Yesus de na ini Yerusalem ete na Sabat-dei. Te en nanga den disipel fu en e waka na ini a foto, den e si wan man di e begi sma sani èn di breni sensi di a gebore. Den disipel e aksi Yesus: „Leriman, efu a man disi breni sensi di a gebore, dan suma sondu? Na a man disi srefi, noso na en papa nanga mama?”​—Yohanes 9:2.

A kan taki den disipel e aksi densrefi efu wan sma man sondu te a de na ini en mamabere. Yesus e piki den: „A no den sondu fu a man disi noso fu en papa nanga en mama meki a breni. Ma a sani disi pasa, so taki sma kan si san Gado man du” (Yohanes 9:3). Sobun, a man, en papa nanga en mama no du nowan sondu di meki taki a kon breni. Na presi fu dati, na a sondu fu Adam meki taki ala libisma abi sondu te den gebore. Na so a du kon taki son sma breni noso taki den abi tra siki. Ma fu di a man breni, meki Yesus abi na okasi now fu sori a makti fu Gado, soleki fa a du dati na tra okasi pe a dresi tra siki sma.

Yesus e sori fu san ede a prenspari fu du den sani disi. A e taki: „Solanga a de deiten ete, wi musu du den wroko fu a sma di seni mi kon. A neti o kon te nowan sma o man wroko. Solanga mi de na grontapu, mi na a leti fu grontapu” (Yohanes 9:4, 5). Iya, heri esi te Yesus o dede, a o go na ini a grebi pe ala sani dungru èn pe a no man du noti. Ma solanga Yesus de na libi ete, a de a leti fu grontapu.

Ma Yesus o dresi a man disi? Efu a o du dati, dan fa a o dresi en? Yesus e spiti na gron, dan a e meki tokotoko nanga a spiti. A e poti pikinso fu a tokotoko na tapu a breni man en ai èn a e taki: „Go wasi na ini a watra fu Silowam” (Yohanes 9:7). A man e du san Yesus taki. Te a e du dati, a man si! A man breiti srefisrefi fu di a kan si fu a fosi leisi na ini en libi!

Birtisma nanga tra sma di sabi taki a man ben breni no man bribi san pasa. Sonwan fu den e taki: „A no a man disi ben gwenti sidon begi sma sani?” Son sma e taki: „Na en.” Ma tra sma di no man bribi e taki: „A no tru, ma a gersi a man.” A man srefi e taki: „Mi na a man.”​—Yohanes 9:8, 9.

Dati meki den e aksi en: „Dan fa a du kon taki yu man si?” A man di e begi sma sani e piki: „A man di den e kari Yesus meki tokotoko èn a lobi en na tapu mi ai, dan a taigi mi: ’Go na Silowam èn go wasi yusrefi.’ Fu dati ede mi go, mi wasi misrefi, èn now mi man si.” Den sma e aksi en: „Pe a man dati de?” A man e piki den: „Mi no sabi.”​—Yohanes 9:10-12.

Den sma e tyari a man go na den Fariseiman di wani sabi tu fa a du kon taki a man e si. A e taigi den: „A poti tokotoko na tapu mi ai, dan mi go wasi misrefi èn now mi man si.” Yu ben o fruwakti taki den Fariseiman ben o breiti gi a man  disi di kon betre baka. Na presi fu dati sonwan fu den e krutu Yesus. Den e taki: „A man disi a no fu Gado, fu di a no e hori Sabat.” Ma tra Fariseiman e taki: „Fa wan sma di de wan sondari, kan du den wondru dati?” (Yohanes 9:15, 16) Now den no e agri nanga makandra.

Fu di den no e agri nanga makandra, meki den e aksi a man di ben breni fosi: „San yu e taki fu a man disi, now di a meki yu si?” A man no e tweifri srefisrefi suma na Yesus. A e piki: „A man na wan profeiti.”​—Yohanes 9:17.

Den Fariseiman e weigri fu bribi a sani disi. Kande den e denki taki Yesus nanga a man disi meki mofo fu kori a pipel. Den feni taki a wan-enkri fasi fa den kan seti a tori disi, na fu aksi a papa nanga a mama fu a man efu a ben breni trutru.