SAPTA 139
Jisas i Kamapim Paradais na Pinisim Wok Bilong Em
-
SAMTING BAI PAINIM OL SIPSIP NA OL MEME
-
PLANTI MAN BAI STAP AMAMAS LONG PARADAIS LONG GRAUN
-
JISAS I SOIM KLIA OLSEM EM YET I ROT, TOK I TRU, NA LAIP
Bihain tasol long Jisas i kisim baptais, wanpela birua i traim long pundaunim em paslain long em i kirapim wok bilong autim tok. Dispela birua em Satan, na em i bin traim Jisas inap planti taim. Bihain, Jisas i tok long Satan olsem: “Hetman bilong dispela graun i kam nau. Na em i no gat strong long bosim mi.”—Jon 14:30.
Long rot bilong visen, aposel Jon i lukim samting bai painim “dispela traipela snek . . . , em dispela snek bilong bipo yet, ol i kolim em Devil na Satan.” Bai ol i rausim dispela birua long heven, olsem na “em i belhat nogut tru, em i save em i gat sotpela taim tasol bilong i stap.” (Revelesen 12:9, 12) Ol Kristen i bilip tru olsem ol i stap long haptaim em Baibel i kolim olsem “sotpela taim,” na klostu nau “traipela snek, em dispela snek bilong bipo yet,” em bai kalabus inap 1,000 yia taim Jisas i mekim wok king long Kingdom Bilong God.—Revelesen 20:1, 2.
Long dispela haptaim, wanem samting bai kamap long graun? Husat bai stap long graun? Ol bai kisim wanem kain sindaun? Jisas yet i bekim ol dispela askim. Long tok piksa bilong ol sipsip na ol meme, Jisas i stori long gutpela blesing bai painim ol stretpela manmeri husat i stap olsem ol sipsip, ol i wok gut wantaim ol brata bilong Jisas na mekim gut long ol. Na tu, em i stori long strafe bai painim ol manmeri husat i stap olsem ol meme. Jisas i tok: “Ol dispela man [ol meme] bai i dai na stap olsem inap oltaim oltaim, tasol ol stretpela man [ol sipsip] bai kisim laip inap oltaim oltaim.” —Matyu 25:46.
Dispela i helpim yumi long kliagut long mining bilong tok Jisas i mekim long raskolman husat i hangamap long pos i stap klostu long em. Jisas i no tokim dispela man olsem em bai kisim wankain blesing olsem ol aposel i stap gut Luk 23:43) Dispela man bai i stap long Paradais, em wanpela naispela gaden. Olsem na ol manmeri husat i stap olsem ol sipsip, ol tu bai “kisim laip inap oltaim oltaim” long Paradais.
long em, olsem ol bai mekim wok king wantaim Jisas long Kingdom bilong heven, nogat. Tasol Jisas i tok promis long dispela raskolman husat i tanim bel, olsem: “Mi tok tru long yu tude, Yu bai stap wantaim mi long Paradais.” (Dispela i stret wantaim stori bilong aposel Jon long ol samting bai kamap long graun. Em i tok: “Haus sel bilong God i stap wantaim ol manmeri, na God bai i stap wantaim ol, na ol bai i stap ol lain manmeri bilong em. Na God yet bai i stap wantaim ol. Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—Revelesen 21:3, 4.
Dispela raskolman bai kirap bek na stap amamas long Paradais. Na tu, planti manmeri moa bai kirap bek. Jisas i kamapim klia dispela samting taim em i tok: “Taim i laik kamap na olgeta man i stap long matmat ol bai harim nek bilong Pikinini na kam ausait. Ol man i bin mekim ol gutpela pasin, kirap bek bilong ol em bilong kisim laip, na ol man i bin mekim ol stingpela pasin, kirap bek bilong ol em bilong kisim kot.”—Jon 5:28, 29.
Tasol olsem wanem long ol aposel i stap gut long Jisas na liklik lain husat bai i stap wantaim em long heven? Baibel i tok: “Ol bai stap pris bilong God na bilong Krais, na ol bai mekim wok king wantaim [Krais] inap 1,000 yia.” (Revelesen 20:6) Dispela lain husat bai mekim wok king wantaim Krais, ol i man na meri bilong graun. Olsem na taim ol i kamap king na bosim yumi ol lain i stap long graun, ol bai i gat pasin sori na ol bai pilim tingting bilong yumi.—Revelesen 5:10.
Long rot bilong ofa bilong em, Jisas bai baim bek ol manmeri bilong graun na pinisim olgeta pen na hevi em sin i kamapim. Jisas na ol wanwok bilong em bai helpim ol manmeri i stap gut long em long kamap gutpela olgeta. Tru tumas, ol manmeri bai kisim dispela laip em God i laik bai Adam na Iv i kisim long pastaim tru. Nambawan laik bilong God em olsem: Em i bin tokim Adam na Iv long kamap planti na i go sindaun long olgeta hap bilong graun. Na tu, sin na dai yumi kisim long Adam bai i no stap moa!
Long dispela rot, Jisas bai inapim olgeta samting Jehova i bin tokim em long mekim. Long pinis bilong Wan Tausen Yia, Jisas bai givim Kingdom na ol man em ol i gutpela olgeta i go bek long han bilong Papa bilong em. Aposel Pol i stori long pasin daun bilong Jisas na em i tok: “Taim olgeta samting i stap aninit pinis long Pikinini, orait Pikinini bai putim em yet aninit long God, em Man husat i putim olgeta samting i stap aninit long Pikinini, na bai God i ken i stap het bilong olgeta samting.”—1 Korin 15:28.
Jisas i mekim bikpela wok tru bilong kamapim ol samting God i tingting pinis long mekim. I go inap long olgeta taim bihain, taim olgeta samting God i tingting pinis long mekim i wok long kamap tru, Jisas bai inapim tru tok em i mekim long em yet, olsem: “Mi yet mi rot na tok i tru na laip.”—Jon 14:6.