Sesusi ankho nkhele ukahi mo Selusalei Motyasapalo. Pahe etyi ankho ekahi nokuenda novalongwa vae mepunda-umbo, avamono omulume umwe watyitwa omumphoki wiita osimola. Ovalongwa avapulu Sesusi okuti: “Mulongesi, olie walinga onkhali, omulume ou ine ovo he, etyi atyitwa omumphoki?” — Suau 9:2.

Ovalongwa vetyii okuti omulume oo ankho utupu ohande yakalele nomuenyo etyi ehenetyitwe, mahi tyafuile ankho velipula inkha omunthu upondola okulingila onkhali meimo lya ina. Sesusi evepopila okuti: “Nii omulume ou nii ovo he petupu ou walinga onkhali, mahi etyi tyamoneka opo ovanthu vamone etyi Huku apondola okulinga konthele yae.” (Suau 9:3) Moluotyo, nii omulume oo, nii ovo he ankho havo-ko vavelwa onombei konthele yonkhali yakalesa omulume oo omumphoki. Mahi mokonda yonkhali ya Andau ovanthu aveho vatyitwa nonkhali iya vakala novitateka, ngovitateka viokukala omumphoki. Oumphoki womulume oo, waavela Sesusi omphitilo yokulekesa ovilinga vya Huku, ngetyi ankho ahakula-le ovanthu vavela.

Sesusi walekesa okuti tyesukisa okulinga liwa ovilinga ovio. Wati: “Tuna yokulinga ovilinga vya Una wanthuma tyina nkhele omutenya, mokonda makunthikovela iya petupu omunthu maundapa. Tyina ame nkhele ndyili mouye, ndyityimimi tyouye.” (Suau 9:4, 5) Tyina ankho Sesusi amankhi, makala menthiki liomeendo, muna ahapondola okulinga vali natyike. Mahi nkhele tyina ena omuenyo, oe ondyivi-ndyivi yotyimimi tyouye.

Mahi, okuti Sesusi mahakula omumphoki? Inkha memuhakula metyilingi ñgeni? Sesusi anthili omate pohi iya eehonyeka neheke aakala onthata. Apolo ponthata oyo, apake komaiho omumphoki iya emupopila okuti: “Enda kelikohe meiva lyo Siloe.” (Suau 9:7) Omumphoki etavela aende. Etyi elikoha, ahimbika okumonapo! Nkhele soka ehambu omulume oo akalele nalio etyi amonapo otyikando tyotete!

Ovanthu ankho vakala nae pomaumbo, novakuavo vali vemwii avahuvu unene. Avapulu okuti: “Omulume ou hayouna ankho ukala lupumphi otyo aita osimola?” Vamwe ankho vati: “Oe umwe.” Mahi ovakuavo avehetavela avati: “Au, velifwa nae.” Mahi omulume oo ati: “Ame umwe.” — Suau 9:8, 9.

Iya avemupulu okuti: “Oñgeni omaiho ove apatuka?” Ngwe akumbulula okuti: “Omulume umwe utiwa o Sesusi walinga onthata awaveka komaiho ange amphopila okuti: ‘Enda ko Siloe, olikoho.’ Moluotyo, andyiende, andyikelikoha andyihimbika okumonapo.” Avemupulu okuti: “Omulume oo ulipi?” Ngwe ati: “Ame hityii.” — Suau 9:10-12.

Ovanthu avemutuala kova Faliseu, ankho vahanda okunoñgonoka oñgeni pahe eetepo. Evepopila okuti: “Wapaka onthata komaiho ange, iya andyikelikoha, pahe ndyietepo.” Ankho ñgeno ova Faliseu vahambukwa etyi omulume oo wokuita osimola ahakulwa. Mahi avahahambukwa, vamwe avapopi omapita Sesusi. Avati: “Oo hamunthu-ko wa Huku, mokonda kalandula otyitumino Tyotyasapalo.” Ovakuavo avati: “Okuti inkha omunthu wokulinga ononkhali, ñgeno ulinga omahuviso ngoo?” (Suau 9:15, 16) Moluotyo, ankho tyati ava vasoka etyi, ovakuavo vasoka otyikuavo.

Mokonda ankho etyi vasoka tyelikalaila, avaende komulume ankho pahe weetepo, avapulu okuti: “Ove usoka okuti omunthu patyi, etyi apatula omaiho ove?” Omulume apopi nonthumbi konthele ya Sesusi ati: “Omuuli.” — Suau 9:17.

Ova Sundeu avehetyitavela. Tyafuile ankho vasoka okuti Sesusi nomulume oo velipakela-mo opo vakembe ovanthu. Avasoko okuti matyivekuatesako okukapula ko vohe yomulume oo wokuita osimola opo vapopie inkha tyotyili ankho omumphoki umwe.