Yezu utshivua mu Yelushalema dituku dia Nsabatu. Padiye yeye ne bayidi bende bendakana mu tshimenga, badi bamona mulombi wa ka pa luse kampanda uvua muledibue mpofu. Bayidi bakamuebeja ne: “Labi, nnganyi uvua muenze mpekatu, mmuntu eu anyi mbaledi bende, bua kuledibuaye mpofu?”​—Yone 9:2.

Bayidi mbamanye ne: muntu eu kena ne anyima udi kayi umueneka uvuaku kumpala kua yeye kuledibua to, kadi badi mua kudiebeja bikala muntu mua kuenza mpekatu patshidiye mu difu dia mamuende. Yezu udi wandamuna ne: “Muntu eu anyi baledi bende kabavua benze mpekatu to, kadi bivua bua midimu ya Nzambi imueneshibue patoke mu bualu buende.” (Yone 9:3) Nunku ni mmuntu eu anyi baledi bende kabavua bapile bua tshilema kampanda anyi mpekatu muenze bua ikale mpofu to. Kadi, bua mpekatu wa Adama, bantu bonso badi baledibua bapange bupuangane ne badi mua kupeta bulema kampanda bu mudi bumpofu. Kadi bumpofu bua muntu eu budi bupesha Yezu mpunga wa kuleja midimu ya Nzambi, anu muvuaye muenze bikondo bia kale pa kuondopa bantu ku masama abu.

Yezu udi uleja ne: bivua bikengela kuenza midimu eyi ne lukasa. Udi wamba ne: “Tudi ne bua kuenza midimu ya Yeye uvua muntume patutshidi mu munya; butuku budi bulua buikala muntu kayi mua kuenza mudimu. Pantshidi pa buloba, ndi butoke bua ba pa buloba.” (Yone 9:4, 5) Eyowa, diakamue lufu lua Yezu nelumubueje mu midima ya mu lukita, muaba wikalaye kayi mua kuenza tshintu. Mu dindila tshikondo atshi, udi mpokolo wa butoke bua pa buloba.

Kadi Yezu neondopaku muntu eu anyi? Biobi nanku, mmushindu kayi? Yezu udi utuila mata panshi ne usopa bitotshi ne mata au. Ubilaba pa mêsu pa mpofu eu wamba ne: “Ndaku wowe mâyi mu dijiba dia Siloama.” (Yone 9:7) Muntu eu udi utumikila. Padiye wenza nunku, udi utuadija kumona! Fuanyikija disanka divuaye mua kuikala nadi padiye umona bua musangu wa kumpala katshia bamulela!

Bena mutumba ne bantu bakuabu bavua bamumanye bu mpofu badi bakema. Badi bebeja ne: “Muntu eu si nguvua usomba ulomba ka pa luse au, ki mmuomu?” Bamue bavua bamba ne: “Nyeye.” Bakuabu bavua bamba ne: “Tòo, kadi mmufuanangane nende.” Muntu eu udi udiandamuina ne: “Meme ke yeye au.”​—Yone 9:8, 9.

Nunku bakamuebeja ne: “Kadi, mmunyi mudi mêsu ebe matabale?” Wakabandamuna ne: “Muntu udibu babikila ne: Yezu, uvua musope bitotshi, kubilabaye pa mêsu anyi, kungambilaye ne: ‘Ndaku ku Siloama, wowe mâyi.’ Nunku ngakaya, kuowa mâyi ne kutuadija kumona.” Bakamukonka ne: “Muntu au udi penyi?” Mulombi wa ka pa luse udi wandamuna ne: “Tshiena mumanye to.”​—Yone 9:10-12.

Bantu bavua baya ne muntu eu kudi Bafalese bavua basue kumanya muvuaye mutuadije kumona. Udi ubambila ne: “Uvua mulabe bitotshi pa mêsu anyi, meme kuowa mâyi, ne ndi mmona.” Bivua mua kuenza bua Bafalese basanke pamue ne  muntu uvuabu buondope eu. Kadi, bamue badi bashiminyina Yezu bamba ne: “Muntu eu ki mmufume kudi Nzambi to, bualu kena unemeka Nsabatu.” Bakuabu bamba ne: “Mmunyi mudi muntu udi muenji wa mpekatu mua kuenza bimanyinu bia mushindu eu?” (Yone 9:15, 16) Nunku bakatapuluka.

Bu muvuabu bapete tshibuejakaji, badi bebeja muntu ukadi umona eu ne: “Wewe udi wamba tshinyi bua muntu eu, bualu mêsu ebe ke avuaye mutabeja?” Udi ubandamuna kayi welakana bua Yezu wamba ne: “Yeye mmuprofete.”​—Yone 9:17.

Bena Yuda bakabenga bua kuitaba bualu ebu. Bavua mua kuikala bela meji ne: Yezu uvua muenze mayele ne muntu eu bua kushima bantu. Bakajikija bamba ne: mushindu muimpe wa kukosa tshilumbu etshi, nkuebeja baledi ba mulombi wa ka pa luse eu bikala muanabu uvua muledibue mpofu bulelela.