Kas perpekto a tao, saan a napasaran ni Jesus ti adu a pakarigatan ken pakadanagan ti dadduma a tattao. Ngem mannakipagrikna kadagiti tattao. Situtulok a tinulonganna ida, nga inaramidna dagiti bambanag a mabalin a saan koma a masapul nga aramidenna. Wen, naasian isu a natignay a tumulong kadakuada. Panunotem dagiti ulidan nga impakitana iti Kapitulo 32, 37, 57, 99.

Amin a tattao​—⁠agtutubo man ken nataengan​—⁠ammoda a mabalinda nga asitgan ni Jesus ta dina imparikna nga isu ket okupado unay wenno nangatngato ngem kadakuada. Natalged ti riknada no kaduada ni Jesus ta mariknada a maseknan kadakuada. Mabasam daytoy iti Kapitulo 25, 27, 95.

Babaen iti kararag, kanayon a nakisarita ni Jesus ken Amana, agmaymaysa man ken no kaduana dagiti pudno nga agdaydayaw. Namin-adu a nagkararag, ngem saan laeng a no pannangan. Nagkararag tapno agyaman iti Amana, agdayaw kenkuana, ken kiddawenna ti panangiwanwanna no mangaramid kadagiti napateg a desision. Usigem dagiti pagarigan a mabasa iti Kapitulo 24, 34, 91, 122, 123.

Nupay kasapulanna koma ti inana ken panaglinglingay, inyun-una ni Jesus ti kasapulan ti dadduma. Saanna nga inyun-una ti bagina. Iti kasta, nangipakita iti pagtuladan a surotentayo. Adalem no kasano a naipakita dayta nga ulidan iti Kapitulo 19, 41, 52.

Saan laeng nga insuro ni Jesus ti panagbalin a manangpakawan​—⁠impakitana dayta iti pannakilangenna kadagiti adalanna ken iti sabsabali. Utobem dagiti pagarigan a mabasa iti Kapitulo 26, 40, 64, 85, 131.

Naipadto a kaaduan a Judio saanda nga awaten ti Mesias ken isu ket papatayen dagiti kabusorna. Gapuna, mabalin koma a saan nga inkagumaan ni Jesus a tulongan dagiti tattao. Imbes ketdi, imparegtana ti pudno a panagdayaw. Nangipakita iti ulidan ti kinaregta iti amin a pasurotna a maipaspasango iti panangidumduma wenno uray iti ibubusor. Kitaem ti Kapitulo 16, 72, 103.

Natantan-ok ni Jesus ngem kadagiti imperpekto a tattao iti adu a pamay-an, kas iti pannakaammo ken sirib. Ti kinaperpektona ket talaga a nangipaay kenkuana iti pisikal ken mental nga abilidad a nangatngato ngem iti amin nga adda iti aglawlawna. Ngem sipapakumbaba a nagserbi iti sabsabali. Mabasam dagiti leksion maipapan iti daytoy iti Kapitulo 10, 62, 66, 94, 116.

Kanayon a nangipakita ni Jesus iti anus kadagiti apostolna ken iti sabsabali no saanda a matulad ti ulidanna wenno mayaplikar ti imbagana. Siaanus nga inulit-ulitna dagiti leksion a masapul a masursuroda tapno agbalinda a nasinged ken Jehova. Panunotem dagiti impakita ni Jesus nga ulidan ti kinaanus a mabasa iti Kapitulo 74, 98, 118, 135.