Na Hẹrokele i Jesu Ene vi . . .
DJE ARODỌMẸ PHIA
Ri Jesu o rhiẹ ohworho rọ gbare na, o rhiẹromẹrẹn ebẹnbẹn ọrhẹ edamẹ rẹ ituakpọ erọrọ e rhiẹromẹrẹ-ẹn. Udabọ ọrana, o dje arodọmẹ rẹn ihworho. O mwuegbe rọ nọ ha userhumu rẹn aye, tobọ ru vrẹn oborẹ a guọlọre. Itiọrurhomẹmro, arodọmẹ yo mwuie ha userhumu rẹn awọrọ. Roro kpahen idje na uvuẹn Irhomu-ẹmro 32, 37, 57, 99.
RHIẸ ERẸ AWỌRỌ INA SABU TIKẸRẸ
Ihworho ri ha ẹgbukpe sansan, nọyẹ emọvwerhe ọrhẹ imirẹghwa, i sabu bru i Jesu nya fọkime ọ vwọ kparoma yanghene ni omayen gegerege-e. Omarana ihworho na sabu vwo ẹhẹn ro totọre, aye i rhe bru i Jesu rhe. Wu na sabu mẹrẹn ọnana uvuẹn Irhomu-ẹmro 25, 27, 95.
RHA NẸRHOMO
Ọke ephian yi Jesu o lele Ọsẹ ye tẹmro nyoma ẹrhomo, Jesu ọ nẹrhomo ọke ọye ọvo ọ havwiẹ ọrhẹ udaro awọrọ ra ga Osolobrugwẹ. Ọ nẹrhomo uvuẹn erhirhiẹ sansan, ukperẹ ono rhiẹ ọke rọ guọlọ riẹ emaren ọvo. Ọ nẹrhomo ekpẹmẹ ọrhẹ ujiri vwe Ọsẹ ye, jeghwai nekpẹn ọkpọvi mie yi o ki brorhiẹn eghwaghwa. Roro kpahen idje na uvuẹn Irhomu-ẹmro 24, 34, 91, 122, 123.
RHA HA EDAMẸ AWỌRỌ KARO
Ọkezẹko, dedevwo Jesu ọ guọlọ ronmoma vẹrhẹ bi, nọ ha edamẹ awọrọ kobaro rẹn edamẹ enẹyen. O roro kpahen omayen ọvo-o. Nyoma ọnana, no dje udje rhotọre rẹ ọwan ina sabu hẹrokele. Dabu roro kpahen udje ro djephia uvuẹn Irhomu-ẹmro 19, 41, 52.
RHA HARHOMẸ
Jesu ọ ghwai yono ihworho taghene aye i harhomu awọrọ ọvo-o, ukpomaran o dje udje na rhotọre nyoma rọ harhomu idibo yi ọrhẹ awọrọ. Roro kpahen idje ri ha uvuẹn Irhomu-ẹmro 26, 40, 64, 85, 131.
VWO ORURU
A mẹraruiẹ rhotọre taghene itu i Jew na i rhiabọ dede i Messiah na-a, evwreghrẹn yen ine ji kpe yi hwu. Omarana, manẹ i Jesu o vwo fiomarhọ owian ra yẹriẹ na-a. Ukpomaran, o vwo oruru ọgbogbanhon kpahen ogame urhomẹmro na. Jesu o dje omamọ udje rẹn idibo yi ra kparahasua, yanghene re vwe rhiabọ dede owian aye. Se Irhomu-ẹmro 16, 72, 103.
VWO OMERIOTỌRE
Jesu ọ do ghwẹ ituakpọ ri vwa gba uvuẹn izede sansan, jerẹ irherhe ọrhẹ ẹghwanren ọnẹyen. Nime Jesu ohworho rọ gbare, no vwo omẹgbanhon ọrhẹ ẹghwanren ghwẹ ihworho erọrọ. Udabọ ọrana, o vwo omeriotọre ha userhumu rẹn awọrọ. Wu na mẹrẹn idje enana uvuẹn Irhomu-ẹmro 10, 62, 66, 94, 116.
VWO ERHIONRIN
Ọgbọ buebun yi Jesu o vwo erhionrin kpahen inyikọ ye ọrhẹ awọrọ ri vwe kwe nyalele udje yi, yanghene ru lele oborẹ ọ tare. O vwo erhionrin ọke rọ vwanriẹn oborẹ o yonirin aye vrẹn ne, neneyo aye i sabu tikẹrẹ i Jehova. Roro kpahen udje erhionrin i Jesu uvuẹn Irhomu-ẹmro 74, 98, 118, 135.