Jesusca perfectomi carca. Chaimandami gentecuna charishca problemacunata o preocupaciongunataca na yapa charirca. Shinapash Jesusca gentecunamandaca ninandami preocuparirca. Chaimandami paicunata ayudangapaca ninanda esforzarirca. Jesusca gentecunata ayudana cashcamandallaca na ayudarcachu, chaipa randica shujcunata ninanda juyaimandami ayudarca. Cai libropa capítulo 32, 37, 57 y 99​pimi Jesús imashina gentecunata juyaihuan tratashcata ricui ushapangui.

Jesusca shujcunamanda yali cashcataca na pensanllu carca. Chaimandami tucui laya gentecuna Jesuspamanga quimirinlla carca. Paicunamanda preocuparijta ricushpami gentecunaca Jesushuan ali sintirin carca. Cai libropa capítulo 25, 27 y 95​pimi Jesusca tucui gentecuna paiman quimirichun saquishcata ricuchin.

Jesusca Taita Diosta sirvij gentecunapa ñaupajpi cashpa o pailla cashpapash Taita Diostaca siempremi mañan carca. Jesusca oracionda rurajushpaca Taita Diosta alabangapaj y agradicingapami mañan carca. Shinallata shuj desicionda nara agllashpallatami siempre Taita Diospa ayudata mañan carca. Cai libropa capítulo 24, 34, 91, 122 y 123​pimi Jesuspa rurashca oraciongunamanda ashtahuan yachajui ushapanchi.

Jesusca shaijushca cashpapashmi shujcunata ayudashpa catirca. Jesusca na paipilla preocuparircachu. Jesusca shujcunapa munaita pundapi churashpami ñucanchicunamanga shuj alipacha ejemplota saquirca. Chaitaca cai libropa capítulo 19, 41 y 52​pimi ashtahuan ricupangui.

Jesusca shujcunata perdonana importante cashcatami yachachirca. Shinapash shimilla nishpaca na yachachircachu. Chaipa randica shujcunata, paipa apostolcunata perdonashpami ricuchirca. Jesús imashina shujcunata perdonashcataca cai libropa capítulo 26, 40, 64, 85 y 131​pimi ashtahuan ricupangui.

Mesiasmanda parlaj profeciacunaca judiocuna imashina Jesusta llaquichishpa huañuchinatami ricuchijurca. Llaquichi tucunata Jesús yachashpaca Taita Diostaca cazuna cashcamandallami cazuita ushanman carca. Shinapash chaitaca na rurarcachu. Chaipa randica Jehová Diosta tucui shunguhuan cazungapami ninanda esforzarirca. Jesusca paipa ejemplohuanmi jarcaicunata charishpa o problemacunata charishpapash Jehová Diosta tucui shunguhuan sirvishpa cati ushashcata ricuchirca. Chaitaca cai libropa capítulo 16, 72 y 103​pimi ricui ushapangui.

Jesusca gentecunata yalimi ashtahuan ali yachaita charirca. Paica perfectomi carca. Chaimandami shuj gentecunaca paishna ruraita o pensaitaca na usharca. Jesusca perfecto cashpapash humilde caimandami shujcunatapash sirvirca. Cai libropa capítulo 10, 62, 66, 94 y 116​pimi Jesús humilde cashcata imashina ricuchishcata yachajui ushapangui.

Jesusca paipa apostolcuna, shuj gentecunapash paipa yachachishcacunata na uchalla pactachijpica na culirashpami pacienciahuan shuyarca. Jesusca Jehová Diosman ashtahuan quimiringapaj imata rurana cashcatami pacienciahuan cutin cutin yachachin carca. Cai libropa capítulo 74, 98, 118 y 135​pimi Jesús shujcunata imashina pacienciahuan tratashcatami ricui ushapangui.