Йесо ныр дӕр ма уыд Иерусалимы. Уыди сабатбон. Гъемӕ йӕ ахуыргӕнинӕгтимӕ горӕты куы фӕцӕйцыдысты, уӕд федтой, йӕ райгуырдӕй фӕстӕмӕ куырм чи уыд, ахӕм мӕгуыргур адӕймаджы. Ӕмӕ Йесойы йӕ ахуыргӕнинӕгтӕ бафарстой: «Ахуыргӕнӕг, чи сарӕзта тӕригъӕд, ацы адӕймаг ӕви йӕ ныййарджытӕ? Куырмӕй цӕмӕн райгуырд?» (Иоанны 9:2).

Йесойӕн йӕ ахуыргӕнинӕгтӕ, чи зоны, хъуыды кодтой, зӕгъгӕ, уыцы адӕймаг цалынмӕ йӕ мады гуыбыны уыд, уӕдмӕ цыдӕр тӕригъӕд сарӕзта. Йесо сын дзуапп радта: «Ацы адӕймаг нӕдӕр йӕхӕдӕг сарӕзта тӕригъӕд, нӕдӕр – йӕ ныййарджытӕ, фӕлӕ афтӕ уый тыххӕй у, цӕмӕй адӕм Хуыцауы хъуыддӕгтӕ феной» (Иоанны 9:3). Уӕдӕ, уыцы лӕг куырм кӕй уыди, уый нӕдӕр йӕхи аххос уыди, нӕдӕр йӕ ныййарджыты. Адӕм се ’ппӕт дӕр Адамӕй сӕ туджы тӕригъӕд кӕй рахастой, уый тыххӕй сты ӕнӕххӕст, ӕмӕ иуӕй-иутӕ сахъатӕй дӕр уый тыххӕй райгуырынц. Фӕлӕ, уыцы лӕг куырм кӕй уыд, уый фӕрцы Йесойӕн фадат фӕзынд, цӕмӕй йӕ сдзӕбӕх кодтаид ӕмӕ та афтӕмӕй адӕмӕн Хуыцауы хъуыддӕгтӕ равдыстаид.

Йесо бамбарын кодта, уыцы хъуыддӕгтӕ кӕнын ӕвӕстиатӕй цӕмӕн хъуыд, уый: «Цалынмӕ бон у, уӕдмӕ хъуамӕ кӕнӕм, мӕн чи рарвыста, уый хъуыддӕгтӕ. Ӕрцӕуы ӕхсӕв, ӕмӕ уӕд ничиуал ницы сараздзӕн. Цалынмӕ ӕз дунейы дӕн, уӕдмӕ дунейӕн дӕн рухс» (Иоанны 9:4, 5). Йесо зыдта, тагъд ӕй кӕй амардзысты ӕмӕ уӕд талынг ингӕны йӕ бон кӕй ницыуал уыдзӕн аразын. Фӕлӕ цалынмӕ уыцы рӕстӕг не ’рцыд, уӕдмӕ дунемӕ рӕстдзинады рухс хаста.

Фӕлӕ цымӕ Йесо уыцы лӕджы сдзӕбӕх кӕндзӕн? Ӕмӕ кӕд о, уӕд куыд? Йесо зӕхмӕ ӕрту кодта, сыджыт йӕ сӕтимӕ азмӕста, стӕй дзы куырм лӕджы цӕстытӕ байсӕрста ӕмӕ йын загъта: «Ацу ӕмӕ дӕхи ныхс Силоамы найӕны» (Иоанны 9:7). Уый дӕр ацыд, Йесо йын куыддӕриддӕр загъта, афтӕ бакодта, ӕмӕ цӕстӕй ракаст. Ахъуыды-ма кӕн, куыд цин кодтаид, йӕ царды фыццаг хатт дунейы рухс куы федта, уӕд!

Йӕ сыхӕгтӕ ӕмӕ, куырм кӕй уыд, уый ма ноджыдӕр чи зыдта, уыдон дисӕй мардысты ӕмӕ кӕрӕдзийӕн дзырдтой: «Ай, мӕнӕ-иу ам чи бадт, уыцы мӕгуыргур нӕу?» Уӕд сӕ иутӕ загътой: «О, уый у». Иннӕтӕ та дзырдтой: «Нӕ, уый нӕу, фӕлӕ уый хуызӕн у». Уыцы лӕг та сын йӕхӕдӕг загъта: «Ӕз уый дӕн» (Иоанны 9:8, 9).

Ӕмӕ йӕ уӕд бафарстой: «Цӕстӕй куыд ракастӕ?» Уый сын дзуапп радта: «Йесо кӕй хонынц, уыцы адӕймаг сыджыт сӕтимӕ азмӕста, мӕ цӕстытӕ мын дзы байсӕрста ӕмӕ мын загъта: „Ацу Силоаммӕ ӕмӕ дзы дӕхи ныхс“. Ӕмӕ ӕз дӕр ацыдтӕн, мӕхи дзы ныхсадтон ӕмӕ цӕстӕй ракастӕн». Уыдон та йӕ бафарстой: «Кӕм ис уыцы адӕймаг?» Уый та сын загъта: «Нӕ йӕ зонын» (Иоанны 9:10–12).

Адӕм лӕджы фарисейтӕм акодтой. Уыдон дӕр та йӕ бафарстой, цӕстӕй куыд ракастӕ, зӕгъгӕ. Ӕмӕ та уыдонӕн дӕр загъта: «Уыцы адӕймаг мын мӕ цӕстытӕ сыджыты змӕстӕй байсӕрста, уый фӕстӕ мӕхи ныхсадтон, ӕмӕ  ныр цӕстӕй уынын». Мӕгуыргур кӕй сдзӕбӕх, ууыл фарисейтӕ хъуамӕ цин кодтаиккой, фӕлӕ сӕ уый бӕсты чидӕртӕ Йесойы фӕаххосджын кодтой: «Уыцы адӕймаг Хуыцауӕй нӕу, уымӕн ӕмӕ сабаты ӕгъдау халы». Иннӕтӕ та загътой: «Тӕригъӕдджын адӕймаг ахӕм диссӕгтӕ куыд хъуамӕ араза?» (Иоанны 9:15, 16). Ӕмӕ уыйадыл сӕ кӕрӕдзийы ныхмӕ систы.

Уымӕ гӕсгӕ, цӕстӕй чи ракаст, уыцы лӕджы бафарстой: «Уыцы адӕймаг дӕ цӕстӕй ракӕсын кодта, ӕмӕ дзы цы зӕгъдзынӕ?» Йесо чи уыд, ууыл мӕгуыргур ӕппындӕр нӕ дызӕрдыг кодта ӕмӕ сын фидарӕй загъта: «Уый пехуымпар у» (Иоанны 9:17).

Фӕлӕ фарисейтӕ йемӕ не сразы сты. Чи зоны, афтӕ дӕр хъуыды кодтой, ӕмӕ Йесо уыцы лӕгимӕ сусӕгӕй баныхас кодта, цӕмӕй адӕмы сайдтаиккой. Гъемӕ загътой, зӕгъгӕ йын йӕ ныййарджытӕм фӕдзурӕм ӕмӕ йӕ базонӕм, ӕцӕгдӕр куырм уыди ӕви нӕ.