Jerusalenllapiraq kachkaspanmi Jesusqa sabado punchawpi qatiqninkunawan purichkaspan nacesqanmanta ñawsa runata limosnakuchkaqta tarirurqaku. Chaymi qatiqninkuna Jesusta tapurqaku: “Yachachikuq, kay runa ñawsa nacenanpaqqa, pitaq huchallikurqa: ¿Paychu icha tayta-mamanchu?”, nispa (Juan 9:2).

Ichapas chaynataqa nirqaku wiksallapiraq kaspa chay runa huchallikusqanta piensaspanku. Jesusñataqmi nirqa: “Manam kay runachu nitaq tayta-mamanchu huchallikurqa, chaynaqa karqa Diospa ruwasqankunata runakuna qawanankupaqmi”, nispa (Juan 9:3). Chay runaqa tayta-maman hinam Adanpa miraynin karqa. Pipas chayna pantaq runa kaspaqa imawanpas unqunchikmi, chayraykum chay runapas ñawsa nacerurqa. Chayqa Jesustam yanaparqa wakin unquqkunata hina hampispan Diosqa ancha atiyniyuq kasqanta qawachinanpaq.

Chay ruwayqa utqaylla ruwana kasqanta qawachinanpaqmi Jesus nirqa: “Punchawraq kachkaptinmi ruwananchik kachamuwaqniypa ruwayninta, tutayaramuptinqa manam pipas llamkaytaqa atinmanchu. Runakunawanraq kachkaspayqa runakunapa achkiyninmi kani”, nispa (Juan 9:4, 5). Jesusqa manaraq wañukuspanmi runakunapaqa achki hina karqa, wañukuspanmi ichaqa tutayaypi hina kaspan manaña imatapas ruwananñachu karqa.

¿Jesusqa yaqachu chay ñawsa runata hampirurqa? Arí, chaymi pampaman tuqaykuspan tuqayninwan mituta ruwarurqa, hinaspam mituwan chay runapa ñawinman llusiykuspa nirqa: “Siloam pozopi upakaramuy”, nispa (Juan 9:7). Chaymi chay runaqa pozopi upakaramuspan allinyarurqa. ¡Maynataya wamaq qawarikuruspanqa kusikurqa!

Chayta qawaspam llaqtamasinkunaqa chaynataq hukkunapas uyarayarqakuraq, hinaspam nirqaku: “Kay runaqariki tiyaykuspa limosna mañakuqmi, ¿aw?”, nispa. Wakinñataqmi nirqaku: “Arí paymi”, nispanku. Wakinkum ichaqa iskayrayaspa nirqaku: “Manam paychu, ichaqa pay kaqllam”, nispa. Chay qawarikuruq runañataqmi nirqa: “Ñuqam kani”, nispa (Juan 9:8, 9).

Runakunañataqmi tapurqaku: “¿Imaynatamá ñawikiqa qawarikurun?”, nispa. Payñataqmi willakurqa: “Jesus sutiyuq runam mituta ruwaykuspan ñawiyman llusiykuwarqa, hinaspam niwarqa: ‘Siloam pozoman rispayki upakaramuy’”, nispa. Chay runakunañataqmi hampiqnin runa maypi kasqanmanta tapurqaku. Qawarikuruq runañataqmi nirqa: “Manam yachanichu”, nispa (Juan 9:10-12).

Chaymantam fariseokunapas chay runa imaynanpi hampisqa kasqanmanta yachayta munaptinku paykunaman pusarqaku. Hinaptinmi qawarikuruq  runaqa fariseokunata nirqa: “Ñawiymanmi mituta llusiykuwarqa hinaptinmi upakaramuspay qawarikuruni”, nispa. Chay fariseokunam ichaqa kusikunankumantaqa llumpayta piñakuspa Jesusmanta nirqaku: “Chay runaqa manam Diospa runanchu, payqariki manam sabado punchawta respetanchu”, nispa. Wakinkuñataqmi nirqaku: “¿Imaynamá huchayuq runaqa chaynaniraq milagrokunataqa ruwanman?”, nispa (Juan 9:15, 16). Chaynatam fariseokunapas hukta-hukta rimaqku.

Chayraykum kikin qawarikuruq runataña tapurqaku: “¿Ima ninkitaq chay runamanta?, payqariki ñawikitam kichaykun”, nispa. Chay runañataqmi nirqa: “Payqa Diosmanta willakuqmi”, nispa (Juan 9:17).

Fariseokunam ichaqa mana Diosmanta willakuqpaqchu Jesustaqa hapiqku, aswanqa Jesuswan chay qawarikuruq runa sacrellawanña imapas ruwasqankupaqmi. Chaymi qawarikuruq runapa tayta-mamantaña tapuyta munarqaku warmanku nacesqanmantapacha ñawsa kasqanta yachanankupaq.