Yesu badi ki mu Yelusaleme mwifuku dya Sabato. Pabadi balongi baye abatambuka mu lupata, abamwene muntu atekye ka pa lusa badi mpofu a kubutandwa. Balongi abayipwishe Yesu shi: “Mulambukishi, mukite milwisho bwady’a kutandjibwa mpofu nnaye’nyi su mbamutande?”—Yowano 9:2.

Balongi abadi bawukye shi muntu t’eekala na anyima shamweka eekalaa kwanka kumpala kwa kutandjikwa, byabya abadi abeyipusha su muntu mulombeene kukita mulwisho aye kii munda mwa nyin’aye. Yesu balulwile shi: “Taannaaye, sunga bamutande, anka mbwa’shi mifubo y’Efile Mukulu iilesheeshe kwadi.” (Yowano 9:3) Takubadi mulwisho wa yawa muntu sunga wa bamutande ubamwikeeshe mpofu nya. Anka bibadi kipeta kya mulwisho wa Adame ukwete kwikasha bantu bakutwe kupwidika na bilema. Na kwikala bu mpofu kwa uno muntu kubadi kupe Yesu mushindo wa kumwesha mifubo y’Efile Mukulu nka bu bibakitshine ingi misango pa kubuka ba sha maladi.

Yesu bashimikile kasele shi abitungu kukita ino mifubo na bukidi pa kwakula shi: “Pa kukii kutookye, nee na kya kulombasha mifubo ya yawa muntume. Bufuku tabudi peepi bishii bilombeene muntu kufuba. Pankii pano’pa, nee etaata dya ba-pano.” (Yowano 9:4, 5) Eyendo, lufu lwa Yesu lubadi na kya kumwikasha mu mufito wa kaluga nyembo wa’shi bya kukita kingi kintu nya. Munda mwa aa mafuku badi nsulo y’etaata dya ba pa nsenga.

Binobino Yesu bapashiishe yawa muntu mu kipaso kinyi? Yesu bafiidile mata mu nsega, aye nkukita matakye. Akupu nkushinga yawa muntu mu meeso na kumulungula shi: “Nda mu kwitumpa meema kwishiba dya Silowe.” (Yowano 9:7) Yawa muntu nkukookyela. Pabakitshine byabya, babangile kumona! Banda kunangushena muloo ubadi nao bwa kumona musango wa kumpala mu muwa waye!

Bankugishanyi naye na bangi bantu abadi abamuuku bu mpofu, abadi abakaanya pa kumwipusha shi: “Tannaaye badi mushale atekanga kya pa lusa su?” Bamo babadi abamba shi “nnaaye binyibinyi.” Bangi namu tababadi abakumiina pa kwakula shi: “Nyaa muntu mumwifwane.” Kadi muntu nabeene badi ashinkamisha shi: “Nnaami binyibinyi.”—Yowano 9:8, 9.

Akupu abamwipwishe shi: “A paapa meeso oobe ababuluka naminyi?” Badi mwibaluule shi: “Muntu abayitanyinaa buu Yesu, basobo matekye, beashingi pa meeso, ngi bangamba’shi, ‘ndaa ku Silowe oketumpe meema.’ Panekwende, neetumpu meema, nyi panapete lumonyi.” Abadi bamwipushe dingi shi: “Yawa ee kunyi?” Muntu atekanga ka pa lusa nkwalula shi: “Tanguuku’mi.”—Yowano 9:10-12.

Bantu abamutwadile kwi Bafadisee abakimbile dingi kuuka kipaso kibabanga kumona. Aye nkwibalungula shi: “Mundamikye matekye ku meeso, ami nkwitumpa meema, nkumona.” Bafadisee abadi na kya kusepeela bibadi yawa muntu atekanga  ka pa lusa mupashibwe. Anka bangi abadi abamba shi: “Yawa muntu taanemekaa efuku dya kwikisha, byabya tammutuukile kwi Efile Mukulu nya.” Bangi naamu abadi abamba’shi: “Bi kunyi bilombeene muntu sha milwisho kwikala na matalwa a kukita bilengyeleshi bi bino?” (Yowano 9:15, 16) Abadi beabuule.

Pa mwanda wa kaaka kabuulubuulu, abalukiile kwi muntu mpofu taadi amono na kumwipusha shi: “Obe naamu, wamba kinyi pabitale yawa mukubuule meeso?” Tabadi na mpaka pabitale Yesu pa kwibaluula shi: “Mmutemuki.”—Yowano 9:17.

Beena Yuuda nkupela kukumiina. Abadi abamono shi kwi muteo kampanda pankatshi pa uno muntu na Yesu bwa kubulakasha bantu. Abatshile kitshibilo shi, bwa kupwa wawa mwanda, abitungu kwipusha baledi ba yawa atekanga ka pa lusa su badi binyibinyi mutandikye mpofu.