Sábado urunjja Jesusajj Jerusalén markankaskänwa. Discipulonakapampi markan sarnaqaskäna ukhajja, nasïwitpach juykhu mä mayjasiri jaqeruw uñjapjjäna. Akham sasaw Jesusar jisktʼapjjarakïna: “Rabí, ¿aka jaqen juykhu nasiñapatakejj khitis juchanïpacha, jupati jan ukajj awk taykapacha?” sasa (Juan 9:2).

Discipulonakajja, ‘¿maynejj taykapan purakapankkasin juchachasispati?’ sasaw jisktʼasipjjpachäna. Jesusasti sänwa: “Janiw aka jaqes ni awk taykapas juchanïkiti, jan ukasti Diosan luratanakapajj jupan uñjasiñapatakiw ukajj pasäna” sasa (Juan 9:3). Ukhamajj janiw uka juykhu jaqesa ni awk taykapasa ukham nasiñapatakejj juchanïpkänti. Jan ukasti Adanan juchachasitapatwa taqenejj jucharar nastanjja, ukatwa nasïwitpach juykhunakas utjaraki. Ukampis uka jaqen juykhu nasitapajja, Diosan luratanakap uñachtʼayañapatakiw Jesusar yanaptʼäna. Jesusajj waljaniruw usunakapat waliptayäna, ukhamatwa Diosan luratanakap uñachtʼayäna.

Jesusajj kunatsa ukanak jankʼak lurañapäna ukjja akham sasaw qhanañchäna: “Khititï nayar khitankitu ukan lurañanakapjja, urükipan lurañasawa. Arumajj jutaskiwa, janirakiw khitis arumajj trabajkiti. Akapachankkasasti nayajj akapachan qhanapätwa” sasa (Juan 9:4, 5). Cheqansa Jesusajj jiwayatäsin niyaw chʼamak sepulturar imantatäjjañapäna, ukanjja janiw kunsa lurkaspänti. Uka uru puriniñapkamajja, Jesusajj akapachan qhanaskakïnwa.

Jesusajj ¿uka jaqer qollpachänti? ¿Kunjamsa qollpachäna? Jesusajj oraqeruw thusnoqäna, ukatjja uka thusunqallamp ñeqʼechtʼasaw uka jaqen nayranakapat uchtʼäna, sarakïnwa: “Siloam estanquer sarasin jareqasinim” sasa (Juan 9:7). Uka jaqesti Jesusar istʼasajj saränwa, jareqasïna ukhasti uñj-jjänwa. Ukham uñj-jjasajj ¡wal kusispachäna!

Vecinonakapasa juykhut uñtʼapkäna ukanakasa wal musparapjjäna, sapjjarakïnwa: “¿Janit jupajj qontʼasisin mayjasirïkäna uka jaqëki?” sasa. Yaqhepajj “juparakisä” sasaw sapjjäna. Yaqhepasti jan creyirjamäsajj “janiw jupäkiti, ukampirus jupar uñtasitawa” sapjjarakïnwa. Uka jaqejj sarakïnwa: “Nayätwa” sasa (Juan 9:8, 9).

Ukatwa jupar jisktʼapjjäna: “Ukhamajj ¿kunjamarak mayamp uñj-jjtasti?” sasa. Jupajj sänwa: “Jesús sat jaqew ñeqʼechtʼasin nayranakajat uchitu, ‘Siloam estanquer sarasin jareqasinim’ sasaw sarakitu. Ukatwa nayajj jareqasir sarta, ukhamatwa uñj-jjarakta” sasa. Jupanakasti jisktʼasipkakïnwa: “¿Kawkinkarak uka jaqesti?” sasa. Mayjasiri jaqejj “janiw yatkti” sasaw säna (Juan 9:10-12).

Ukatsti uka jaqerojj fariseonakan ukaruw irpapjjäna, jupanakasti kunjamatsa jumajj uñj-jjta  sasaw jisktʼapjjarakïna. Jupasti sänwa: “Ñeqʼempiw jupajj nayranakajat uchtʼitu, ukatjja jareqasiraktwa, ukhamatwa nayajj uñj-jjta” sasa. Fariseonakajj uka mayjasir jaqen walikëjjatapat kusisiñat sipansa, antisakiw Jesús contra parlañ qalltapjjäna, akham sasa: “Jupajj janiw Diosan khitanit jaqëkiti, sábado uru jan imatap layku” sasa. Yaqhepasti sapjjarakïnwa: “¿Kunjamarak mä jucharar jaqejj uka kasta milagronak luraspasti?” sasa (Juan 9:15, 16). Jupanak taypin tʼaqjjtañaw utjäna.

Ukham jupanakkam tʼaqjjtañ utjatap uñjasajja, mayampiw uka juykhu jaqer akham jisktʼapjjäna: “Niyakejjay nayranakam qollstamjja, ¿jumajj uka jaqet kamstasa?” sasa. Uka jaqesti jan pächasisaw Jesusat akham säna: “Jupajj mä profetawa” sasa (Juan 9:17).

Fariseonakajj janiw uka jaqer creyipkänti. Jesusampi uka juykhu jaqempejj jaqenakar engañjañatakiw mä amtar puripjjpacha sasaw amuyapjjpachäna. Ukatwa uka jaqejj juykhupunit nasïna janicha uk yatiñatakejj awk taykapampi parlapjjäna.