KAPITE 139
ʼE Fakatuʼu Anai e Sesu Te Palatiso Pea Mo Fakaʼosi Tana Gaue
-
TE MEʼA ʼAE KA HOKO KI TE ʼU OVI PEA MO TE ʼU TAO
-
ʼE FAKAFIAFIA ANAI TE TOKOLAHI ʼI TE PALATISO ʼI TE KELE
-
ʼE KO SESU TE ALA, MO TE MOʼONI, MO TE MAʼULI
Hili pe tona papitema, pea neʼe tauʼi e Sesu te fili ʼae neʼe ina faigaʼi fakamalotoloto ke ina fakaheʼi ia ia ʼi muʼa ʼo te kamata ʼo tona minisitelio. ʼEi, neʼe tuʼa lahi ia te faiga ʼa te Tevolo ke ina fakahalaʼi ia Sesu. Ki muli age, neʼe ui fenei e Sesu ʼo ʼuhiga mo Satana: “ ʼE haʼu ia te pule ʼo te malamanei, pea ʼe mole feala ke ina puleʼi au.”—Soane 14:30.
ʼI te meʼa neʼe ha ki te apositolo ko Soane, neʼe sio fakatomuʼa ki te meʼa ʼae ka hoko ki “te talakone lahi, te gata ʼafeā, ia ia ʼae ʼe higoa ko te Tevolo mo Satana.” Ko te fili agakovi ʼaia ʼo te malamanei ʼe kapu ifo anai mai te lagi, mo “tona ita lahi, ʼi tana iloʼi ʼae kua nounou tona temi.” (Fakaha 12:9, 12) ʼE ʼi ai he ʼu tupuʼaga lelei ke tui ai te kau Kilisitiano ʼe natou maʼuʼuli nei lolotoga te ‘temi nounou’ ʼaia, pea ʼe kua vave li pe anai ki te vanu ia “te talakone, te gata ʼafeā” pea ʼe mole feala anai hana toe fai he gaue lolotoga te ʼu taʼu ʼe 1 000 ʼae ʼe ʼafio ai ia Sesu ʼi te Puleʼaga ʼo te ʼAtua.—Fakaha 20:1, 2.
Lolotoga te temi ʼaia, kotea ʼae ka hoko anai ki te kele, totatou nofoʼaga? Ko ai ʼae ka maʼuʼuli anai ʼi ai, pea ʼe feafeaʼi anai te maʼuli? Neʼe tali ia Sesu totonu ki te ʼu fehuʼi ʼaia. ʼI tana lea fakatata ʼo te ʼu ovi mo te ʼu tao, neʼe ina fakaha ai te meʼa ʼae ka hoko ki te kau faitotonu ʼae ʼe natou hage ko he ʼu ovi, neʼe natou lagolago pea mo agalelei ki te ʼu tehina ʼo Sesu. Neʼe ina toe fakaha foki te meʼa ʼae ka hoko kia natou ʼae neʼe mole natou fai te ʼu meʼa ʼaia, ʼae ʼe natou hage ko he ʼu tao. Neʼe ui fenei e Sesu: “ ʼE olo anai ia natou ʼaia [te ’u tao] ki te fakaʼauha heʼe gata, kaʼe ko te kau faitotonu [te ʼu ovi] ki te maʼuli heʼe gata.”—Mateo 25:46.
ʼE tokoni mai ia te manatu ʼaia ke tou mahino ki te ʼu palalau ʼae neʼe fai e Sesu ki te tagata agakovi ʼae neʼe tautau ʼi te pou ʼi ʼona tafa. Neʼe mole fakapapau e Sesu ki te tagata ʼaia te fakapale ʼae neʼe ina fakapapauʼi age ki ʼana apositolo agatonu, ʼae ke natou kau ki te Puleʼaga ʼo selo. Kailoa ia, kaʼe neʼe fakapapauʼi fenei age e Sesu ki te tagata Luka 23:43) Koia neʼe maʼu e te tagata ʼaia te ʼamanaki ʼae ke maʼuli ʼi te Palatiso, te ʼoloto taulekaleka. ʼI te ka haʼu, moka fakamauʼi anai e Sesu te hahaʼi, ko natou ʼae ʼe hage anai ko he ʼu ovi pea mo natou maʼu anai “te maʼuli heʼe gata,” ʼe natou toe maʼuʼuli anai mo natou ʼi te Palatiso.
agakovi, ʼae neʼe fakahemala: “ ʼE au tala moʼoni atu kia koe ʼi te ʼaho nei, ʼe ke nofo anai mo au ʼi te Palatiso.” (ʼE alu tahi te faʼahi ʼaia mo te fakamatala ʼa te apositolo ko Soane ʼo ʼuhiga mo te maʼuli ʼi te kele ʼi te temi ʼaia. Neʼe ina ui fenei: “ ʼE tuʼu te tapenakulo ʼa te ʼAtua ʼi te lotolotoiga ʼo te hahaʼi, pea ʼe nofo anai mo natou, pea ʼe natou liliu anai ko tana hahaʼi. Pea ʼe nofo anai te ʼAtua totonu mo natou. Pea ʼe ina holoholoʼi anai te ʼu loʼimata fuli mai ʼonatou mata, ʼe mole toe ʼi ai anai te mate, mo te putu, mo te lauga pea mo te mamahi. Ko te ʼu meʼa ʼafeā kua puli ia.”—Fakaha 21:3, 4.
Ke feala ki te tagata agakovi ke maʼuli ʼi te Palatiso, ʼe tonu anai ke fakatuʼuake. Pea ʼe mole ko ia tokotahi pe anai ʼae ka fakatuʼuake. Neʼe fakaha lelei e Sesu te faʼahi ʼaia, ʼi tana ui fenei: “ ʼE hoko mai te hola ʼae ka logo ai anai ia natou fuli ʼi te ʼu fale maka fakamanatu ki tona leʼo, pea mo natou hu mai ki tuʼa, ia natou ʼae neʼe natou fai te ʼu meʼa ʼae ʼe lelei ki te fakatuʼuake ki te maʼuli, pea ko natou ʼae neʼe natou fai te ʼu meʼa ʼae ʼe kovi ki te fakatuʼuake ki te fakamau.”—Soane 5:28, 29.
Kaʼe ʼe feafeaʼi ki te kau apositolo agatonu pea mo te tokosiʼi ʼae ka natou fakatahi anai mo Sesu ʼi selo? ʼE ui fenei ʼi te Tohi-Tapu: “ ʼE natou liliu anai ko he kau pelepitelo ʼa te ʼAtua pea mo Kilisito, pea ʼe natou hau anai mo ia lolotoga taʼu ʼe 1 000.” (Fakaha 20:6) Ko te hahaʼi tagata mo fafine ʼae ka kaugā hau anai mo Kilisito, neʼe natou maʼuʼuli ʼi te kele. Koia ʼe natou pule anai ʼi selo ki te hahaʼi ʼae ʼi te kele, ʼaki te lotomanavaʼofa pea mo te lotomahino.—Fakaha 5:10.
ʼE fakaʼaogaʼi anai e Sesu tona sakilifisio faitotogi maʼa te hahaʼi ʼae ʼi te kele pea ʼe ina fakaʼateainaʼi anai natou mai tonatou ʼuhiga agahala. ʼE ina taki anai mo ʼona kaugā hau ia te hahaʼi agatonu ki te maʼuli haohaoa. ʼEi, ʼi te temi ʼaia, ʼe fakafiafia anai te hahaʼi ʼi te maʼuli ʼae neʼe fakatuʼutuʼu ki ai e te ʼAtua ʼi te kamataʼaga, ʼi tana ui kia Atama mo Eva ke nā fakahahaʼi te kele. Maʼia mo te mate,ʼae ʼe ko te fua ʼo te agahala ʼa Atama, ʼe mole toe maʼu anai.
Koia, ʼe fakahoko anai e Sesu te ʼu meʼa fuli ʼae neʼe kole age e Sehova. ʼI te fakaʼosi ʼo tana ʼAfio Ia Taʼu ʼe Afe, ʼe fakatoʼo anai e Sesu ki tana Tamai ia te Puleʼaga pea mo te hahaʼi fuli ʼae kua haohaoa. ʼO ʼuhiga mo te faʼahi ʼaia ka fai e Sesu, ʼae ʼe ha ai tana agavaivai, neʼe tohi fenei e te apositolo ko Paulo: “Ka ʼosi tuku age anai ia meʼa fuli kia te ia, pea ʼe fakalogo anai te ʼAlo kia Ia ʼae neʼe ina tuku age ia meʼa fuli, ke liliu ai te ʼAtua ko meʼa fuli maʼa te hahaʼi fuli.”—1 Kolonito 15:28.
ʼE ha lelei mai ai ia te maʼuhiga ʼaupito ʼo te gaue ʼa Sesu moʼo fakahoko te ʼu fakatuʼutuʼu fakakololia ʼa te ʼAtua. Pea ʼi te hoko atu ʼo te ʼu fakatuʼutuʼu ki te heʼe gata, ʼe tuha anai mo Sesu te palalau ʼaeni neʼe ina fai ʼo ʼuhiga mo ia totonu: “Ko au te ala, mo te moʼoni pea mo te maʼuli.”—Soane 14:6.