Jisas i gutpela olgeta, olsem na em i no karim hevi bilong sik. Maski i olsem, taim em i lukim ol manmeri i gat bagarap long bodi o ol man i krai sori long wanpela ol i laikim tumas i dai, em i pilim tru hevi bilong ol na em i helpim ol. Tru tumas, Jisas i gat pasin sori. Skelim olsem wanem Jisas i kamapim dispela pasin long Ol Sapta 32, 37, 57, 99.

Olgeta manmeri i amamas long toktok wantaim Jisas, long wanem, em i gat pasin isi na em i redi long helpim ol. Em i toktok gut wantaim ol manmeri na mekim gut long ol, olsem na ol i laik stap klostu long em. Kisim save long olsem wanem Jisas i kamapim pasin isi long Ol Sapta 25, 27, 95.

Jisas i save beten long Papa bilong em long olgeta kain taim. Em i beten taim em wanpela i stap, taim em i bung wantaim ol wanbilip, na long taim bilong kaikai tu. Em i beten bilong tok tenkyu long Papa bilong em, bilong litimapim nem bilong em, na bilong stiaim em taim em i mekim ol bikpela disisen. Skelim pasin bilong Jisas long beten long Ol Sapta 24, 34, 91, 122, 123.

Jisas i gat pasin bilong tingim tru ol narapela. Em i mas wokabaut long ol ples i longwe tru bilong autim gutnius, na sampela taim em i pilim taiet. Maski i olsem, em i daunim laik bilong em yet bambai em i ken helpim ol manmeri. Em i stap gutpela piksa yumi ken bihainim long pasin bilong tingim narapela. Skelim gut olsem wanem Jisas i kamapim dispela pasin long Ol Sapta 19, 41, 52.

Jisas i skulim ol man long kisim pasin bilong fogivim narapela. Em i kamapim dispela pasin taim em i stap wantaim ol disaipel bilong em na long taim em i stap wantaim ol narapela. Tingim tingim pasin bilong Jisas long fogivim narapela taim yu ritim Ol Sapta 26, 40, 64, 85, 131.

Baibel i tok profet olsem planti Juda bai sakim Mesaia, na ol birua bai kilim em i dai. Jisas i save long ol dispela tok, tasol em i givim bel tru long autim tok na helpim lotu i tru. Em i stap gutpela piksa long pasin bilong givim bel tru long autim gutnius. Ol disaipel bilong Jisas husat i karim hevi long ol man i birua long ol inap kisim gutpela skul long pasin bilong em. Lukim Ol Sapta 16, 72, 103.

Jisas i gat bikpela strong na gutpela savetingting. Save bilong em i winim save bilong ol man long graun. Maski i olsem, em i mekim pasin daun na helpim ol manmeri. Yu inap kisim planti gutpela skul long olsem wanem Jisas i mekim pasin daun long Ol Sapta 10, 62, 66, 94, 116.

Jisas i gat pasin bilong i no les kwik. Sampela taim, ol aposel na ol narapela disaipel i no bihainim pasin bilong em na ol tok em i autim, tasol em i no les kwik long ol. Jisas i wok yet long skulim ol bambai ol inap go klostu moa long Jehova. Kisim save long pasin bilong Jisas long i no les kwik long Ol Sapta 74, 98, 118, 135.