Yezu kele kaka na Yeruzalemi na kilumbu ya Kisabatu. Ntangu Yezu ti balongoki na yandi ke tambula na mbanza, bo me mona muntu mosi yina me butukaka kifwa-meso mpi ke lombaka bima. Balongoki me yula Yezu nde: “Rabi, nani salaka disumu, muntu yai to bibuti na yandi, sambu yandi butuka kifwa-meso?”—Yoane 9:2.

Balongoki me zaba nde muntu yai kele ve ti moyo yina ke monanaka ve, yina zingaka na ntwala nde yandi butuka, kansi bo ke kudiyula kana muntu lenda sala disumu ntangu yandi kele na divumu ya mama na yandi. Yezu me songa bo nde: “Yandi ve muntu salaka disumu, bibuti na yandi mpi ve, kansi yo vandaka sambu bisalu ya Nzambi kumonana na mbandu na yandi.” (Yoane 9:3) Muntu yai ti bibuti na yandi salaka ve ata kifu to disumu mosi buna yina salaka nde yandi butuka kifwa-meso. Kansi sambu na disumu ya Adami, bantu yonso ke butukaka bantu ya kukonda kukuka mpi ti bifu bonso kufwa-meso. Ntangu yai, kifu ya muntu yai me pesa Yezu dibaku ya kumonisa bisalu ya Nzambi mutindu yandi salaka yo na mabaku ya nkaka ntangu yandi belulaka bantu yina vandaka ti bimbefo.

Yezu me monisa nde yandi fwete sala bisalu yango kukonda kusukinina, yandi me tuba nde: “Beto fwete sala bisalu ya Muntu yina tindaka mono ntangu mwini kele; mpimpa ke kwisa ntangu ata muntu mosi ve lenda sala kisalu. Ntangu mono kele na nsi-ntoto, mono kele nsemo ya nsi-ntoto.” (Yoane 9:4, 5) Kubika fioti, lufwa ya Yezu ta kotisa yandi na mudidi na kati ya maziamu mpi kuna yandi lenda sala ata kima mosi ve. Kansi na ntwala nde yo salama, yandi ke pesa nsemo na nsi-ntoto.

Keti Yezu ta belula kifwa-meso yina? Kana ee, inki mutindu? Yezu me losa mate na ntoto mpi me sala poto-poto ti mate yina. Yandi me pakula kifwa-meso yina ndambu ya poto-poto na meso mpi me songa yandi nde: “Kwenda kuyobila na kiziba ya Siloami.” (Yoane 9:7) Kifwa-meso yango me kwenda. Ntangu yandi me yobila, yandi me mona! Yindula kiese yina yandi me wa mutindu yandi me mona sambu na mbala ya ntete na luzingu na yandi.

Bantu yina ke zingaka pene-pene ti yandi mpi bantu ya nkaka yina zabaka nde yandi vandaka kifwa-meso me yituka. Bo me yula nde: “Yai muntu yina vandaka kuvanda na ntoto sambu na kulomba bima, mpidina ve?” Bantu ya nkaka me tuba nde: “Yo kele yandi.” Kansi, bankaka ke ndima ve mpi bo me tuba nde: “Yandi ve, kansi yandi me fwanana ti yandi.” Ebuna, yandi mosi me tuba nde: “Yo kele mono.”—Yoane 9:8, 9.

Yo yina, bo me yula yandi nde: “Ebuna, inki mutindu meso na nge kangukaka?” Yandi me songa bo nde: “Muntu yina bo ke bingaka Yezu salaka poto-poto, yandi pakulaka yo na meso na mono, mpi yandi songaka mono nde, ‘Kwenda kuyobila na Siloami.’ Mono kwendaka, mono yobilaka, mpi mono kumaka kumona.” Bo me yula yandi nde: “Muntu yina kele na wapi?” Yandi me tuba nde: “Mono me zaba ve.”—Yoane 9:10-12.

 Bantu me nata muntu yina na Bafarize, bo mpi ke zola kuzaba mutindu yandi me kuma kumona. Yandi me zabisa bo nde: “Yandi tulaka poto-poto na meso na mono, mono yobilaka, mpi mono ke mona.” Yo lombaka nde Bafarize kuwa kiese mutindu muntu yai ya ke lombaka bima me beluka. Kansi, Bafarize ya nkaka me tuba mambu ya mbi sambu na Yezu. Bo me tuba nde: “Yandi kele ve muntu yina me katuka na Nzambi, sambu yandi ke zitisa ve Kisabatu.” Kansi, bankaka me tuba nde: “Inki mutindu muntu yina kele nsumuki lenda sala bidimbu ya mutindu yai?” (Yoane 9:15, 16) Yo yina, bo me kabwana.

Sambu Bafarize ke tuba mambu ya kuswaswana, bo me yula muntu yina ke mona ntangu yai nde: “Inki nge ke tuba sambu na yandi, sambu yandi kangulaka meso na nge?” Yandi kele ve ti baketi-keti sambu na Yezu, yandi me songa bo nde: “Yandi kele mbikudi.”—Yoane 9:17.

Bayuda me buya kundima mambu yina yandi me tuba. Ziku, bo ke yindula nde Yezu ti muntu yina me wakana sambu na kukusa bantu. Bo me mona nde sambu na kumanisa ntembe yina, bo fwete yula bibuti na yandi kana mwana na bo vandaka kibeni kifwa-meso.