Nikech Yesu ne en ng’at makare ma onge richo, nitie gik moko ma ne chando dhano ma en to ne ok ochande. To e ma pod ne odewo ji gilala. Ne oikore mar kawo okang’ mar konyogi, kotimo gik ma ne nyalo nenore ni ok ochuno ni otimnegi. Ee, ne en gi chuny mar kecho ji. Inyalo somo ranyisi moko e Sula mag 32, 37, 57, 99.

Joma tindo kod joma dongo duto ne neno ni Yesu en ng’at ma chopo ire yot nimar Yesu ne ok mi ji one ni odich ahinya moonge kata gi thuolo mar bet kodgi. Bende, ok ne one ni jomoko gin joma ni piny ahinya ma ok owinjore biro ire. Nikech ji ne ofwenyo ni Yesu dewogi, ne gin thuolo dhi ire. Mondo ine mano maber, som Sula mag 25, 27, 95.

Kinde mang’eny, Yesu ne jawuoyo gi Wuon mare e lamo kotimo kamano gi kinda. Notimo kamano ka en kar kende kata ka en e lela gi joma lamo Nyasaye gadier. Nolemo kinde mang’eny, to ok mana e seche mag chiemo kende. Nolemo kogoyo erokamano ne Wuon mare, kopake, kendo komanyo kony kuome ka pok okawo okang’ mar timo yiero moro maduong’. Non ane ranyisi ma yudore e Sula mag 24, 34, 91, 122, 123.

Nitie kinde ma Yesu ne ool ma ne onego obed ni oyueyo, to e ma pod ne oketo dwach jomoko motelo mondo mi okonygi. Ne ok oherore kende owuon. Omiyo, ne oketonwa ranyisi maber ma dwarore ni waluw machiegni. Inyalo somo mondo ine kaka Yesu ketonwa ranyisi maberno e Sula mag 19, 41, 52.

En adier ni Yesu nopuonjo ni ji onego owe ne jomoko kethogi. To ok mano kende, en owuon nonyiso chunyno kuom weyo ne jopuonjrene kod jomamoko nyawogi. Som kendo ipar matut kuom ranyisi ma ne oketono e Sula mag 26, 40, 64, 85, 131.

Ne okor ni thoth Jo-Yahudi ne dhi tamore rwako Mesia, kendo ni jowasike ne dhi nege. Omiyo, Yesu ne nyalo bedo gi chuny mar timo mana manok ne ji nikech luoro. Kar mano, ne en jakinda sidang’ e siro lamo madier. Ne oketo ranyisi maber ne jolupne duto ni onego gibed gi kinda sama giromo gi akwede kata sama giromo gi joma ok rwak wach ma giyalo. Som Sula mag 16, 72, 103.

Yesu ne oloyowa e yore mang’eny nimar wan dhano monyuol e richo. Kuom ranyisi, nong’eyo gik mang’eny kendo ne oriek moloyowa. Nikech ne en ng’at makare ma onge gi richo, teko ma ne en-go kod pache ne ni malo ahinya moloyo ma jomamoko ne nigo. To e ma pod ne obolore mondo oti ne jomamoko. Inyalo yudo puonj e wi wachni kisomo Sula mag 10, 62, 66, 94, 116.

Kinde duto Yesu ne onyiso chuny mar horuok sama jootene kaachiel gi jomamoko ne ok luw ranyisine kata timo kaka nopuonjogi. Ne onyiso horuok kuom puonjogi weche moko nyadinwoya mondo okonygi sudo machiegni gi Jehova. Inyalo somo ranyisi moko ma nyiso kaka Yesu ne hore e Sula mag 74, 98, 118, 135.