Yesu nlelo ori o Yerusalemu nihiku Nawoorowa. Vaavaa amuhuserya aneecaaya vapooma, awo annamoona mulopwana oyariwe ahoonaka. Amuhuserya annamukoha Yesu: “Muhusiha, otxhenke tani, yowo nari asitithinya, wi ayariwe ahonaka?”—Yohani 9:2.

Amuhuserya anachuna osuwela waakhanle wi muchu onamucheka nlelo ari mmirimani mwa amannya. Yesu onnaakhula: “Nari owo hatxhenke nari asitithinya, nto wi mwa yowo soneye miteko sa Muluku.” (Yohani 9:3) Mwawiihiiha naari mulopwana ola naari alipa oomuyara hakhanleno nthowa nammoori naari yoocheka yeerinhe ohoona wawe. Opwaha yeeyo, ntoko yookhumelela ya yoocheka ya Atamu, achu oothene anayariwa oohiphaameya nave annakhalano makacamiho, hiiha ntoko ohoona. Nyenya ohoona wa mulopwana onnavahererya ekari wa Yesu wi ooniherye miteko sa Muluku, hiiha ntoko opankeiye mu ilukuluku ikina aapenusaka achu ireca saya.

Yesu onnooniherya wi ti wawaakuveya opaka miteko seiyo. “Othana nnaphwanela wera miteko sa yole okirumme miyo,” owo onnaloca. “Ohiyu onarwa nave mutxhu hanawerya ophara muteko. Kikhalaka mwelaponi kiri ekamama ya elapo.” (Yohani 9:4, 5) Chiryene, moohilekela okhwa wa Yesu onahaala omukeriha mu epiiphe mmahiyeni mwemmo owo hani awerye opaka echu. Mu elukuluku emohamoha, owo ori ehime ya omwaleela wa elapo.

Nyenya, apwanne Yesu onammupenusa mulopwana, wakhala hiiha, mmukhalelo taani? Yesu onnataphera mara vacheyani nave ni mara onneetheya echaya. Owo onnameya nave onnahela mmiithoni wa mulopwana oohoona nave onnaloca: “Hawé, wasusule vantxhiya ni nopakiwa o Silowè.” (Yohani 9:7) Mulopwana onniiwelela. Vaavaa onasusuleiye, owo onnawerya woona! Nkaanyiheryani ohakalala wawe owerya woona mu ekwaha yoopacerya mu okumi awe!

Amwaacamani ni akina amusuwenle wi haawerya woona annatikhiniheya. Awo annakoha: “Tahi yola yole akirathi avekaka ya mahala?” Akina annaakhula, “Ti yola!” Nyenya akina haneemererya eyo nave annaloca: “Nari, onamphwanano ni yowo.” Mulopwana mukhateiye onnaakhula: “Ti yomi!”—Yohani 9:8, 9.

Voocharela, awo annamukoha: “Mitho à ohuleya ari hai?” Owo onnaaleela: “Mutxhu yole onitxhaniwa Yesu àhetheya etxhaya, àhika mitho aka ni àhi: ‘Hawé o Silowé ni wasusule’. Kàyawo, kìsusula ni kinnona” voocharela awo annamukoha: “Ori wowi yowo?” Mulipa oohoona onnaakhula: “Nkisuwenle.”—Yohani 9:10-12.

Achu annamukeriha mulopwana wa Afarisi, yaawotho anachuna osuwela mukhalelo owenryeiye woona. Owo onnaaleela: “Yesu okihinke  etxhaya mmithoni. Mi kìsusula ni kinnona.” Enakhala wi yaahaala okhala yaphaama Afarisi ohakalala ni mulipa oohoona openusiwe. Ohiya yeeyo, akina a yaawo annamuthoriha Yesu. “Mutxhu yowo hanarwa wa Muluku, wona wi hanakhapelela nihiku naworowa!” Nyenya akina annaloca: “Owerya oni ere hai mutxhu otxheka wera ineneryo ntoko iha?” (Yohani 9:15, 16) Mwawiihiiha awo annakhala ookawanyeya.

Variyari va miyoonelo seiya soohiyana, awo annarukunuwela wa mulopwana yoowo vano onawerya woona nave annamukoha: “Weyano oni hai wa yowo ohunle mitho?” Owo haanono minikwa vooloca sa Yesu nave onnaakhula: “Ti mulipa a miririmu.”—Yohani 9:17.

Afarisi annakhooca weemererya yeela. Awo akhweya anuupuwela wi wookhalavo wiiwanana variyari va Yesu ni mulopwana yoola wi yaawoke achu. Awo anoona wi mukhalelo mmoha wa omaliha mwaha ori waakoha alipa amuyanre mulopwana oohoona waakhanle wi chiryene haawerya woona.