SEKSON 4
Ministry Bilong Jesus Long Judea
“Askem man wea ownim planteison for sendem go olketa wakaman.”—Luke 10:2
LO DISFALA SEKSON
CHAPTER 66
Bigfala Hipap Bilong Olketa Jew Long Jerusalem
Wanem nao mekem olketa wea lisin long Jesus tingse demon stap long hem?
CHAPTER 67
Pipol Sapraes Long Toktok Bilong Jesus
Klosap evriwan long Hae Kot bilong olketa Jew againstim Jesus, bat wanfala no fraet for defendim hem.
CHAPTER 68
“Laet for Pipol Long Disfala World”
Jesus sei tru samting bae mekem man free. Free from wanem?
CHAPTER 69
Dadi Bilong Olketa Hem Abraham or Devil?
Jesus storyim hao for luksavve long olketa pikinini bilong Abraham, and tu, hu nao Dadi bilong hem.
CHAPTER 70
Jesus Healim Man wea Blind
Olketa disaepol askem wanem nao mekem man hia blind. Waswe, hem sin bilong hem? Waswe, hem sin bilong dadi and mami bilong hem? Pipol garem difren tingting taem Jesus healim hem.
CHAPTER 71
Olketa Pharisee Go Story Witim Man wea Blind Bifor
Samting wea datfala man wea blind bifor hem talem, hem mekem olketa Pharisee kros fogud. Dadi and mami wari nogud olketa raosem hem from sinagog, and hem nao samting wea happen.
CHAPTER 72
Jesus Sendem Go 70 Disaepol for Preach
Long Judea, Jesus chusim 70 disaepol and markem tufala for waka tugeta for preach abaotem Kingdom. Waswe, olketa disaepol bae go for preach long olketa sinagog or long haos bilong pipol?
CHAPTER 73
Man Long Samaria wea Showimaot Hem Lovem Narawan
Hao nao Jesus iusim datfala tokpiksa abaotem man long Samaria for teachim iumi important samting?
CHAPTER 74
Welkamim Man and Gohed Prea and No Givap
Jesus go long haos bilong Mary and Martha. Wanem nao hem teachim tufala abaotem wei for welkamim man? And bihaen datwan, wanem nao hem teachim olketa disaepol bilong hem abaotem prea?
CHAPTER 75
Jesus Storyim Wanem Nao Mekem Man Barava Hapi
Jesus story long pipol wea againstim hem abaotem ‘finger bilong God’ and wanem nao hem minim taem hem sei ‘Kingdom bilong God hem stap bat olketa no luksavve.’ Hem storyim tu wanem nao savve mekem pipol barava hapi.
CHAPTER 76
Jesus Kaikai Witim Wanfala Pharisee
Jesus showimaot olketa man wea teachim law and olketa Pharisee olketa laea. Wanem nao olketa hevi samting wea olketa mekem pipol karem?
CHAPTER 77
Jesus Givim Kaonsel Abaotem Riches
Jesus storyim tokpiksa abaotem rich man wea wakem olketa big haos for keepim olketa gud samting bilong hem. Wanem kaonsel nao Jesus talem moa abaotem nogud samting wea savve kasem man wea aftarem riches?
CHAPTER 78
Wakaman wea Faithful, Iu Mas Redi Gudfala!
Jesus showimaot hem laekem olketa disaepol for gohed strong long spiritual wei. Wanem waka nao datfala wakaman wea faithful bae duim for strongim olketa? Why nao hem barava important for redi gudfala?
CHAPTER 79
Why Olketa Jew wea No Biliv Bae Finis
Jesus sei olketa wea hem trae for helpem olketa bae gogo olketa finis sapos olketa no repent. Waswe, bae olketa lanem important samting wea Jesus trae for teachim olketa, wea hem nao for ting raonem hao nao God ting long olketa?
CHAPTER 80
Olketa Fence Bilong Sheepsheep
Wei wea man for lukaftarem sheepsheep lukaftarem gud olketa sheepsheep bilong hem showimaot Jesus lovem olketa disaepol. Waswe, bae olketa minim wanem hem teachim and followim hem?
CHAPTER 81
Jesus Wan Mind Witim Dadi, Bat Hem No God
Samfala Jew accusim Jesus and sei hem mekem hemseleva semsem witim God. Hao nao hem iusim olketa Holy Raeting for pruvim wanem olketa talem hem no tru?
