A Zeezi keta Zeruzalɛm. Yẽ ne a karen-biisã wa n yiime n kẽ tẽngã. Ra yaa vʋʋsg daare. B yãa bõaas sẽn yaa zoanga. A roga ne zondã. Karen-biisã soka a Zeezi yaa: “Karen-saamba, yaa ãnda soab n maan yel-wẽnd tɩ raoã rog ne zondo? Yaa yẽnda meng bɩ, bɩ yaa a ba-rãmbã?”—Zã 9:2.

Karen-biisã ra miime tɩ nand tɩ ned roge, a pa vɩ zĩig a to ye. La tõe tɩ b ra sokda b mens biig sẽn nan ket a ma pʋgẽ sã n tõe n maana yel-wẽnde. A Zeezi leokame yaa: “Ka tɩ yaa yẽnda bɩ a ba-rãmbã n maan yel-wẽnd ye, la yaa tɩ Wẽnnaam tʋʋmã na tũnug yẽnda n puki.” (Zã 9:3) Dẽnd raoã pa beege, a roagdbã me pa maan bũmb n tar taale, tɩ rẽ kɩt tɩ b biigã rog ne zond ye. D yaab a Ãdem sẽn beegã yĩnga, ãdem-biisã rogdame n yaa yel-wẽn-maandba, tɩ rẽ kɩt tɩ sãnda rogd ne zams wa zondã. A Zeezi ra zoe n sãooga bãad-rãmb la koms-rãmba, tɩ nebã yã Wẽnnaam tʋʋm-kãsemsã. Rẽnd a gomdã wilgdame t’a na n le tũnuga ne raoã zondã n maan woto.

A Zeezi wilgame tɩ Wẽnnaam tʋʋmã yaa tʋʋm-yãgdem. A yeelame: “Tõnd tog n tʋma sẽn tʋm-a maamã tʋʋma, tɩ wĩndg ket n beẽ. Yʋng watame tɩ ned baa a yembr ka tõe n leb n tʋm ye. Mam sẽn ket dũniyã pʋgã, mam yaa dũniyã vẽenem.” (Zã 9:4, 5) Sɩd me, ra pa na n kaoos la a Zeezi ki tɩ b mum-a, tɩ yaa wa a sẽn be likẽ, n pa le tõe n maan bũmb ye. La nand t’a ki, a yaa dũniyã vẽenem.

A Zeezi na n puka zoangã ninã. La a na n maana wãn-wãna? A tʋbsa kolkood tẽnga, n bui tãnd n bɛ zoangã ninã, n yeel-a woto: “Kẽng Siloe bãkẽ wã n tɩ widg f nengã.” (Zã 9:7) Raoã sɩd kẽngame. A sẽn widg a nengã, a ninã pukame. A sẽn dogã tɛkã, a zɩ n yã ye. Mams-y n ges-y a sũ-noogã!

A yagsã, n paas neb nins fãa sẽn da mi t’a yaa zoangã yɛɛsame. B sokame yaa: “Ka rao ning sẽn dag n zĩ n bõosdẽ wã la woto sɩda?” Neb kẽer ra yetame tɩ yaa yẽnda, tɩ sãnda ra kɩɩsdẽ, n yetẽ tɩ yaa a wẽnego. La raoã meng ra yeta nebã yaa: “Yaa mam meng bal vã.”—Zã 9:8, 9.

Rẽ la b sok-a t’a ninã maana wãn n puki, t’a leok-b yaa: “Dao ning b sẽn boond t’a Zeezi wã n bui tom n bɛ mam ninã, la b yeel maam tɩ m kẽng Siloe bãkẽ wã n tɩ widg m nenga. Mam kẽngame n tɩ widg m nenga, la m ninã pukame.” B sok-a lame yaa: “Rao-kãng bee yɛ?” La a leokame: “Mam ka mi ye.”—Zã 9:10-12.

Nebã talla raoã n kẽng Fariizẽ-dãmbã nengẽ, tɩ bãmb me sok-a sẽn yɩ to-to t’a ninã puki. A yeel-b lame: ‘Sẽn maag-a maamã bɛɛ mam ninã ne tãndo, tɩ mam tɩ widg m nenga, la masã mam neeme.’ Fariizẽ-dãmbã ra segd n naaga raoã n kɩdem sũ-noogo, a ninã sẽn pukã yĩnga. La b ka maan woto ye. Kẽer pʋd n ninga a Zeezi taale, n yeele: “Rao-kãngã ka yit Wẽnnaam nengẽ ye. Bala, a ka sakd vʋʋsg daar tõodã ye.” La b sʋkã, sãnda ra yeta woto: “Yel-wẽn-maand tõe n yɩɩ a wãn n maan bõn-bãn a woto?” (Zã 9:15, 16) Ra lebga kɩɩs taaba.

No-koɛɛmã yĩnga, b soka raoã sẽn da yaa zoangã yaa: “Fo kaset yaa bõe ne ned ning sẽn puk-a fo ninã.” Raoã ra pa maand sãmb-sãmb ne a Zeezi sẽn yaa ned ning ye. A leokame: “Yaa Wẽnnaam no-rɛɛsa.”—Zã 9:17.

Zʋɩf-rãmbã pa sak n deeg t’a Zeezi yaa Wẽnnaam no-rɛɛs ye. Wõnda b ra tagsdame t’a Zeezi ne raoã sɩɩga taab noor n na n belg nin-buiidã. B wa n baas n yeelame tɩ sẽn na yɩl n welg yellã bɩ b bool raoã roagdba, n sok n ges a sã n sɩd ra yaa zoanga.