I muri iho i to Iesu bapetizoraahia, ua faaû oia i te hoê enemi tei hinaaro mau â ia taiva oia hou a haamata ˈi i ta ˈna taviniraa. Pinepine hoi to te Diabolo tamataraa i te faahema ia ˈna. I muri aˈe, ua parau Iesu no taua varua ino ra: “Te haere mai nei hoi te arii o teie nei ao e aita to ˈna e mana i nia ia ˈu.”—Ioane 14:30.

Ua ite orama te aposetolo Ioane i te tiai mai ra i “te teni rahi, te ophi i tahito ra tei piihia te Diabolo e Satani.” E tiavaruhia tera enemi ino mau o te huitaata i rapae i te raˈi. E “riri rahi” to ˈna “ua ite hoi o ˈna e e taime poto to ˈna e toe ra.” (Apokalupo 12:9, 12) Ua tano te mau Kerisetiano i te tiaturi e te ora nei ratou i taua “taime poto” ra, e fatata “te teni rahi, te ophi i tahito ra” i te tapeahia i roto i te abuso, a ore atu ai oia e ohipa faahou, 1 000 matahiti a faatere ai Iesu i roto i te Faatereraa arii a te Atua.—Apokalupo 20:1, 2.

I tera roaraa, eaha te tupu i te fenua nei to tatou nohoraa? O vai te ora i ǒ nei, e mai te aha te oraraa? Na Iesu iho i pahono mai. I roto i ta ˈna faahohoˈaraa o te mamoe e te puaaniho, ua faaite oia eaha te tiai mai ra i te feia parau-tia e au i te mamoe, o te turu e o te hamani maitai i to Iesu mau taeae. Ua faaite maitai atoa oia eaha te tiai mai ra i te feia e au i te puaaniho, o te ore e na reira. Ua parau oia: “E roohia teie nei feia [te puaaniho] i te pohe mure ore, area te feia parau-tia [te mamoe], e fanaˈo ïa i te ora mure ore.”—Mataio 25:46.

E tauturu mai ta Iesu pahonoraa ia taa i te auraa o ta ˈna i parau i te taata ohipa ino tei patitihia i nia i te pou i pihai iho ia ˈna. E ere hoê â haamaitairaa ta ˈna i fafau i taua taata ra, i ta ˈna i fafau i ta ˈna mau aposetolo haapao maitai, e riro ei mero no te Faatereraa arii o te raˈi. Ua fafau râ oia i taua taata ohipa ino ra tei tatarahapa:  “Oia mau ta ˈu e parau atu ia oe i teie mahana: Ei te paradaiso oe e o vau atoa.” (Luka 23:43) Ua nehenehe ïa taua taata ra e tiaturi e ora i roto i te paradaiso, te hoê ô nehenehe mau. E ora atoa ïa te feia e au i te mamoe i teie mahana e o te fanaˈo “i te ora mure ore” i roto i taua paradaiso ra.

Te tuea ra te reira e ta te aposetolo Ioane faataaraa mai te aha te oraraa i roto i te paradaiso i te fenua. Ua parau oia: “Tei te huitaata ra te tiahapa o te Atua, e e faaea oia ia ratou ra, e e riro ratou ei nunaa no ˈna. Ei pihai iho te Atua ia ratou. E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:3, 4.

Ia faatiahia mai ïa taua taata ohipa ino ra mai te pohe mai e ora ˈi oia i roto i te paradaiso. E ere o ˈna anaˈe te faatiahia mai. Ta Iesu ïa i haapapu: “Ua fatata te hora e faaroo ai te feia atoa i roto i te menema i to ˈna reo, a haere mai ai i rapae. E tia mai te feia i rave i te mea maitai no te ora, e te feia i rave noa i te mea ino, e tia mai ïa no te haavaraa.”—Ioane 5:28, 29.

E ta Iesu mau aposetolo haapao maitai ïa e e rave rahi atu â o te ora e o ˈna i te raˈi? Te parau ra te Bibilia e e riro “ratou ei tahuˈa na te Atua e na te Mesia, e e faatere ratou ei arii e te Mesia 1 000 matahiti.” (Apokalupo 20:6) Hou teie mau apiti e arii ai e te Mesia, e tane e e vahine ratou i te fenua nei. Papu roa e faatere mai ratou i to te fenua nei ma te aumihi.—Apokalupo 5:10.

E faaohipa Iesu i te mau maitai o to ˈna tusia i nia i to te fenua nei, a tiamâ ˈtu ai ratou i te utua o te hara no ǒ mai ia Adamu. E aratai oia e to ˈna mau apiti i te huitaata haapao maitai i te ora tia roa. I reira ïa te huitaata e fanaˈo ai i te oraraa ta te Atua i opua i te omuaraa i to ˈna parauraa ia Adamu raua Eva ia fanau e ia faaî i te fenua. E ore atoa te pohe, te utua o ta Adamu hara!

Ua oti roa ïa ia Iesu i te rave i ta Iehova i faaue ia ˈna. Ia hope ta ˈna Faatereraa tausani matahiti, e tuu atu oia i te Faatereraa arii e te fetii taata tia roa i to ˈna Metua. No teie haehaa rahi o Iesu, ua papai te aposetolo Paulo: “Ia tuuhia . . . te mau mea atoa i raro aˈe ia ˈna, i reira te Tamaiti iho e auraro atoa ˈi i te Atua tei tuu i te mau mea atoa i raro aˈe ia ˈna, ia riro hoi te Atua ei Arii hoê roa no te mau mea atoa.”—Korinetia 1, 15:28.

Papu maitai, e hopoia faufaa roa ta Iesu i roto i te tupuraa o ta te Atua opuaraa hanahana. A tamau noa ˈi taua opuaraa ra e a muri noa ˈtu, e ora iho â oia ia au i ta ˈna i parau no ˈna iho: “O vau te eˈa e te parau mau e te ora.”—Ioane 14:6.