Yesu wakinu kaka muna Yerusaleme muna lumbu kia Vundu. Ekolo kekangalanga ye alongoki andi muna mbanza, bamwene nlombi mosi una vo mpofo a kingutukila. Alongoki bayuvuidi Yesu vo: “E Rabi, nani wasumuka wau kawutukila mpofo, yandi yovo se diandi yo ngudi andi?”—Yoane 9:2.

Alongoki batokanene kana vo muntu olenda vola sumu wau kena muna vumu kia ngudi andi. Yesu ubavutwidi vo: “Ondioyu kasumuka ko, ngatu se diandi yo ngudi andi, kansi ediadi diavangama kimana e salu kia Nzambi kiamoneka omu yandi.” (Yoane 9:3) Ke muntu ndioyo ko ngatu se diandi yo ngudi andi bena ye ngielele mu kuma kia sumu bavola diakitula mwan’au se mpofo. Mu kuma kia sumu dia Adami, wantu awonso ke bewutukanga balunga ko, bewutukanga ye yimbevo nze kimpofo. Kansi e kimpofo kia muntu ndioyo kivene Yesu e lau diasengomona mavangu ma nkuma ma Nzambi, wauna kevanganga vava kewukanga yimbevo ya wantu.

Yesu osongele vo kafwete sadisa muntu ndioyo vana vau. Ovovele vo: “Tusala kaka salu ya Ndiona wantuma, wau kuna mwini; o fuku vava ukwiza, ke vekala muntu ko olenda sala. Ekolo ngina ova nza, i ntemo a nza.” (Yoane 9:4, 5) Ke kolo ko, o lufwa lukotesa Yesu muna tombe kia ziami, kalendi mo vanga diambu ko. Wau kena ova nza, yandi i tuku dia ntemo a nza.

Nga Yesu owuka kikilu muntu ndioyo e? Avo i wau, aweyi kekunwukila? Yesu otawudi o mete vana ntoto, ozowele nteke. Okusidi ndambu muna meso ma mpofo, umvovese vo: “Wenda, wayisukula vana zinga kia Siloa.” (Yoane 9:7) O mpofo wele, ukisukwidi, omwene! Se yindula e kiese kia muntu ndioyo wau o meso mandi mamwene mu nkumbu antete muna zingu kiandi!

Esi belo kiandi ye wantu akaka banzayila vo mpofo, basivikidi kikilu. Bayuvuidi vo: “Ke yandi ko wafongelenge muna nzila yo lomb’e?” Ankaka bavovele vo: “I yandi ndioyo.” Ankaka bavovele vo: “Ve, fwana kaka kamfwene.” Oyandi vo: “I mono kwame.”—Yoane 9:8, 9.

Banyuvuidi vo: “O meso maku aweyi matemokene?” Ovutwidi vo: “O muntu, nkumbu andi Yesu, ozowele nteke, okusidi yo omu meso mame, umpovese vo, ‘Wenda kuna Siloa, wayisukula.’ Ngiele, ikisukwidi, mbwene.” Banyuvuidi vo: ‘Yandi muntu ndioyo andieyi?’ Ovovele vo: “Kizeye kwame ko.”—Yoane 9:10-12.

Bele yandi kwa Afarisi, kadi oyau mpe bazolele zaya kana aweyi o meso mandi matemokene. Oyandi ubavovese vo: “Nteke kasidi omu meso mame, ikisukwidi, mbwene.” Afarisi nga bafwete yangalala kumosi ye mpofo ndioyo. Kansi ankaka muna yau bavene e ngielele kwa Yesu, bavovele vo: “O muntu ndioyo katùka kwa Nzambi ko, kadi ke lundanga lumbu kia Vundu ko.” Ankaka bavovele vo: “O muntu wina vo nsumuki, aweyi kalenda vangila sinsu ya mpila yayi?” (Yoane 9:15, 16) Bavambanene muna ngindu zau.

Wau vo ngindu zaswaswana bena zau, babalukidi muntu otemweno meso, banyuvuidi vo: “Adieyi ovova mu kuma kiandi, wau katemwene meso maku?” Muntu ndioyo kena ye lukatikisu ko mu kuma kia Yesu, ovovele vo: “Yandi i ngunza.”—Yoane 9:17.

Ayuda ke bazolele dio kwikila ko. Banyindwidi vo nanga Yesu wizana kawizanene yo muntu ndioyo kimana bavunginika o nkangu. Bamwene vo muna fokola e mpaka diambote bayuvula mase ma muntu ndioyo kana mpofo kikilu kakala.