Jesus osụk odu ke Jerusalem ke Sabbath. Nte enye ye mme mbet esie ẹsụk ẹsan̄ade ke Jerusalem, mmọ ẹkụt eben̄e eben̄e kiet emi akamanade nnan. Mme mbet ẹbụp Jesus ẹte: “Rabbi, anie akanam idiọkn̄kpọ, ndi owo emi m̀mê ete ye eka esie, esịnde enye amana nnan?”—John 9:2.

Mme mbet ẹdiọn̄ọ ke ete emi inyeneke ukpọn̄ emi okodude uwem mbemiso enye edi edimana. Edi ekeme ndidi mmọ ẹkere m̀mê owo ekeme ndisịne ke esịt idịbi eka esie nnam idiọkn̄kpọ. Jesus ọbọrọ mmọ ete: “Idịghe owo emi inyụn̄ idịghe ete ye eka esie, edi ekedi man ẹkpenam utom Abasi ẹyarade ke idem esie.” (John 9:3) Idịghe ete emi akanam idiọkn̄kpọ, inyụn̄ idịghe ete m̀mê eka esie akanam idiọkn̄kpọ emi anamde enye amana nnan. Idiọkn̄kpọ Adam anam kpukpru owo ẹda ndusụk udọn̄ọ ẹdimana, utọ nte nnan. Edi eke ete emi ayanam Jesus ekeme ndinam mme owo ẹkụt utom Abasi nte enye esinyụn̄ anamde ke mme ini en̄wen emi enye ọkọkde mme owo udọn̄ọ mmọ.

Jesus ọdọhọ ke ana isọsọp inam utom emi. Kop nte enye etịn̄de mi: “Ana nnyịn inam utom enye emi ọkọdọn̄de mi ke adan̄aemi edide uwemeyo; okoneyo ke edi emi owo baba kiet mîdikemeke ndinam utom. Adan̄a nte ami ndude ke ererimbot, ami ndi un̄wana ererimbot.” (John 9:4, 5) Ke mîbịghike Jesus ọmọn̄ akpa ndien enye idikemeke ndinam baba n̄kpọ kiet ke esịt n̄kịmn̄kịm udi emi enye edidude. Kan̄a ke emi, enye edi un̄wana ererimbot.

Edi ndi Jesus ayanam idem ọsọn̄ ete emi? Jesus edinam didie man idem ọsọn̄ enye? Enye afiari etap enịm ke isọn̄ ekem ada etap oro anam mbat. Ke enye ama akada mbat oro eyet ete oro ke enyịn, enye ọdọhọ enye ete: “Ka keyet ke n̄kpọdiọhọ mmọn̄ Siloam.” (John 9:7) Ete oro anam se Jesus etịn̄de oro. Ke enye ama ekeyet, enyịn atara enye! Kere nte esịt enemde enye ndikụt n̄kpọ ata akpa ini tọn̄ọ enye akamamana!

Idem enen̄ede akpa mme mbọhọidụn̄ ye mbon eken emi ẹkediọn̄ọde ke ete emi akamana nnan. Mmọ ẹbụp ẹte: “Nte idịghe owo emi ekesitiede eben̄e eben̄e edi emi?” Ndusụk owo ẹbọrọ ẹte: “Edi enye.” Mmọ eken inịmke ke enye ke edi, mmọ ẹdọhọ ẹte: “Idịghe, edi ebebiet enye.” Ete oro ke idemesie ọdọhọ ete: “Ami ke edi.”—John 9:8, 9.

Mmọ ẹbụp enye ẹte: “Ẹkesan̄a didie, ndien, ẹtat fi enyịn?” Enye ọbọrọ ete: “Owo emi ẹkotde Jesus akanam mbat ada ekpenede mi ke enyịn onyụn̄ ọdọhọ mi ete, ‘Ka keyet ke Siloam.’ Ami nnyụn̄ n̄ka n̄keyet ndien n̄kụt usụn̄.” Mmọ ẹfiak ẹbụp enye ẹte: “Owo oro odu m̀mọ̀n̄?” Enye ọbọrọ mmọ ete: “Mfiọkke.”—John 9:10-12.

Mmọ ẹmen enye ẹka ẹbịne mme Pharisee ndien mme Pharisee n̄ko ẹbụp enye nte enye asan̄ade okụt usụn̄. Enye ọdọhọ mmọ ete: “Enye akada mbat eyet mi ke enyịn, ndien n̄keyet nnyụn̄ n̄kụt usụn̄.” Utọ n̄kpọ emi akpakam ananam mme Pharisee ẹtiene ete emi ẹkọm Abasi. Edi utu ke oro, ndusụk  ẹkam ẹsụk Jesus uyo. Mmọ ẹdọhọ ẹte: “Owo emi itoho Abasi, koro enye mînịmke Sabbath.” Edi mbon eken ẹbụp ẹte: “Didie ke owo emi edide anamidiọk ekeme ndinam mme utọ idiọn̄ọ emi?” (John 9:15, 16) Ntre ubahade odu ke otu mmọ.

Sia n̄kpọ etiede ntem, mmọ ẹbụp ete emi ekedide nnan ete: “Nso ke afo etịn̄ aban̄a enye, ke emi edide enye ama atat fi enyịn?” Owo oro ọdiọn̄ọ owo emi Jesus edide onyụn̄ ọbọrọ ete: “Enye edi prọfet.”—John 9:17.

Mme Pharisee inịmke ikọ ete emi. Ekeme ndidi mmọ ẹkere ke Jesus ye ete emi ẹnam n̄kari man ẹbian̄a mme owo. Mmọ ẹkere n̄ko ke n̄kukụre usụn̄ emi mmimọ ikemede ndidiọn̄ọ akpanikọ edi ndibụp ete ye eka eben̄e eben̄e emi m̀mê eyen mmọ ekedi nnan ke akpanikọ.