Jésus ade na Jérusalem na ngoi so lango ti Sabbat alingbi. Na ngoi so lo na adisciple ti lo angbâ ti tambela na yâ ti gbata ni, ala bâ mbeni zo ti iringo ye so a dü lo waziba. Adisciple ni ahunda Jésus atene: “Rabbi, zo wa la asara siokpari si a dü koli so waziba so? Lo wani wala babâ na mama ti lo?”—Jean 9:2.

Adisciple ni ahinga so koli ni ayeke lani pëpe na âme na yâ ti mbeni tere so ayeke yingo, na mbeni ndo, kozoni si a dü lo. Ye oko, ala ye ti hinga wala mbeni zo apeut ti sara siokpari na ngoi so lo de na yâ ti mama ti lo. Jésus akiri tënë atene: “A yeke nga koli so wala babâ na mama ti lo la asara siokpari ape, me ye so asi na lo ti tene azo abâ akusala ti Nzapa.” (Jean 9:3). Tongaso, a yeke pëpe koli ni wala babâ na mama ti lo la asara siokpari si lo, koli ni, lo ga waziba na pekoni so. Me, a yeke siokpari so Adam asara lani la asara si azo kue ayeke na siokpari na tere ti ala na ala peut ti wara akpale ti seni, na tapande ti ga waziba. Me, so koli so ayeke waziba so, a mû lege na Jésus ti fa akusala ti Nzapa, legeoko tongana ti so lo sara lani na ambeni ngoi, na lege so lo sava akobela na tere ti azo.

Jésus afa so a lingbi a sara akusala ni so hio. Lo tene: “Na ngoi so lâ angbâ, a yeke nzoni e sara akusala ti lo so atokua mbi. Bï ayeke ga, ngoi so zo alingbi ti sara kua ape. So mbi ngbâ na yâ ti dunia so, mbi yeke lumière ti dunia ni.” (Jean 9:4, 5). Biani, na yâ ti kete ngoi, Jésus ayeke kui na a yeke gue ti lu lo na yâ ti bingo ti dû ti kuâ, mbeni ndo so lo lingbi ti sara ye oko dä ape. Me, kozo si ye so asi, Jésus ayeke za lani lumière ti lo na yâ ti dunia.

Me, eskê Jésus ayeke sava ande koli ni so la? Lo sara ni tongana nyen? Lo tuku ngu ti yanga ti lo na sese na lo bungbi ni na sese ni, si aga popoto. Lo zia ni na ndo ti lê ti koli ni, na lo tene: “Gue mo sukula lê ti mo na ngu ti Siloam.” (Jean 9:7). Koli ni ague asara tongaso. Tongana lo sukula lê ti lo, lo bâ ndo! Tere ti lo adoit ti nzere lani mingi, ndali ti so depuis so a dü lo so, kozo ti tene lo bâ ndo la!

Tongana avoizin ti lo nga na azo so ahinga lo, tongana waziba, abâ lo, li ti ala akpe kue. Ala hunda ndo atene: “Koli so ayeke duti ka ti iri ye so la ape?” Ambeni atene: “Lo la.” Me ambeni amä na bê na ni ape, ala tene: “Ên-ën, lo la ape, zo ni akpa lo kpango.” Me, koli ni angbâ atene: “Mbi la.”—Jean 9:8, 9.

Tongaso, ala hunda lo atene: “Lê ti mo azi tongana nyen?” Lo kiri tënë: “Koli so a iri lo Jésus so la asara popoto, lo zia ni na lê ti mbi na lo tene na mbi: ‘Gue na ngu ti Siloam na mo sukula lê ti mo.’ Tongaso mbi gue, mbi sukula lê ti mbi, ni la mbi bâ ndo so.” Na pekoni, ala tene na lo: “Koli ni so ayeke na ndo wa?” Lo ngbâ lo tene: “Mbi hinga ape.”—Jean 9:10-12.

Azo ni ague na koli ni na aFarizien, na aFarizien ni kue aye ti hinga tongana nyen la lê ti lo ni azi so. Lo tene na ala, lo tene: “Lo zia popoto na lê ti mbi, mbi sukula lê ti mbi si na pekoni mbi bâ ndo so.” Tere ti aFarizien kue adoit fade ti nzere ti bâ so koli ni so awara sava awe. Me, nde na so, ambeni akomanse ti kasa Jésus. Ala tene: “Koli so alondo na Nzapa ape ndali ti so lo bata lâ ti sabbat pëpe.” Ambeni nde nga atene: “Zo so ayeke wasiokpari alingbi ti sara mara ti amiracle tongaso?” (Jean 9:15, 16). Kangbi atï na popo ti aFarizien ni.

Teti so ala yeke na abango ndo nde nde, aFarizien ni atourné fadeso na mbage ti koli ni so ayeke bâ ndo fadeso, na ala hunda lo atene: “So koli so azi lê ti mo so, mo tene ti mo nyen na ndo ti lo?” Koli ni ayeke na kite na ndo ti Jésus ape, ni la lo tene: “So prophète la.”—Jean 9:17.

A-Farizien ni ake ti mä na bê na tënë ni so. Peut-être ala pensé atene âmanke Jésus na koli ni so amä tere ti handa azo. Na nda ni, ala pensé so, ti leke tënë ni, a lingbi ala hunda babâ na mama ti koli ni ti hinga wala lo yeke waziba kozo.