Gesù l’era un omo perfeto, par quela, lu no’l ga mia bio pensieri e dificoltà come noantri. Ancora cossita, lu l’era bon de capir quel che le persone le sentia. Gesù el se sforsea par giutarle e el fea arquante robe che i altri i catea che no ghen’era mia bisogno. Infati, lu el se preocupea pròpio de cuor cole persone e par quela le ga giutade. Varda esempi de quel che lu el fea nei capìtoli 32, 37, 57, 99.

Fusse veci o gióveni, nissuni gavea paura de rivarse darente de Gesù. Lu no’l mostrea mai che l’era pien de laori de far e no’l se catea massa importante par scoltarli. Le persone le se sentia ben de star insieme con Gesù, parché le vedea che lu el gavea pròpio interesse par lore. Varda questo nei capìtoli 25, 27, 95.

Gesù sempre el preghea de cuor quando l’era lu sol e anca insieme a altre persone che le adorea a Dio. Lu el preghea diverse volte, no so’l quando ndea magnar. Nele so orassion, Gesù el ringrassiea el so Pare, lo lodea e el domandea el so aiuto vanti de far qualche dessision importante. Varda i esempi che ghen’è nei capìtoli 24, 34, 91, 122, 123.

Quando l’era stufo, Gesù el ga assà de riposar par darghe atension ale persone. Lu no’l pensea prima in lu e sol dopo nei altri. Cossita, lu el ne ga assà un bel esémpio e podemo far compagno a lu. Ledi sora questo nei capìtoli 19, 41, 52.

Gesù no’l ga sol dito che le persone le gavea de perdonar sempre. Invesse, el ga insegnà par meso del so esémpio che lu l’era perdonador coi so dissìpoli e anca coi altri. Pénsaghe sora i esempi che ghen’è nei capìtoli 26, 40, 64, 85, 131.

Gesù el savea che tanti giudei no ndaria mia acetar che lu l’era el Messia e che i so nemighi i ndaria coparlo. Par quela, Gesù el podea pensar che no ocorea far tanto par giutar quele persone. Invesse, el ga fato el meio che el podea par giutarle a adorar a Dio dela maniera giusta. Ancoi, anca i seghidori de Gesù i ga de infrontar oposission e tanti no i ghe bada e gnanca i ghe crede. Alora, el esémpio de Gesù el mostra che i so seghidori anca i ga de far el so meio de tuto el cuor nel laoro a Geovà. Varda i capìtoli 16, 72, 103.

Gesù l’era tanto meio dei altri parché lu l’era perfeto e el gavea tanta cognossensa e sabedoria. Par quela, lu l’era bon de far tante robe e de capir tante robe che i altri no i era mia boni. Ancora cossita, lu sempre l’è stà ùmile e el ga servio ai altri. Te pol catar arquante lession sora questo nei capìtoli 10, 62, 66, 94, 116.

Gesù sempre el ga portà passiensa quando i so apòstoli o altre persone no i fea compagno a lu e no i metea in pràtica quel che lu insegnea. Con passiensa, Gesù el ga seità a insegnarghe quel che le gavea de far par esser amighe de Geovà. Pénsaghe sora come Gesù l’è stà passiente nei capìtoli 74, 98, 118, 135.