼakgapun? Biblia wan: «Nalitaxtukgo ksacerdotes Dios chu Cristo, chu natamapakgsinankgo Cristo akgtum mil kata» (Apocalipsis 20:6). Tiku natamapakgsinankgo Jesús kʼakgapun wa lakchixkuwin chu lakpuskatin tiku latamakgonit kKatiyatni. Wa xlakata, liwana katsiyaw pi nakalakgalhamankgo chu nakaʼakgatekgsnikgo latamanin (Apocalipsis 5:10).

Jesús nakalimakgtaya xtamakamastan tiku lamakgo nawan kKatiyatni chu nakalakgmaxtu ktalakgalhin nema kamatitaxtinikanit. Nachuna, Cristo chu tiku natamapakgsinankgo natlawakgo pi latamanin tiku kgalhakgaxmatnankgo nialh nakgalhikgo talakgalhin. Ama kilhtamaku latamanin nalipaxuwakgo latamat chuna la Dios xlakaskin lata xapulana, akxni kawanilh Adán chu Eva pi xkgalhikgolh kamanan chu xmalakgatsamakgolh Katiyatni. Asta linin nema lakatsukulh akxni Adán lakgalhinalh namasputukan.

Chuna Jesús makgantaxtinit nawan taskujut nema lakgayawanit Jehová. Akxni nakgalhsputa xtamapakgsin xla akgtum mil kata, namakamaxki xTlat Tamapakgsin chu latamanin nialh katikgalhikgolh talakgalhin. Apóstol Pablo lichuwinalh la Jesús xʼama limasiya taktujut: «Akxni Dios putum wilinita nawan kxtampin xtantun xKgawasa, xaKgawasa na natapakgsini Dios. Chuna Dios xmapakgsina nalitaxtu putum tuku anan» (1 Corintios 15:28).

Liwana tasiya pi Jesús lu xlakaskinka tuku lakgaya xlakata nakgantaxtu tuku Dios lakaskin. Chu chuna la nakgantaxtutilha tuku Dios lakaskin putum kilhtamaku, Jesús chuntiya nalitaxtu: «tiji chu xaxlikana chu latamat» (Juan 14:6).