Nto mulopwana oophaameya, Yesu haahoolenle makacamiho ni sawuukhula seiyo achu akina yaahoolenlaaya. Naamwi hiiha owo aahooniherya othanana otokweene ntakhara achu. Owo aaniilipiserya owaavya achu, eyo ti wi opaka ichu opwaha saakhweleyaayavo. Chiryene, oreera murima waahimweeriha waakhaviherya akina. Moone sootakiherya sa seiyo mu Miyaha 32, 37, 57, 99.

Achu a mukhalelo woothene—amiravo ni awunnuwelavo—yaanoona wi yaanaphwanela omwaacamela Yesu woona wi hooniherya wi aatepa oweiwa naari wi aari ookhweleyasa. Woona opwacha Yesu aareiyeno ni yaawo, waakhala wookhweya achu omwaacamela. Wi moone yeeyo, mvarerye mu Miyaha 25, 27, 95

Wiiliwiili Yesu anarukunuwela wa Tiithi awe ni nivekelo na vathi vamurima, mmapuro awiipitheya ni vaava aakhaleiye ni alapeli eeparipari. Owo aanavekela mu ikwaha sincipale, ohiya pahi mu ilukuluku sa yoolya. Aanavekela wi amuthamalele Tiithi awe, wi amucicimihe, nave wi aavya ohoolela ahaakumve opaka yoolakelela yookhweleya. Muthokororye sootakiherya sinaphwanyeya mu Miyaha 24, 34, 91, 122, 123.

Mu ikwaha ikina vaavaa aaphwaneleiye okumiha mphurelo moorweela wa wiichuuwa ni okhala oomaaleleya, Yesu aanahela okhwipi soochuna sawe wi aakhaviherye akina. Owo haarino moonelo wa ochuna mphurelo awe. Mu weerano hiiha, oovahererya yootakiherya nnaphwanelaahu ochariha vakhiviru khiviru. Muhuserya mukhalelo yootakiherya yeela enooniheryiwaaya mu Miyaha 19, 41, 52.

Yesu oopaka sincipale opwaha ohusiha vooloca sa okhweleya waya olevelela—owo aahooniherya olevelela mmikhalelo soohiyanahiyana ni amuhuserya awe vamoha ni akina. Muupuwelele sootakiherya sinaphwanyeya mu Miyaha 26, 40, 64, 85, 131.

Yaahiloheryiwa wi Ayuta ancipale yaahaala okhooca omweemererya Mesiya nave wi amwiicani awe yaahaala omwiipha. Mwawiihiiha waahaala okhala wookhweya Yesu opaka ichu vakhaani. Opwaha yeeyo, mwamvai aahimwaramwasa malapelo eeparipari. Owo ootikitherya yootakiherya ya mvai wa oomuchara awe oothene yaawo anahoolela oheemereryiwa naari wiikariwa. Moone Miyaha 16, 72, 103.

Yesu aari mutokweene waapwaha achu mmikhalelo soohaalakhanyeya, hiiha ntoko masuwelelo ni miruku. Ophaameya wawe moohikhwa minikwa waahimvaha mavyakelo oomwiilini ni mmuupuweloni opwaha muchu vyakala aareiyeno. Naamwi hiiha, mwawiiyeviha aahaarumeela akina. Munanwerya ophwanya soohusiha vooloca sa yeeyo mu Miyaha 10, 62, 66, 94, 116.

Yesu aahooniherya ovilela moohihiyererya ni arummwa awe vamoha ni akina vaavaa awo yaahesaaya ochariha yootakiheryaawe naari opharihela yeeyo aaloceiye. Moovilela aahuuluulela mahusiheryo yaawo awo yaachunaaya wi ewerye omwaacamela Yehova. Mucharihe yootakiherya ya ovilela wa Yesu mu Miyaha 74, 98, 118, 135.