Yésu a ngi yii i Yérusalem inyu Sabat. Kiki nye ni banigil bé ba yé hiôm mu tison, ba ntehe mut njagi a bi gwéé ndim. Banigil ba Yésu ba mbat nye le: “A Rabi, njee a bi boñ béba ndi i mut nunu a gwéé ndim, nyemede tole bagwal bé?”​—Yôhanes 9:2.

Banigil ba ta bé kal le mut munu a bi niñ ngim homa ilole a ngwéé, het a bi boñ béba. Ndi ba mbadba too mut a nla boñ béba a bak ikété libum li nyañ. Yésu a nkal bo le: “To i mut nunu, to bagwal bé ba bi boñ bé béba, ndi hala a nti njel le bôt ba tehe minson mi Nyambe inyu yé.” (Yôhanes 9:3) Jon mut nunu, to bagwal bé, ba bi boñ bé béba tôbôtôbô kayéle mut nunu a gwéé ndim. Maselna ni hala, i mbus béba i Adam, bôt ba binam bobasôna ba ngwééna bilem kiki bo ndim. Libak li ndim li mut nunu li nti Yésu pôla i unda mimpémba mi mam mi Djob mu kiki a bi bôk a mbuubaha bôt bape.

Yésu a ñunda le mam ma ma nlama pala bôña. A nkal le: “Di nlama boñ minson mi Nu a bi ep me ngéda kel i ngi yii; inyule ngéda u w’a sude, mut to wada a’ la ha bé sal. Ntel me yé i nkoñ isi, men me yé mapubi ba nkoñ isi.” (Yôhanes 9:4, 5) Ndék ngéda Yésu a ga jôp i jiibe li nyemb, i het a ga la ha bé boñ yom yo ki yo. Ndi ilole i ngéda i i nkola, a yé lingen li mapubi ma nkoñ isi.

Yésu a gwé ngôñ i mélés mut nu, kii a mboñ? Yésu a ntjôle matai isi, a bôô mo ni biték, i mbus a nha mo mut ndim i mis a kal nye le: “Ke nogop i titimba i Silôam.” (Yôhanes 9:7) Mut a nôgôl. Kiki a mboñ hala, a tehna! Hégda maséé a gwé mu kiki a ntehna inyu ngélé bisu i niñ yé!

Bôt ba libôga jé ni bape ba ba bé yi le a yé ndim ba yé nhelek. Ba nkal le: “I mut nunu nyen a bééna lem i yén inyu yagal, hala bé?” Bana bo: “Nye nu.” Bape ba neebe bé hala, ba nkal le: “To! A mpôôna ndik nye.” Nyemede a kalak ndik le: “Me nu.”​—Yôhanes 9:8, 9.

Jon ba mbat nye le: “Lelaa ni mis moñ ma nyibla?” A timbhe le: “I mut ba nsébél le Yésu a mbôô biték, a hoo me gwo i mis, a kal me le: ‘Ke nogop i Silôam.’ Jon me bak me ke, me nogop, me kahal tehna.” Ba mbat ki nye le: “Hee i mut nu a yé?” Mut njagi a ntimbhe bo le: “Me nyi bé.”​—Yôhanes 9:10-12.

Bôt ba nkena mut nu yak Farisai, i yok i gwé ngôñ i yi lelaa a ntehna. A ntoñle bo le: “A bak a hoo me biték i mis, me ke  me nogop, jon me ntehna.” Hala a bé lama kônha Farisai maséé le mut njagi a mbôôp. Iloo hala, ba ñôm Yésu nsohi. Ba nkal le: “I mut nunu a ta bé mut Nyambe inyule a noñ bé mbén Sabat.” Ndi bape ba nkal le: “Lelaa mut nu a yé mboñbéba a nla boñ nya biyimbne ini?” (Yôhanes 9:15, 16) Jon ba yé mbaglak.

Mu kiki nôgla i ta bé ipôla yap, ba nhielba ba bat mut le: “Kii u nkal inyu yé, hala kiki mis moñ mon a nyibil?” Ibabé pééna, a ntimbhe le: “A yé mpôdôl.”​—Yôhanes 9:17.

Lôk Yuda i ntjél hémle jam li. Bebek ba nhoñol le Yésu a nôgla ni mut nu inyu lembe bôt. Ba nkit le i mbéda le ba bat bagwal ba mut njagi ibale man wap a bi gwéé toi ndim.