Zezi te o Zerizalɛmun lɛ. Kɛ Wunmiɛn-lolɛ-cɛn’n nun’n, ɔ nin i sɔnnzɔnfuɛ’m bé sín klɔ’n nun’n, be wunnin aɲinsifuɛ kun. Ɔ nin i sɔ’n fin i nin klun. Yɛ i sɔnnzɔnfuɛ’m be usɛli i kɛ: “?Rabi, wan yɛ ɔ yoli sa tɛ mɔ i ti yɛ kɛ bé wú bian nga’n i ɲin ti siwa-ɔ? ?I bɔbɔ annzɛ i si nin i nin-ɔn?”​—Zan 9:2.

Zezi i sɔnnzɔnfuɛ’m be si kɛ bian sɔ’n w’a tranman lika uflɛ ka naan b’a wu i asiɛ’n su wa naan se kɛ ɔ yoli sa tɛ wie lɔ. Sanngɛ be usali be wun sɛ ba kun m’ɔ o i nin i ku sɛ nun’n, ɔ kwla yo sa tɛ-o. Zezi tɛli be su kɛ: “Nán kɛ bian nga annzɛ i si nin i nin be yoli sa tɛ ti-ɔ. Sanngɛ be wuli i sɔ naan sran’m be wun junman nga Ɲanmiɛn di’n.” (Zan 9:3) I sɔ’n kle kɛ bian sɔ’n i si nin i nin b’a yoman sa tɛ wie ti yɛ be wuli i aɲinsifuɛ-ɔ. Sanngɛ sa tɛ nga Adan yoli’n ti’n, fɔ’n wo e kwlaa e nun. I ti yɛ e kwlaa e tɔ tukpacɛ’n niɔn. I wie yɛle bian m’ɔ ti aɲinsifuɛ’n i liɛ’n. Bian sɔ’n i tukpacɛ’n ti’n, Zezi kwla kleli kɛ Ɲanmiɛn di junman dan. Zezi yoli sran’m be juejue blɛ wie nun fa kleli sɔ.

Zezi kannin ndɛ kun kleli kɛ ɔ fataman kɛ ɔ sisi i bo naan w’a di Ɲanmiɛn junman’n. Ɔ seli kɛ: “Blɛ mɔ lika’n te kpaja’n, ɔ fata kɛ e di Sran sɔ’n i junman’n. Lika’n su wa san, yɛ kɛ lika’n ko san’n, sran fi kwlá diman junman kun. Blɛ mɔ n te wo mɛn’n nun’n, min yɛ n ti mɛn’n i kannin’n niɔn.” (Zan 9:4, 5) Kɛ Zezi wá wú mɔ bé síe i’n, ɔ su kwlá yoman like fi kun. Ɔ maan ɔ ti kɛ lika’n w’a san sa. Sanngɛ lele nin i kɛ blɛ sɔ’n jú’n, Zezi kpája kɛ kannin sa mɛn’n nun titi.

?Zezi wá yó maan bian sɔ’n wún ase? ?Sɛ ɔ́ wá yó i sɔ liɛ’n sakpa’n, wafa sɛ yɛ ɔ́ yó-ɔ? Ɔ tili i nuan nzue’n tɛli i asiɛ wun. Kpɛkun ɔ fɛli i nuan nzue’n kpitali fa. I sin’n, ɔ fali fa sɔ’n kpɛli bian’n i ɲin su naan w’a se i kɛ: “Ko wunnzin Siloamun nzue gble’n nun.” (Zan 9:7) Yɛ ɔ ko wunnzinnin nun-ɔn. Kɛ ɔ́ sɛ́ i sin’n, w’a wun ase! Kɛ be wuli i lele’n kpɛ klikli ng’ɔ́ wún ase’n, yɛ o lɛ-ɔ. Nanwlɛ, ɔ yoli i fɛ dan!

I sɔ’n boli i tranfuɛ mun nin be nga laa be wunnin i kɛ ɔ srɛsrɛ like’n, be nuan dan. Be usali kɛ: “?Nán bian nga yɛ titi’n, ɔ tran srɛsrɛ like’n niɔn?” Sran wie’m be waan: “I-ɔ.” Sanngɛ be wie’m b’a faman su. I sɔ’n ti’n, be seli kɛ: “Nɛ́n i-ɔ, sanngɛ ɔ fɛ i.” Bian’n bɔbɔ tɛli su kɛ: “Min-ɔn.”​—Zan 9:8, 9.

Ɔ maan be usɛli i kɛ: “?Ɔ yo sɛ yɛ ɔ ɲinma’n tikeli-ɔ?” Ɔ tɛli su kɛ: “Bian mɔ be flɛ i kɛ Zezi’n, ɔ kpitali fa, ɔ fa kpɛli min ɲin su, yɛ ɔ seli min kɛ, ‘Ko wunnzin Siloamun nzue’n nun.’ Ɔ maan n ko wunnzinnin nun, yɛ n wunnin ase-ɔ.” Kɛ ɔ seli sɔ’n, be seli i kɛ: “?Bian sɔ’n wo nin?” Ɔ tɛli su kɛ: “N siman lika ng’ɔ ɔli’n.”​—Zan 9:10-12.

Be fali bian’n ko kleli Farizifuɛ mun. Farizifuɛ’m be kusu be kunndɛ kɛ bé sí wafa nga bian’n wunnin ase’n. Bian’n seli be kɛ: “Ɔ fali fa kpɛli min ɲin su. N ko wunnzinnin yɛ n wunnin ase-ɔ.” Nanwlɛ, juejue mɔ bian yoli’n ɔ fata kɛ ɔ yo Farizifuɛ’m be fɛ.  Sanngɛ w’a yoman sɔ. Be kannin Zezi i wun ndɛ tɛ. Wie’m be seli kɛ: “Nán Ɲanmiɛn yɛ ɔ sunmannin bian nga-ɔ. Afin ɔ ciman Wunmiɛn-lolɛ-cɛn’n.” Sanngɛ wie’m be seli kɛ: “?Sɛ sran kun ti sa tɛ yofuɛ’n, ɔ kwla yo abonuan sa kɛ nga sa?” (Zan 9:15, 16) Ɔ maan be nuan w’a sɛman ndɛ sɔ’n su.

Ɔ maan be kpɛli be ɲin bian’n bɔbɔ i wun lɔ naan b’a usɛ i kɛ: “?Ɔ bɔbɔ m’ɔ tikeli ɔ ɲinma’n, a bu i sɛ?” Wafa nga bian’n bu Zezi’n, ɔ ti weiin. Ɔ tɛli be su kɛ: “Ɔ ti Ɲanmiɛn nuan ijɔfuɛ.”​—Zan 9:17.

Zuifu sɔ’m b’a faman bian’n i ndɛ’n su. Be seli be wun kɛ atrɛkpa’n, Zezi nin bian sɔ’n be nuan sɛli su naan bé láka sran mun. I sɔ’n ti’n, kɛ ɔ ko yo naan b’a kpɛ ndɛ sɔ’n nun’n, be seli kɛ bé wá úsa bian’n i si’n nin i nin’n be sa. Be waan bé úsa be sɛ be wa’n ti aɲinsifuɛ sakpa-o.