SECCIÓN 4
Jesús lichuwinan Dios kJudea
«Kaskinitit xmalana tachanan pi kakamalakgachalh tiku namakikgo xtachanan» (Lucas 10:2).
KʼUMA SECCIÓN
CAPÍTULO 66
Fiesta xla Laktsu Chiki kJerusalén
¿Tuku xlakata makgapitsi tiku kgaxmatnikgo Jesús lakpuwankgo pi laktanuma demonio?
CAPÍTULO 67
«Nikxni chuna chuwinanit chatum chixku»
Atsinu ni putum tiku tapakgsikgo ktlakg xalanka tribunal judío ni akxilhputunkgo Jesús, pero chatum tiku anta tapakgsi kgalhmakgtaya.
CAPÍTULO 68
Xkgawasa Dios wa «xmakgskgot kakilhtamaku»
Jesús wa: «Xaxlikana nakalakgmaxtuyan». ¿Niku xʼama kalagmaxtu?
CAPÍTULO 69
¿Xkamanan Abrahán, o xkamanan Akgskgawini?
Jesús wan tiku xaxlikana xTlat chu chu masiya tuku tlan nakalilakgapaskan xkamanan Abrahán.
CAPÍTULO 70
Jesús mapaksa chatum chixku tiku lakgaxokgo xlakachinit
Xtamakgalhtawakgen Jesús kgalhskinkgo tuku xlakata chixku lakgaxokgo lakachilh. ¿Wa makglakgalhinalh o xnatlatni makglakgalhinankgolh? Akxni Jesús mapaksa, latamanin tanu tanu tuku wankgo.
CAPÍTULO 71
Fariseos tlawanikgo takgalhskinin tiku lakgaxokgo xlakachinit
Tuku kawani chatum chixku tiku lakgaxokgo xwanit kamakgasitsi fariseos. Chuna la xlakpuwankgo xnatlatni uma chixku, fariseos tamakxtukgo ksinagoga.
CAPÍTULO 72
Jesús kamalakgacha 70 xtamakgalhtawakgen xlakata nalichuwinankgo Dios
Jesús kamalakgacha 70 xtamakgalhtawakgen xlakata nalichuwinankgo tamapakgsin kJudea. ¿Niku xliputsatkan latamanin: ksinagogas, o kchiki?
CAPÍTULO 73
Chatum samaritano limasiya pi paxkinan
Jesús maklakaskin liʼakxilhtit xla samaritano tiku paxkinan xlakata wi tuku lu xlakaskinka namasiya.
CAPÍTULO 74
Tlan nalamakgamakglhtinanaw chu natlawayaw oración
Akxni Jesús kalakgapaxialhnan María chu Marta, ¿tuku kamasiyani xlakata tlan nalamakgamakglhtinankan? ¿Tuku kawani alistalh xtamakgalhtawakgen xlakata tuku naskinkgo kxʼoracionkan?
CAPÍTULO 75
Jesús lichuwinan la tlan nakgalhikan tapaxuwan
Jesús kalitachuwinan xtalamakgasitsin xlitliwakga Dios chu kawani pi xTamapakgsin Dios kaj lakapala kalakgchinit. Na lichuwinan la tlan nakgalhikan xaxlikana tapaxuwan.
CAPÍTULO 76
Tawayan chatum fariseo
Jesús lichuwinan pi fariseos chu lakgtsokgkinanin lakgaputiyunankgo xlakata xtalismaninkan. ¿Tuku laktsinka takuka xafuerza kamalinikgo latamanin?
CAPÍTULO 77
Tastakyaw xlakata lhuwa tuku kgalhiputunkan
Jesús lichuwinan chatum chixku tiku xkgalhi lhuwa tumin nema tlawalh tlakg xalaklanka niku xmakilh xtachanan. ¿Tuku tastakyaw mastalh xlakata lhuwa tuku kgalhiputunkan?
CAPÍTULO 78
Skujni skgalalh xlitawilat
Jesús kalilakgaputsa xtakanajlakan xtamakgalhtawakgen. ¿La xʼama makgtayanan uma skujni? ¿Tuku xlakata lu xlakaskinka tastakyaw pi skgalalh natawilayaw?
CAPÍTULO 79
¿Tuku xlakata talakatsuwima lisputni?
Jesús kawani judíos pi komo ni makgxtakgo tuku nitlan tlawamakgo, nakamalakgsputukan. ¿Nakatsinikgo tuku Jesús kamasiyanima xlakata la natalalinkgo Dios?
CAPÍTULO 80
Xatlan mapuchwayanina chu niku kamakikan borregos
Tapaxkit nema chatum mapuchawayanina kakgalhini xborregos limasiya la kapaxki Jesús xtamakgalhtawakgen. ¿Namakgamakglhtinankgo xtamasiy chu nastalanikgo?
CAPÍTULO 81
¿Tuku wamputun pi Jesús chu xTlat kaj chatum?
Makgapitsi xtalamakgasitsin Jesús limawakakgo pi tatalakxtumima Dios. ¿La limasiya Jesús pi nixlikana?
