Säbadu junaqmi karqan y Jesusqa Jerusalenllachöran këkarqan. Qateqninkunawan tsë markapa purikarmi, yurikunqampita patsë limushnata mañakïkaq wisku nunata rikäriyarqan. Tsëmi qateqninkuna Jesusta kënö tapuyarqan: “Maestru, ¿pitaq jutsallakurqan kë nuna wisku yurinampaq, kikinku o teytankunaku?” (Juan 9:2).

Tsë nuna juk vïdachö mana jutsallakushqa kanqantaqa musyayaqmi, peru itsachi pensayaq mamampa pachanllachöraq këkar jutsallakushqa kanqanta. Tsëmi Jesusqa kënö nirqan: “Manam ni kë nunatsu ni teytankunatsu jutsallakushqa, sinöqa Diospa rurëninkuna pëchö rikakänampaqmi kënö kashqa” (Juan 9:3). Tsë nunaqa, manam kikin o teytankuna jutsata rurayashqa kayanqampitatsu wisku yurishqa karqan, sinöqa Adanpita jutsata chaskishqa kanqampitam. Tsërëkurmi llapantsikpis jutsayoq kantsik y qeshyantsik. Peru juk kutikunachö nunakunata kachakätsir ruranqannöllam, tsë nunachöpis Diospa poderninta rikätsikïta puëdinan karqan.

Tsëkunata rurë alläpa precisanqantam Jesusqa nirqan. Tsëmi, “junaqllaraq këkaptinmi kachamaqnïpa rurëninkunata ruranantsik; paqasqa chëkämunnam, y paqaspaqa manam ni pipis trabajëta puëdintsu. Nunakunallachöraq këkanqäyaqqa, nunakunapa aktsinmi kä” nirqan (Juan 9:4, 5). Awmi, ichikllachönam wanunan karqan, y ampeq sepultüraman churayaptinmi, ima rurëtapis puëdinmannatsu karqan. Peru tsëyaqqa, pëqa nunakunapa aktsinmi karqan.

¿Wisku nunataqa kachakätsirqantsuraq? Y, kachakätsirqa, ¿imanöraq rurarqan? Jesusqa toqaninwan mituta rurarirmi, tsë nunapa nawinta mituwan llushirirqan, y “Siloam kitaman paqakoq ëwë” nirqanmi (Juan 9:7). Tsënömi rurarqan, y nawinmi kichakärirqan. Pensari, tsë nunaqa alläpachi kushikurqan rikëtana puëdirqa.

Vecïnunkuna y reqeqnin nunakunaqa, Jesus ruranqampita alläpam espantakuyarqan y kënömi tapunakuyarqan: “¿Këmi limushnata mañakur täraq nuna aw?”. Wakinkunanam, “pëmi” niyarqan. Peru wakinqa pë kanqanta mana creirmi, “manam pëtsu, peru pë niraqmi” niyarqan. Tsëmi nawin kichakärishqa nunaqa, “noqam kä” nirqan (Juan 9:8, 9).

Tsëmi, “¿imanöpataq kananqa rikankina?” nir tapuyarqan. Pëman kënö nirqan: “Jesus jutiyoq nunam mituta rurarir nawïta llushimurqan, y kënö nimarqan: ‘Siloamta ëwë y paqakï’. Tsëmi ëwarqä y paqakurqä, y tsënöpam kananqa rikäna”. Tsënam Jesus mëchö këkanqanta tapuyarqan, pënam “manam musyätsu” nirqan (Juan 9:10-12).

Pëkunanam, fariseukuna kaqman apayarqan, porqui pëkunapis imanö kachakashqa kanqantam  musyëta munayarqan. Tsëmi pëkunata kënö nirqan: “Mituwanmi nawïta llushimurqan, y paqakurirqämi, y tsënöpam kananqa rikäna”. Peru fariseukunaqa, kachakanqampita kushikuyänampa rantinmi, Jesuspaq kënö parlayarqan: “Këqa manam Dios kachamunqan nunatsu, porqui manam Säbadupaq ley ninqanta cäsukuntsu”. Wakinnam, “¿imanötaq juk jutsasapa nunaqa tsënö señalkunata ruranman?” niyarqan (Juan 9:15, 16). Tsëmi juk acuerduman chëta puëdiyarqantsu.

Y limushnakoq nunatam kënö tapuyarqan: “Y qamqa, ¿ima ninkitaq pëpaq, nawikita kachakätsimushqa këkaptinqa?”. Pënam, “pëqa Diospa willakoqninmi” nirqan (Juan 9:17).

Peru judïukunaqa manam creita munayarqantsu. Itsachi nunakunata engañayänampaq Jesuswan yachatsinakushqa kayanqanta pensayarqan. Y rasumpa kaqta musyayänampaqmi, tsë limushnata mañakoq nunapa teytanta y mamanta tapuyänampaq decidiriyarqan.