Jesu aciri ku Jerusarema ngo Musabudu. Iyena no vajiji vake pavanofamba mu dhorobha, vanovona mupembhi wakabahwa ari bofu. Vajiji vanobvunjisa Jesu kuti: “Rabi, ndiani wakaxaixa kuti abahwe ari bofu, ndiyena kani, nokuti majibaba ake?”—Johani 9:2.

Vajiji vanoziva kuti mundhu aana mwiha ucikavoneki, wainga uripo acito abahwa. Asi kangaije vairangarira ngo mumwoyo mwavo kuti dangani zvingathuka zvaitika kuti mundhu ashaishe aciri mundani ma mai wake. Jesu anovapingura kuti: “Yena aazivi kuxaixa nokuti majibaba ake; kaveta kuti mabasa a Mwari avoneke koari.” (Johani 9:3) Waro asipi iyena nee asipizve babake vakashaisha, zviita kuti iyena abahwe ari bofu. Asi izvona ngo zvokuti, ngo pamusoro po cishaishi ca Adhamu, vandhu vese vanobahwa vacizivi kukwana zve vangatobahwa vakaremara kwakadari inga upofu. Kuremara ko mwanarume uwu, kwaipekeja Jesu mukana wokuita mabasa a Mwari, inga zvaaiitaya no ndhendha jimweni.

Jesu ecigogomejera kuti basa iri rinodikana kuithwa ngo kukasika, iyena anoti: “No masikati tinodikana kuita mabasa a wiya wakandituma. Hunozoguma usiku, hwokuti vandhu avazokwanisi kubata basa. Ndiciri pasi pano ndiri ruveneko hwo nyika.” (Johani 9:4, 5) Sambi-sambi rufu hwa Jesu hunozomudira mu cidima co muiba maacikazokwanisi kuita ciri cese. Zvicito zvikaitika izvi, iyena i cine ro rubveneko hwokadi-kadi hwo nyika yese.

Asi Jesu anorapadi kamare mwanarume uwu? Waro anozviitisa kudini? Jesu anopfira mata pasi womakanya no mabvu. Perepo wotora zvimatope zvidoko wozvizoja mu meso mo mundhu waingaya bofu zve wonanga kuti: “Endai, wosamba mu mwimbo wo Siloe.” (Johani 9:7) Mwanarume uwu anozviita. Paanopera kumasuka, wotanga kuvona. Muri kuvona mudakaro wo mwanarume uwu ari kutanga kuvona mu upenyu hwake here?

Vocigarisano no vamweni vaiziva kuti iyena wainga bofu, vanoshamaisika maningi. Ivona vanobvunjisa kuti: “Asi yena wiya waigara pasi ecipembha?” Vamweni vanodavira kuti: “Ndiyena.” Ngo kudaro mwanarumewo kamare anodavira ega eciti: “Ndini kamare.”—Johani 9:8, 9.

Ngo kudaro ivona vanomubvunjisa kuti: “Majiso ako akafununguriswa kudini?” Iyena anodavira kuti: “Mundhu anodanwa Jesu wakakanya dongo, wondizoja majiso, wondibvunja kuti: ‘Endai kosamba ku Siloe.’ Ndakaenda, ndosamba, ndoamba kuvona.” Perepo ivona vanomubvunjisazve kuti: “Ari kwapi yena?” Mupembhi anopingura kuti: “Andibzizivi.”—Johani 9:10-12.

Vandhu vanomutora voenda nae ku vaFarisi vari kutodavo kuziva marapihwe aakaizwa. Iyena ovabvunja kuti: “Wakandizoja dongo mu majiso, ndakasamba, waro ndiri kuvona.” VaFarisi vaidikana kudakara ngo kuvona mupembhi warapiwaro. Asi vamweni vavo vanopumbha Jesu veciti: “Mundhu uu aabvi kuna Mwari, ngokuti aareremeji Sabudu.” Vamwenizve  vainanga kuti: “Mundhu wakaxata angaitisa kudini muxamaiso wakadaro?” (Johani 9:15, 16) Ngo kudaro vainga vacikazwiranizve ngo cavo.

Pakati po makanijano aya, vanobvunjisa mwanarumewo kuti: “Iwewe unonangenyi ngo njio ya wiya wakakufunungura majiso?” Iyena aakanikani ngo pamusoro pa Jesu zve anopingura kuti: “Ndiyena muporofeti.”—Johani 9:17.

VaFarisi vanozviramba maningi. Vairangarira kuti Jesu no mwanarume uwu vainga vabvunjana kuti vabate vandhu kumeso. Vanosunga kuti njira yavangatonga ndiyona ndhango iyi ngo yokubvunjisa vabari vo mupembhi vazive kuti waingadi bofu kamare kana kuti haiwa.